Masyarakat Peduli Budaya Minangkabau
Sekretariat : Jalan Dalurung Raya No. 33, Phone (0251) 339208 - Bogor – 16152
Nomor : 02/MPBM/II/2004 Bogor, 18 Pebruari 2004
Perihal : Sumbangan Gampo
Assalamua’laikum WW
Kapado Niniak dengan Mamak, Alim Ulama, Cadiak Pandai Palito Alam, Rang Mudo Pamaga Nagari, Bundo Kanduang Limpapeh Rumah Nan Gadang, sarapek papeknyolah kapado warga Bogor nan barasa dari Minangkabau
Pandangan jauah alah balayangkan, pandangan hampia alah batukiakkan. Jikok siang alah bak hari, tarang alah bak bulan, basuluah jo matohari, bagalanggang mato rang banyak, mujua nan indak dapek diraiah, malang nan indak dapek ditulak. di nan baiak kito baimbaukan, dinan buruak kito bahambauan, Ba a nan kini nangko, alah malang tibo ditipak kito kini. alah samo awak katahui basamo, alah tajadi Gampo di kampuang awak, pado patang Sinayan malam Salasa didaerah Tanah Data, tapekno di salingka Kecamatan Batipuah (Pitalah, Bungo Tanjuang, Guguak Nyariang, Gunuang Rajo dlsb). akibaik gampo ko, alah manimbuakan kahilangan nyawo dan bangunan, labiah kurang alah 5 (limo) urang dunsanak kito nan maningga, baitu pulo lah banyak rumah jo bagunan Ibadah nan runtuah.
Ba a toh nyo kiniko, basiang di nan tumbuah, tumbuah sarupo iko kini, ibaraik papatah urang tuo kito juo, untuak maringankan baban nan ado di dunsanak kito nan mangalami gampo ko, iyo mintak Saciok bak ayam, Sadanciang bak basi kito nan basamo, kok ringan samo kito jinjiang, kok barek samo kito pikua, manangih dunsanak kito di Batipuah, basabak mato saindaknyo kito disiko.
Untuak itu, jo itikaik baiak sarato niaik nan suci, kami maharokkan uluran tangan kito nan basamo untuak mambarikan sumbangan atau apolah namonyo.
Paralu pulo kami sampaikan, katiko kinikolah raso badunsanak rancak dipanampakkan, wakatu kiniko pulolah kito bahambauan, katiko dunsanak kito sadang hauih, kito bari minum, katiko baliau sadang litak, kito agiah makan, samoga uluran tangan / sumbangan ko manjadi amal ibadah bagi kito basamo.
Indak banyak nan kami sampaikan, ujuiknyo nan lah jaleh dikito nan basamo, labiah kurangnyo, mintak dimaafkan.
Silang Nan Bapangka
Sutan Bandaro Labiah
Yahoo! Messenger - Communicate instantly..."Ping" your friends today! Download Messenger Now
____________________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net ____________________________________________________