Preface: Sabananyo carito ko lah sampai salasai ambo buek katiko tu, tapi tajadi eror sahinggo sebagian dari naskah hilang. Kini ambo hadirkan baliak caritonyo dari awal, plus bagian ending nan ambo tulih ulang baliak. Salain itu ambo revisi pulo saketek, untuak labiah samparononyo carito singkek ko.
Mudah2an dunsanak suko mambaconyo. Wassalam (Wady St. Indak Bagala) ---------------------------------------------------------------- Kajadian ko tajadi sakitar tahun 1989. Pado maso tu, VCD alun ado lai dibuek urang, apolai DVD bakcando kini. Katiko tu nan dapek ditonton di tipi cuma siaran TVRI. Lai ado nan punyo vidio, tapi alun bara lai. Vidio pado maso itu masih babantuak pita kaset, kebanyakan vidio nan dipakai urang mempunyoi kaset ukuran VHS. Ciek-ciek lah ado urang mamuta vidio untuak umum, sia nan manonton harus mambayia, "uang listrik" istilahnyo. Di kampuang ambo, nan banamo Tiaka Kecamatan Guguak, Kabupaten Limo Puluah Koto, listrik baru masuak. Nagari nan sabalunnyo kalam kini lah tarang. Lampu lampu togok lah mulai indak bapakai, tagantuang sajo di dindiang. Tibo maso bapakai hanyo kutiko listrik mati, atau jikok andak buang aia gadang ka tabek di baruah. Alah bara minggu ko, ado hiburan nan lah tersebar dari muluik ka muluik di kalangan kaum laki2 sajo. Bahwasonyo, di rumah si Son (kami acok mamanggianyo Galesong), satu-satunyo urang nan punyo vidio di Tiaka ko, acok diputa pilem urang gadang. Dek inyo indak babaju jo basarawa, mako acok diistilahkan sbg "pilem urang bansaik". Jadi jikok ada urang nan mangecek bhs inyo ka pai manonton pilem urang bansaik, mako kami lah samo tau apo mungkasuiknyo. Si Son Galesong tu, bakarajo di perusahaan kopi "Serbuk Sari", di Danguang-Danguang, nan cukuik terkenal di lingkuangan Payokumbuah. Rasonyo, kecek urang nan candu minum kopi, iyo lamak, ndak ado bacampua jo jaguang. Bahkan kecek urang, kopi "Serbuk Sari" ko lah terkenal sampai ka Jakarta. Ambo picayo jo carito tu, sabab banyak ambo caliak urang2 nan pulang dari jakarta, acok mambali kopi tu, baborong bana banyak banyak. Kutiko ambo tanyo, baa kok sabanyak tu bana mambali kopi, inyo manjawek bhw itu pasanan urang bagai, dan utk oleh2 bagi urg rantau di Jakarta nan alun dapek pulang. Kutiko tu, parusahaan kopi tu alah dijawek anaknyo banamo si Bujang. Perintis usaho kopi itu adolah Raisab jo Sariamin, baduo balaki binyi, sajak tahun 1926 (tasurek di bungkuih kopinyo, dek itu ambo dek tau). Si Bujang anaknyo ko, sabana candu ka ikua. Bininyo banyak. Lai babini pulo inyo surang ka kampuang ambo, banamo si Las. Katiko inyo masih manjadi sumando baru di kampuang kami, banyak sumbangan nan diagiahnyo ka klub sepak bola Tiaka (banamo "Sparta"), sahinggo di baju tim kesebelasan Sparta tu tasurek tulisan "serbuk Sari" sebagai sponsor. Babaliak ka curito kito, tantang pilem urang bansaik tu, pado suatu malam, ambo diajak dek kawan untuak sato manonton pilem urang bansaik tu. Ambo alah manulak, tapi dipasonyo. Akhianyo tapaso ambo pai juo, padahal batentangan jo aka ambo nan kutiko itu ambo sadang siak bana. Untuak manonton tu, tiok urang harus manyumbang. Ambo dek dipaso pai, indak namuah ambo mambayia. "Mati sajo lah untuak itu den ka mangaluakan pitih pulo." baitu kecek ambo. Akhianyo dapeklah ambo manonton tapi pitih indak kalua. Lah disetelnyo dek si Galesong pilem tu. Kasado urang nan ado di dalam haniang sadonyo. Ambo etong, ado kiro2 sapuluah sampai sabaleh urang nan hadir. Nan takana di ambo adolah si Buyuang Kepoh tukang galeh sate, Nazuar, Si On, Aman tinggi, si Elan, Endri (kawan ambo tu), dan bbrp orang lain nan ndak takana di ambo. Ado ciek nan heran ambo, sato manonton pulo Anwarbai Luran Dt. Bijo di dalam tu. Acok ambo mancuri2 pandang ka inyo. Baa kok ustad nan aktifis partai P3 balambang Ka'bah ko ado pulo disinan? Antah tau inyo dek ambo acok madok ka inyo, antah indak. Kiro2 lah saparo pilem tu baputa, inyo mangalucuih ka lua, pulang. Kiro-kiro lah labiah saparo pilem tu baputa, kasadonyo lah tahaniang. Buyuang Kepoh titiak aia saleronyo tampak dek ambo. Nazuar lah lamo mati rokok di tangannyo, abunyo sampai jatuah ka kain saruang. Tibo-tibo, tadanga suaro teriakan dari luar, "Jangan bergerak, tempat ini sudah kami kepung !!!" Suaro tuh diiringi pulo oleh suaro basi balagulagah, manyarupoi suaro sanjato pistol nan dikokang. Lansuang sado nan ado barubah mukonyo, pucek pasi bacando maik. Galesong bacaruik sambia babisiak; "P****k, palisi tibo..." Sarawa Buyuang Kepoh nan tadi nampak dek ambo manggambuang sabalah kamuko, langsuang kampih. Mulai tadanga suaro urang manggedor pintu kareh-kareh. "Bukak pintunyo, atau kami dobrak!" Sagahnyo dari lua. Ambo duduak basanda pas di suduik pintu salah satu biliak anak Galesong. Sacaro indak sangajo nampak dek ambo pintunyo agak saketek maranggang, indak takunci ruponyo. Sadang urang pucek pasi kasadonyo, suaro gedoran di pintu batambah kareh, ambo tulak pintu biliak anak Galesong tu lambek-lambek, manyalinap ambo kadalam. Ruponyo biliak tu biliak anak gadih Galesong. Anak Galesong tu kelas 3 SMP baru, tapi kecek urang anak padusi Galesong tu capek gadang, lah tantu jo barang nan gadang dek acok mancaliak pilem sarupo itu. Baitu kecek urang. Ambo iyo kurang tantu mangenai masalah tu, ndak pulo ambo ingin mauruihnyo. Mancaliak ado kagaduhan, dan ambo manyalinap masuak kamarnyo, ampia mamakiak anak gadih Galesong tu. Ambo tempelkan jari talunjuak di bibia, maagiah isyarat, lalu mangecek ambo babisiak, "Sst... ado polisi tibo, beko kalau lah pai nyo aden kalua baliak. Tanang sajo lah." Syukurlah inyo bisa mangarati. "Gubrakk!!" Tadanga dek ambo suaro pintu didobrak, diiringi oleh puluhan cahayo senter manyilaukan. "Baa kok indak namuah kalian mambukak pintu? Kasado nan ado disiko, tangan kaateh sadonyo, capek!!" Baitu teriak salah satu dari polisi tu, diiringi oleh beberapa bunyi klik, suara kunci senapan nan siap ditembakkan (atau pistol? ambo indak tau pasti krn ambo indak mancaliak krn ambo di dalam kamar, masuak ka bawah dipan anak Galesong). Jantuang ambo berdegup kareh, raso ka talompek kalua. "Apo lah nan katajadi ko?" Baitu kecek hati ambo. Tadanga dek ambo suaro mahariak Galesong, ruponyo inyo tatangkok basah pas sadang manungkuik kabawah lumari, andak manyuruakkan kaset2 tu. Akhianyo, malam tu juo kasado nan hadir digiring ka kantor Polsek Danguang-danguang. Galesong pun tabao jo barang bukti nan tatangkok di tangannyo. Ambo diam sajo dibawah dipan anak gadih galesong sampai urang pai. lai ado nan manyigi ka dalam kamar jo senter, tapi dek tasigi dek inyo anak gadih sadang lalok, lai babaliak sajo inyo lai. Ruponyo, lah beredar ka salingkuang nagari desas desus bahwa di di rumah Galesong ko mamuta pideo parno. Dari lapau ka lapau, sampai induak-induak nan basiang di tangah sawah lah abih tau sadonyo. Akhianyo ado anggota masyarakat nan malapor ka polsek, hinggo digarebek lah kadiaman Galesong malam tu. Sasudah manjalani pamariksaan di kantua Polsek bbrp jam, akhirnya kasado dunsanak nan manonton tu dibuliahkan pulang. Galesong lai ndak sampai tatahan lai. Tapi tadanga dek ambo kudian bahaso inyo dikenai sangsi wajib lapor ka Polsek. Sampai kini, jikok dunsanak mambali sate Buyuang Kepoh tu, cubo tanyo kajadian malam tu. Pasti sirah mukonyo dek malu. Kabanyo Buyuang Kepoh sampai ndak batarompah pulang dari kantua palisi tu. Syukurlah lai indak ado tindak kakerasan nan tajadi. Induak-induak pun alah tanang atinyo, lakinyo lai ndak pai manonton ka rumah Galesong tu lai. Sampai bataun-taun sasudah tu, dek maso batuka musim lah baganti, VCD manyerbu sampai ka palosok2 kampuang. Pilem urang bansaik nan sarupo apo andaknyo, direntalkan urang. Indak cukuik tanago palisi untuak dikerahkan menggarebek urang2 nan mamuta pilem tu lai. Ampia di tiok lapau baputa, bahkan tiok rumah! Akhianyo polisi2 tu bagai sado manonton. Indak jarang bahkan mamak jo kamanakan lah basamo2 sajo manonton pilem urang bansaik tu lai... *** Jadi baa kajadiannyo di biliak anak gadih Galesong sasudah urang tu pai kasadonyo...? Oops..! Sasek ambo, harusnyo indak tasabuik dek ambo do..! ~end~ Bogor, End of June 2004 ----------------- Do You Urangawak? Join [EMAIL PROTECTED] ! Click http://groups.yahoo.com/group/urangawak to join ----------------- __________________________________ Do you Yahoo!? New and Improved Yahoo! Mail - Send 10MB messages! http://promotions.yahoo.com/new_mail ____________________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net ____________________________________________________
