Teuing iraha, pokona mah baheula, kuring kungsi ngadenge lagu Sunda, tapi logatna siga lagu-lagu Cirebon atawa Dermayon, lirikna teh pikaseurieun: "Sarkawi kuring serahkeun, Anak bawa kuring ngilu ......"
Tepi ka ayeuna kuring teu manggihan rekaman lagu eta. Panasaran lalayaran dina google make kata kunci "sarkawi". Alhamdulillah manggih, tapi teu persis pisan, sabab nu kapanggih ku kuring, lirikna dina basa Cirebon/ Dermayon nu nembangna Cicih Cangkurileung, salah saurang sinden Sunda nu kakoncara. judul laguna "Kiser Saedah", lagu tarling. Singhoreng "Kiser Saedah" teh dongeng nu dilagukeun. Dongengna kira-kira kieu. Kacaritakeun aya hiji kulawarga nu katalangsara, nyaeta kulawarga SARKAWI, nu boga anak SAEDAH jeung SAENI. Sarkawi hirupna sangeunahna, tepi ka pamajikanana ngabatin, nu tungtungna maot tunggara. Tapi Sarkawi henteu insaf, manehna malah kawin deui jeung parawan, MAEMUNAH. Maemunah jadi indung tere nu telenges. Kulawarga Sarkawi beuki awut-awutan, anakna, Saedah jeung Saini loba disiksa ku indung tere, nepi ka akhirna kausir ti imah kulawargana. Saedah jeung Saeni aprak-aprakan tepi ka sisi walungan nu disebut walungan Bengawan Sewu. Di Bengawan Sewu loba buhayana, tapi lain buhaya samanea, ieu buhaya kajajaden. Buhaya-buhaya ieu tadina manusa nu munjung ka siluman, menta kakayaan nu syaratna ditebus engkena jadi buhaya. Saedah jeung Saeni, nu katalangsara wae hirupna, akhirna munjung, menta kakayaan. Maranehna jaradi jalma jegug nepi ka tepi ka waktuna kudu nebus, jaradi buhaya, nambahan koleksi buhaya di Bengawan Sewu .... Lain dongeng nu " happy ending", malah jadi rada sedih maca ringkesan carita Kiser Saedah teh, komo lamun bari ngadengekeun laguna sanajan teu pati ngarti da make basa cirebon. Kuring jadi ras inget kana nasib jalma leutik nu katalangsara, bisa wae sagalana dilakonan keur ngarobah nasib, sanajan nyaho ujungna acan tangtu ngabahagiakeun. Nu siga Saedah jeung Saeni ayeuna oge loba, contona para TKW nu wani ngorbankeun maneh, keur ngarobah nasib ..... Keur nu hoyong ngareungeu lagu kiser Saedah, tiasa download di alamat ieu: http://www.zshare.net/download/599175228a090022 Filena dina format RAR, upami dibuka aya sababaraha hiji lagu sunda, salah sawiosna Kiser Saedah ieu (mung bagian IIna wungkul) Baktos, WALUYA
