<http://vuthdevelop.blogspot.com/2010/08/blog-post_4089.html> RFI ដោយ ប៉ែន បូណា អត្ថបទចុះផ្សាយនៅថ្ងៃ សៅរ៍ 14 សីហា 2010
*ជម្លោះព្រំដែននៅប្រាសាទព្រះវិហារបានរាលដាលជាបន្តបន្ទាប់ និងកាន់តែស៊ីជម្រៅឡើងជាលំដាប់។ ថៃមិនត្រឹមតែមិនព្រមទទួលស្គាល់ថាខ្លួនកំពុងឈ្លានពានទឹកដី ខ្មែរប៉ុណ្ណោះទេ តែចុងក្រោយនេះ គេបែរជាចោទថា កម្ពុជាកំពុងឈ្លានពានទឹកដីរបស់ខ្លួនទៅវិញ។ ការចោទប្រកាន់នេះបានធ្វើឡើងតាមរយៈលិខិតរបស់នាយករដ្ឋមន្ត្រី អាភីស៊ីត វេចាជីវ៉ា ផ្ញើជូនអង្គការសហប្រជាជាតិ កាលពីថ្ងៃទី១០សីហាដោយបដិសេធមិនទទួលយកកិច្ចអន្តរាគមពីសហគមន៍ អន្តរជាតិឡើយ។ នេះគឺជាពេលវេលាដែលកម្ពុជាត្រូវជម្រះបញ្ជីឲ្យជ្រះស្រឡះជាមួយថៃ។* នៅទីបំផុត រឿងរ៉ាវព្រះវិហារដែលថៃបានចូលទន្ទ្រានទាំងបំពាន កាលពីថ្ងៃទី១៥កក្កដាឆ្នាំ២០០៨មកនោះ បានក្លាយជារឿង«ចោរស្រែកឲ្យគេចាប់ចោរ»។ នាយករដ្ឋមន្ត្រីថៃ អាភីស៊ីត វេចាជីវ៉ា បានសរសេរសំបុត្រប្រាប់អង្គការសហប្រជាជាតិ កាលពីថ្ងៃទី១០សីហាថា បញ្ហាព្រះវិហារកើតឡើងដោយសារតែកម្ពុជាបានឈ្លានពានទឹកដីរបស់ខ្លួន ទៅវិញ។ ស្ថានភាពនេះជាសញ្ញាបញ្ជាក់ឲ្យឃើញថា កម្ពុជាចាំបាច់ត្រូវជម្រះបញ្ជីជាមួយថៃឲ្យបានជ្រះស្រឡះ ជាបន្ទាន់មិនអាចបណ្តែតបណ្តោយឲ្យបញ្ហាដ៏រ៉ាំរ៉ៃនេះបន្តអូស បន្លាយបានទៀតឡើយ។ អូសបន្លាយមិនបានពីព្រោះថា ផលវិបាកនៃសំណុំរឿងនេះកាន់តែមានសភាពធ្ងន់ធ្ងរឡើងជាលំដាប់ដែល អាចនឹងធ្វើឲ្យកម្ពុជារងគ្រោះ នៅថ្ងៃណាមួយ ប្រសិនបើមានការធ្វេសប្រហែស។ ជាការពិត ដូចដែលក្រុមអ្នកវិភាគបានមើលឃើញតាំងពីដើមទីមកអ៊ីចឹង កម្ពុជាគួរតែប្រញាប់ប្រញាល់ដោះស្រាយបញ្ហានេះ តាមរយៈការប្រើប្រាស់យន្តការអន្តរជាតិ តាំងពីដើមទីមកម៉្លេះ ដោយហេតុថា យន្តការទ្វេភាគីមិនអាចនឹងដោះស្រាយបានឡើយ។ បញ្ហានៅត្រង់ថា តើគេអាចដោះស្រាយបញ្ហាបានយ៉ាងដូចម្តេចទៅ បើនៅពេលចូលតុចរចាម្តងៗ ភាគីថៃកាន់ផែនទីផ្សេង រីឯភាគីកម្ពុជាកាន់ផែនទីផ្សឹង? មិនតែប៉ុណ្ណោះលទ្ធផលដំបូងៗនៃកិច្ចប្រជុំថ្នាក់រដ្ឋន្ត្រីការបរទេស ៣លើកចុងក្រោយ ត្រូវបានភាគីថៃយកទៅគ្រវាត់ចោលកៀនជញ្ជាំងមិនខ្ចីយកទៅឲ្យ រដ្ឋសភាអនុម័តឡើយ។ តើឯណាទៅជាសុឆន្ទៈរបស់ថៃក្នុងការដោះស្រាយបញ្ហាជាមួយកម្ពុជានោះ? លើសពីនេះទៅទៀតថៃនៅតែអះអាងចំពោះមុខក្រុមប្រឹក្សាសន្តិសុខសហ ប្រជាជាតិថា ខ្លួនពិតជាចង់ដោះស្រាយបញ្ហាជាមួយកម្ពុជាដោយសន្តិវិធី និងតាមរយៈយន្តការទ្វេភាគីដដែល។ អ្វីដែលឈឺចាប់បំផុតនោះ គឺថៃបានចោទកម្ពុជាថាបានបំពានចូលទឹកដីរបស់ខ្លួន។ មកដល់ចំណុចនេះ មេដឹកនាំខ្មែរគួរយល់បានហើយអំពីមហិច្ឆតារបស់ថៃដោយមិនគួរបណ្តែត បណ្តោយឲ្យបញ្ហាអូសបន្លាយតទៅទៀតឡើយ។ ចំណុចដែលត្រូវចោទសួរនោះ គឺតើហេតុអ្វីបានជាថៃខ្លាចយន្តការអន្តរជាតិដើម្បីដោះស្រាយបញ្ហា ប្រសិនបើខ្លួនអះអាងថា កម្ពុជាកំពុងឈ្លានពានទឹកដីរបស់ខ្លួន? ចម្លើយមានតែមួយគត់គឺ មកពីថៃគ្មានភស្តុតាងដើម្បីការពារអំណះអំណាងរបស់ខ្លួនចំពោះមុខ សហគមន៍អន្តរជាតិឡើយ។ ដូច្នេះយុទ្ធសាស្រ្តរបស់ថៃ គឺការអូសបន្លាយទំនាស់ឲ្យបានយូរតាមដែលអាចធ្វើទៅបាន ហើយ នៅក្នុងអំឡុងពេលនោះពួកគេនឹងប្រើយុទ្ធវិធី«បើកុហកម្តងគេមិនជឿ ត្រូវកុហកដប់ដង ឬមួយរយដងនោះគេនឹងជឿជាមិនខាន»។ អ្វីដែលគួរឲ្យពិចារណាបំផុតនោះ គឺថៃកំពុងធ្វើយ៉ាងណាឲ្យខ្លួនឯងដែលជាអ្នកឈ្លានពានក្លាយជា អ្នករងគ្រោះដោយការឈ្លានពានទៅវិញ។ ទន្ទឹមនឹងនេះ ថៃនៅតែបន្តប្រើគ្រប់វិធីដើម្បីអូសបន្លាយទំនាស់ ហើយឆ្លៀតឱកាសធ្វើព្យុះ ធ្វើភ្លៀងអង្គការយូណេស្កូយ៉ាងសម្បើម។ គោលដៅចុងក្រោយរបស់ថៃគឺធ្វើយ៉ាងណាឲ្យ«ចោររួចខ្លួន រីឯម្ចាស់ទ្រព្យត្រូវជាប់គុក»។ ល្បិចនេះ ថ្វីត្បិតតែនៅលើគោក តែថៃនៅតែព្យាយាម។«ព្យាយាមក្រែងបានសម្រេច»។ ចុងក្រោយនេះ លោកនាយករដ្ឋមន្ត្រីហ៊ុន សែន បានដាក់ល័ក្ខខ័ណ្ឌ២យ៉ាងឲ្យភាគីថៃចំពោះបញ្ហាព្រះវិហារ គឺទី១ ថៃត្រូវឲ្យរដ្ឋសភារបស់ខ្លួនអនុម័តលទ្ធផលនៃកិច្ចប្រជុំ ៣លើកចុងក្រោយ ដែលបានចុះហត្ថលេខាជាមួយគ្នា និងទី២ ការចរចាត្រូវមានយន្តការអន្តរជាតិណាមួយជាអ្នកសម្របសម្រួល។ ល័ក្ខខ័ណ្ឌទាំងពីរនេះ ត្រូវគេមើលឃើញជាទូទៅថា ល្អប្រសិនបើរដ្ឋាភិបាលពិតជាប្រកាន់យកដោយម៉ឺងម៉ាត់មែននោះ។ ផ្ទុយទៅវិញ ប្រសិនបើជំហររបស់ថៃដែលចង់ចរចាទ្វេភាគីបានទទួលជ័យជម្នះតែដដែល នោះ វាមិនខុសអ្វីពីការផ្តល់ឱកាសឲ្យថៃមានពេលសំងំសន្សំពិស ដើម្បីព្រួសដាក់កម្ពុជាជាបន្តទៀតនោះឡើយ៕ -- You received this message because you are subscribed to the Google Groups "Cambodia Discussion (CAMDISC) - www.cambodia.org" group. This is an unmoderated forum. Please refrain from using foul language. Thank you for your understanding. Peace among us and in Cambodia. To post to this group, send email to [email protected] To unsubscribe from this group, send email to [email protected] For more options, visit this group at http://groups.google.com/group/camdisc Learn more - http://www.cambodia.org
