Greba egiteko ESKUBIDEA?
Aspaldi irabazitako batailak askotan ahaztu egiten ditugu antzinatasun hori
dela medio. Hori da, batzuen aburuz, Partidu Popularrari Espainian
gertatutakoa. Ados egon naiteke, ala ez. Baina hori ez da atera nahi dudan
trapu itsusia, ez nuke ezer berririk gaineratuko hau irakurriko
duenarentzat. Gaur beste aldetik doa haria.
Asteartean lasai asko geunden klase bateko azken bost minutuak aprobetxatu
nahian (badirudi irakasleek bukaeran eman behar dutela beti zaplazteko
potoloena) eta halakoan atea ireki zen. Lau pertsona sartu ziren aurpegia
scream pelikulako hiltzaileak daraman aurpegi-zorro horietako batzuekin...
eta beltzez jantzita laurak. Neska bat zihoan aurrena.
Itxoizuz bost miñutu neska, klasia amaitziarren dakat ta! eskatu zion
irakasleak. Entzungorrarena egin eta bere ondoan tinko geratu zen. Beste
batek kartel bat jarri zuen paretan: A-17 GREBA. BOLOGNA. A-9.
Egun berean, atean, ikastalde ordezkariei deialdia egiten zitzaien bilera
informatibo batetara joan zitezen. Eta gurea, joan da. Gaur, delegatuak
azaldu dizkigu berari esandakoak:
EHUko tasak igo nahi dituzte, unibertsitatea pribatizatzeko eta horrela
dirudunek bakarrik izan dezaten ikasteko eskubidea, bekak eta dirulaguntzak
ere kendu nahi dituztelako. Irakasleek ez dutela materiarik emango, klasera
joan, apunteak banatu eta bakoitzak bere kontura ikasi beharko duela. Eta
abar. Eta hortaz, azaroaren 17rako greba proposatzen dutela, eta...
BOTAZIOA, GEHIENGOAK EZEZKOA ERABAKITZEN BADU, NORBERARENGAN GERATZEN DA
GREBA EGIN ALA EZ AUKERATZEKO ESKUBIDEA, BAIEZKOA IRTETZEN BADA, BERRIZ,
DENOK GAUDELA BEHARTUTA GREBA EGITERA.
Greba egiteko eskubidea aspaldi lan eta indar handiz lortu zen. Guda sozial
eta politiko baten emaitza dugu greba eskubidea. Zerbait lortzeko metodo
egokia den ala ez, beste diskusio bat izan daiteke, baina denok baldin
badugu greba egiteko eskubidea, mesedez, utzi baita ere lan egiteko
eskubidea. Izugarrizko amorrua eman dit demokrazia eskatzen dutenek bere
barne arautegietan prozesu hain zentralista eta zapaltzaileak izateak. Gaur
ikusitakoarekin, haien proposamenarekin ados egon ala ez kontutan izan gabe,
argi ikusi dut talde horretan ez dudala parte hartuko.
Demokrazia nahi badugu, eskubideak nahi baditugu, planteamenduak izan
daitezen berdinak gustuko dugun emaitza eta gustuko ez dugun kasuetan, hori
baita demokraziaren oinarrietako bat. Demokraziazale horiek izugarrizko
ostikoa eman diote gaur demokraziari.
Botazioan BAIezkoa irten da. Greba egiteko eskubidea betebehar bilakatu da.
Klasera joan nahi duten horiei beraien greba eskubidea izorratu diote, greba
eskubideak ez baitu lan eskubidearen oztopo izan behar.
Josu.
_______________________________________________
Adi gero, mezuak bidaltzeko: [email protected]
http://www.eibar.org/zerrenda
harpidetza eteteko: [EMAIL PROTECTED]
