Internetera dedikatzen naizenetik, lema eta esaldi fetitxe dexenterekin egiten dut topo, baita neuk ere horiek liberaltasunez erabili. Modernokeriak, akaso. Akaso pentsa dezakegu berrienari eta etorkizunari zuzendutako lema hauek ateraldi novissimoak direla... baina, hara non aurkitu ditudan lema horietako bi, berriki, pelikula *zaharretan.*
Bata da THE WORLD IS FLAT. Mundua laua da. Thomas L. Friedman kazetariaren liburu bat da. Joxe Aranzabalek hala deskribatu du bere blogean: "Mundua laua dela dio egileak, eta horrekin esan nahi du konektatuta dagoela: hesi ekonomikoen eta politikoen jausteak ekarri du, iraultza digitalarekin batera, aukera paregabea negozioak egiteko milioika lagunekin munduan barrena." Ba, begira, nire afizio horietako batean, pelikulak euskaraz azpititulatzeko afanean, aurkitu dut lema hori, Mundua Laua Da, 1968ko film batean. Peter Sellers-en The Party zoragarrian, elefantea daramatenean etxera, muturrean du margotua lema hori elefanteak, The World Is Flat. Nola ez dudan liburua irakurri, agian han ere aipatuko da lema ez dela berria, film horretan ez bada, 1960ko hamarkadako eslogan kontrakulturala dela. Beste lema moderno bat, Print Is Dead. Papera hilda dago. Egun hauetan, pronostiko hau sarritan ikusten da, prentsa idatzian krisia beste alor batzuetan baino gehixeago igarriko ote den... Ba 1984ko film batean aurkitu dut hau, Ghostbusters-eko Egon Spengler doktoreak pronostikatu zuen. Bien azpitituluak aurtengo Gabonetan euskaratu ditut, umeei erakusteko film zoragarri horiek, eta halaxe egin dut topo bi esaldiekin. http://www.manterola.org/azpitituluak http://www.manterola.org/azpitituluak/euskaraz/1230802032 http://www.manterola.org/azpitituluak/euskaraz/1230366745 Batez ere The Party-rekin disfrutatu dute umeek. Madrazok ez luke onetsiko, ze jaietan alkohola edatearen aldeko apologia ganberro bat da, baina benetan barregarria da pelikula. Luistxo _______________________________________________ Harpidetza eteteko, bidali mezua hona: [email protected] izenburuan jarriz 'unsubscribe' (horixe bakarrik, komatxo barik) Ondoren konfirmazio mezua jasoko duzu harpidetza-etetea berresteko.
