10ver kalchea Sunkraradis Minguel Rod hache voir ek lekh boroilolo tacho poilo bhag anvem Goanettar ghatlo ani dusro bhag 11ver ghaltolom mhonn aslom. Pun zalem boltench. Mojim chntlelim chintna xarti pavlinchna karann mojim chintna fokot zaun ghelint sopnam. Kalchea Sunkraradis mhonnchem 10ver hea mhoineache Indian Arts Circle hantun vorsavollicho dhobazo also �GOA DAY� mhonn, dis bhor ho dhobazo zo Goan Welfare Society ghoddun haddta. Kaim tori karannank lagon aum hea dobazeak kednanch vochona nhoi mhonn mozo sangati Santano John Fernandes hoi kednanch thuim vochona. Pun heach vorsa amcho John aple ghorkarnik ani panch vorsache eklech apurbaeche dhuvek gheun Goa Day haka hazir zaunk ghelo. John ani tachi famil ani aum sumar 10 vorsam zalint ekach Flattan ravtat ani moi mogan ekuch kuttumb kosso jietat zorui tanche modem ani moje modem rogtachi soirigoth koslich na pun soirigoth ixttagotichi ji ekdom lamb ani nibor assa. Goa Day haka vochpak ghorantlo bhair sortana Johnache dhuven maka beiz dilo ani �bi�uncle oxem mhontlem ani Johnan �borem Veronic, etam ahm, mellchem maguir sanje�. Kotta! Johnank Sanz ailich na karann to porot ghora ailoch na kiteak to tech modianir ratcho hea sonvsarak somplo Adan Hospitalan. To kosso somplo?
Goa Day sompchea adinch sumar ratchea 7-30 ou 8.00 horar to Funaitees aslolea Indian Arts Circle hantuntlo aple familik gheun bhair sorlo ghora evpak, tannem aplea Mobile-hacher phone marun Taxi apoileli pun ti Taxi ailich na ou ti Taxi taka mellich na. Oxe porim vell pirder korcho nhoi mhonn to cholot ravlo mukklea rostear evpak pun choltana kon tori ek �Bom Samaritan� kosso eklo Goykar bhau aple ghorkarni sangata aplea mottoran thuim pavon sorlo ani hea Bom Samaritan hachem Goykarpon jem tachea xirani ghott rombon aslem tem voir sorlem ani tanne aplem motor tamboilem ani Johnak ani tache familik aplea mottoran ap-khoxen bhitor ghetlint ani sanglem ki apun tumkam Kuwait Cityn pavoitam mhonn. To Bom Samaritan mhonnta to nhoi anik kon bogor Divaddecho Cosme ani tachi mogall ghorkarn. Cosme sodhea National Bank hantun nokri korta tor tachi ghorkarn KPC hantun. Dogaim tim mou-mou kallzachim mhonnonuch tanni hi itli vhodd korni adharli zorui Cosme ani tachi gorkarn John haka ani tache familik vollkoch nant. Poilech pavtt tim eka mekak tea dissa bhettat. Oxe porim sumar 5-10 minut tanchem mottor choltana okosmat Johnanchea hordean kitem tori dukh eta ani John mottorantuch apleache dolle portita ani soglo abalar zata. Hem polloun Johnachi ghorkarn khinvcheani bob-ueli marta, Cosme ani tachi ghorkarn khamptat. Vattek konnuch vollkicho nasta, Cosme motor tamboita ani maka phone marta, rostear eta ani Cosme vatter choltoleam mottorank ulo marta, kon tori Kuwaiti tambtat, vatter auchit ek Ambulance passar zata taka Cosme thamboita, tea Ambulance hantunlo ek dotor bhair sorta, Johnank first aid dita ani thuimchea thuinch Ambulance hantun ghalun sompto Adan Hospitalan vhorta.
Hospitalan bhitor vortanch Cosme hachi ghorkarn Cosme sangata John hachi "file" toiar korpak khottpott korta ani xekim Johnak Intensive Care Unit hantun ghaltat. Dotorank gomta tachi poristhithi ekdom ghombir mhonn, to matso � matso dotoram laguim uloita, aplea hordean burning sensation zata mhonn gun-gunnaun dotorak sangta. Dotor ani Nursi bhoroch bhar ghetat, telephone korun vhoddlea dotorak haddtat. John hacho pressure ekdom sokol denvlolo ani kallzac dhoko laglolo. Orxim zalear John ek �heart patient�. Rokkdoch taka dotor Pacer ghaltat tachem "heart ani pressure" porot "normal" haddpak pun kainch zaina, sumar to 4 horani mhonnchem ratchea 12.30 horar morta. Tachea mornan tachi ghorkarn randd zata, dhuv pabui naslolem zata, avoik put na zata ani bhavank ani bhoinnank mogacho bhau na zata.
Hi tachea mornachi khobor Goykaram modem rokddich fankarta mhonnon Goa Day haka ghelolo munis thuim melo mhonn. To khuim mela ani kosso mela tem anvem vhoir dilam. Somaradis tachea mornachem Mis Kuwaitche igorjent bhettoilem taka zaito lokh hazir also. To mortoch tache ghorkarnink ani dhuvek buzvonn divpak lokancheo volli lagtaleot amchea ghorant, fursod nastana lokh amchea ghoran etalo. John amchea modem ekdom mogall ani sogleancho ixtt tossoch sangati also. To Kuwait Airways hantun nokri kori sumar 24 vorsam zalint, to ekloch zoddkar, tachi ghorkarn nokri korpi nhoi asli. Tachi meleli kudd Munglaradis fantear Indian Airlines hantun Goyam veli, tache kuddi vangdda tachi ghorkarn, dhuv ani tancho kumpar Cuncollimcho Ilias Goyam ghelint. Goyam tachea moddeachi ani interrachi bandabost sarki zanvchi mhonn Johnacho mevnno Shri Alberto khup vavurlo ani Airportar thaun modem veigim bhair kaddpak Prince Jacob hannem khup adhar kelo, Prince Jacob zaun assa Kumpar Johnacho mhonnchem Padrin Johnache dhuvecho. Tech sanje � Munglaradis � tacho inter zalo Anjuna Vagatorche igorjent zuim miss bhettoilem Fr. Gabriel Diasan ani aplea sermavan John hachi tust korun ulop kelem.
Aum hanga mojea sangateank gheun zaiteo chollvolli kortam tantun makar John hacho bhorpur adhar aslo. Amchea ghorant lhan tosse vhodd munis etat, Goyam thaun zaite pavtt visiting tiatrists etat te ravtat, ghorant essaiyo, meetingo ani her karivalli choltat tantun maka Johnacho sodanch sohokar astalo ani amger ravtoleam ani eteleam lokancho to ekdom boro poramos kortalo. Kuwait Konknni Kendr ani Konkani Heritage Kuwait tech porim Goa Kuwait Solidarity Centre hancheo kariavolli cholltaleo tantun John nibran bhag ghetalo ani aplo soglo tenko ditalo. To ek mozo visvasi ixtt ani sangati also, tech porim tachi ghorkarn. Kiteim kortolom zalear aum poilo taka sangtalo ani to sodanch maka boll ditalo choll voch fuddem oxem mhonnon. Tachea okosmat mornan moje chollvillicho ek bhag konsllon poddlo to anink porot kednanch ubho korunk zanvchona. To mortoch sabar lokani amchea ghorant eun porxim aplo mog dilo, adhar bhasailo ani buzvonnicho tenko dilo titleanchei vhodd upkar. Heam lokam modem nhoich amche Goykaruch aslet mhonn pun her samazantale ani her dhormanche passun. Kheritponnin vhodd adhar dilo te he: Curtorimcho Salvador Dias hanne zo zaun assa president Curtorim Clubacho, John hacho Kuwaiti Manager Mr. Khlid, Johnacho Kumpar Ilias, Social worker ani Igorjent vavurpi Albino Fernandes, KKK-cho president Elvino Rodrigues and her vangddi KKK-che, KHK-cho vice president Joseph D�Souza, kaim staff Kuwait Airways hache, Kuwaitche Igorjecho ani kherit Miss bhettoilolea padricho. Tech porim Catherine Dias ani tichi famil, amche sezari, Bai Thelma ani Bai Diana.
A. Veronica Fernandes, Kuwait.
_________________________________________________________________
The new MSN 8: advanced junk mail protection and 2 months FREE* http://join.msn.com/?page=features/junkmail
##########################################################################
# Send submissions for Goanet to [EMAIL PROTECTED] # # PLEASE remember to stay on-topic (related to Goa), and avoid top-posts #
# More details on Goanet at http://joingoanet.shorturl.com/ # # Please keep your discussion/tone polite, to reflect respect to others #
##########################################################################
