########################################################################## # If Goanet stops reaching you, contact [EMAIL PROTECTED] # # Want to check the archives? http://www.goanet.org/pipermail/goanet/ # # Please keep your discussion/tone polite, to reflect respect to others # ##########################################################################
D' PIETRO: KONKANI BHAXECHO ZUZARI Fankivont Konkani Boroinnar, potrakar ani kadamborikar Bab Bonaventure D'Pietro haka hea vorsacho 'Antonio Pereira Konknni Puroskar 2004' favo zala. Ho puroskar taka Mumboicho, Padri Casmiro D'Mello anik ek vhodd konkani bhaxecho bokht hanchea hatintlean eka vhodd dobhajean Porvore dongrar 'Thomas Stephens Kendre' hanga hea mhoineanche 25ver divpant ailo. Hea dhobajeak tea vellar konkani bhaxeche mogi, namneche boroinnar, tiatrist, Padri ani her Pietro-che borem magpi thuim khub hajir asle. Bonaventure D'Pietrochi hanvem konnak ani kherit ponnim konkani bhaxecheam mogiank ollokh korun diunk zai oxem mhaka disona. Konkani mollar tannem aplem jivit zoroilem, korpailem, ul'pailem ani uchara bhailo vavr korun dovorlo. Heach tachea mahan vavra khatir taka ho puroskar favo zata. Hea puroskara vangdda taka Rs. 25,000/- (ponchvis hoza) duddvanchem bokxis favo zata. Tankam ho inam mevlo dekun zaiteam romi borovpeank khub anond zalo, karann ho inam tankam ani tanchea vavra khatir favo aslo dekun. Aplo faiddo pollenastana ani rinnache dongor ubhe zatat tanchi fikir legun korinastana ho konkani bhaxecho bokht aple avoi bhaxe pasot tan-mon laun dis-rat vavrot ravla ani azun meren vavrot asa. Apli khas arthik poristhiti legun kitli gombhir asa tichi porvakorinastana tannem apleo kadamboreo khudd prokaxit keleat ani oxe toren konkani bhaxecho dorzo vaddonk ani tika unchlo man mellonk aplem jivit korchilam mhonnlear hanv otitai adharchonam oxem mhaka dista. Inam vanttchea vellar aplea uloupan Bonaventure Bab eka ummaleanim bhorlelea kallzan oso udhgarlo :" Ek lekh borounk kivam ek kadambori borounk ek sompem kam, punn ti kadambori prokaxit korunk ek sompem kam nhoi. Zaite pautt mhaka mhojeo kadambori prokaxit kortana eke baunterak pavil'le ostore bhaxen bhoglam. Zoxe porim ti porsud zanvcho vell pavtoch bobo-ueli marun 'naka saiba - anik naka' mhonnta, toslem kitem tori mhaka bhoglam. Punn borovp ani boroilelem prokaxit korop zaun asa mhojem dusrem soimbh, dekun he nimnnea vellar attavitte bhogtat tanchi porva korinastana hanv ekar-ek korun sabar kadambori ani pustokam borovn prokaxit korit ravlam. Zaite zan godiek mhaka 'PISO' oxem mhonnntelet, zo butt laglo tori-i xikon xanno zaina. Punn, vhoi, hanv ek maim bhaxechea mogan piso zal'lo. Mhojea bhurgea ponnar mhaka iad asa, thodde pautt kadambori xaptana, kagda khatir favo te duddu xapkhaneachea mallokak legun diunk mhoje lagin bolsant domddi asonasli. Ani oslea vellar hanvem te duddu ubhe korunk ani mallokak diunk mhojea kaim khasgi legun vostu orddea mallak vikun kaddleat, itleach karonnak ki mhoji kadambori xaponn toer zanvchi ani ti xapkhanneant lovot urona zaunk he nodrent." Bonaventuran konkani bhaxen sabar kadambori boroileat ani inama zoddleant. Zoxe porim, 'Soitanacho Ghutt' 1958, 'Kallea Vistidachi Choli' 1072, Clara, Mhojea Paicho Fondd 1974, From Goa With Love 1975, Terra numbrachi kottri (mottveo kotha) Mog vo Patok 1976. 'Ek Bhett Mungllurche Xarak' 1977, Mhaka Jieunk Diat 1984, Tichea Mornna Uprant 1990, Nazarethkar 2000, ani 'Songit Doulot Goenkaranchi' 2004. Dalgado Konkani Akademi hanchea asrea khala tanchi novi kadambori 'Janya Celi' hea vorsa dezembr mhoinneant uzvaddak ietli. Fuddarak aplem ek atm-choritr (autobiography) uzvaddak haddunk tachi fuddli ievzonn asa. Hantun to Goenchem bodoltem rup ani soimb aplea bhurgeaponnar savu aiz meren dekhot aila tachem vornon korunk axeta. 61 vorsanche piraier tacho mog aple maim bhaxe sovem kosoch komi zaunk nam. Zorui tachi bholaiki zoborxi taka aplo sangat dina ani oskotai ubi zata torui konkani bhaxe pasot kitem-i korunk to aiz meren raji asa. Ek missionar kos to dis rat konkani bhaxe pasot vavurta, mhaka disona amche modem tache sarke zaite asot xe. Konkani bhaxe vixim uloun to oxem sangta " Avoi bapaini apleam bhurgeank konkani bhaxen borounk ut'tejon diunk zai. Tannim vavrun konkani bhaxen borovp korunk goroz, borovp sam'manea lokank manvota ani somzota toxem asunk goroz. Oxe toren konkani bhas soglleank avddichi korunk zata. Konkani bhas amchi khori osmitai, zorui tor ti ami vibaddli zalear sogllem sandtellem." Bonaventure Pietro Babak sogllem borem ies anvddetam. Daniel F. de Souza. *********** Daniel F. de Souza Konkani Writer & Freelance Journalist C/3, IInd Floor, Elvira Apts, Vasco - Goa 403 802 INDIA. Tel: + 91-832-2510714 Mob: 9822163329 e-mail :[EMAIL PROTECTED] :[EMAIL PROTECTED]