Goenkar : Goeantle ani Goeambhaile ? Uday Bhembre Goenkar ho Goeant aslo vo Goeambhair aslo, tori to Goenkar! To ek kherit bhaxecho pranni! Her mon'xam bhaxen to nhoi. Mon'xank je nem' lagu zatat tea nemank to addvadd! To toso koso ghoddlo, hem ek kuvaddem. To sudorna kiteak, henvui ek kuvaddem. Jawaharlal Nehru-chea tempar to 'ojib' (ojapacho vo vichitr) aslo. Aizui tosoch asa. Ghoddie, bodlop nam ani sudrop nam hench Goenkarponn oxem to man'ta! Goeantlea Goenkarachem Goenkarponn odik ghottmutt astolem, oxem konnakui disum ieta; punn toxem nam. Goeambhailea Goeankara itloch Goeantloi Goenkar 'ojib' asa. To sasnnacho tosoch urtolo kai?! Goeantlea Goenkaranchi bhas ek. Punn sogle Goenkar eke bhaxeche nhoi. Zaite Goenkar asat je apnnale nizache maibhaxek vollkhonant. Te Moratthik apnnali maibas man'tat! Tankam Moratthi bhas sarki borovpak iena, uloupak iena. Te ghorant, angnnant ani bazarant Konknnich uloitat. Konknni bhas uloupak ieta te toren tankam dusri khoinchich bhas uloupak iena. Tori punn te Konknnik maibhas manunk toear nant. Te Moratthik maibhas man'tat. Census ieta ten'na apnnali maibhas Moratthi oxem sangtat. Ti bhas sarki uloupak iena dekhun te Maharaxttr rajeantle uloupi haddttat ani tanchim uloupam aikun tallio martat. Te Maharaxttrantlim nattkam haddttat ani tim polloun khoxi zatat. He Goenkar Goenchem vegllem raj'eo naka mhunn Maharaxttrant vochpak sodtale. Ten'na te pixe zal'le. Aiz xanne zaleat. Goeantleo kodeli bhogtat. Maharaxttrant vochpachi bhas aiz uloinant; punn Moratthicho denvchar tanche gomtter bosla to tosoch asa! Anik kaim Goenkar asat; tankam Konknni bhas uloupak loz dista. Purtugezan tankam firngi korpacho iotn kel'lo. To odik folladik zalo. Te orde firngi ani orde Goenkar zaleat. Purtugezank lagun tanchi toxi doxa zali. Punn te bodlunk vo sudrunk sodinant. Goenchi suttka zaun 43 vorsam zaleant. Iotn kel'lo zalear te Konknni ulounk pavtole asle, khore Goenkar zatle asle. Punn tem korpak te toear nant. Tanchi novi pillgi tor puraien firngi zavpak sodta! Adli pillgi kriadam kodden tori Konknni uloitali. Nove pillgen kriadankui firngi bhas xikoilea. Konknni bhaxechi gorozuch poddona! Anik kaim Goenkar asat. Tannim Monsenhor Dalgado hanchem iadostik korpak sonstha kaddlea. Punn te Mons. Dalgadachea motak valor dinant. Tea motache add uloitat. Te Mons. Dalgadacho opman kortat. Tori punn tanche sonsthek Mons. Dalgadachench nanv! Tacho atmo kitem bhogta tem toch zanna! Goeambhailean ievun Goenkar zaun ravtat tevui osleach Goenkaranchi dekh ghetat. Te apnnale sonsthek Fr. Stephens hanchem nanv ditat. Punn tanchem mot kuxik dorvrun dusroch prochar kortat. Fr. Stephens-acho atmo roddtta kai hansta konn zanna! Goenkaranchea rajkaronnant makodd ani xedd'dde hanchoch bovall! Konn ken'na koxi uddi marit ani konn ken'na rong bodlit tem sangunk zaina! Hem Goenkari rajkaronn sonvsarant konnakuch somzona. Tea rajkaronnant fokot Goenkar fixal! Goeantlo Goenkar ho oso. To dis-rat aplem rupnnem bodlunk sodta. Niz Goenkarponnak unnak lekhta. Tori apnnak Goenkar mhonntta! Goeambhaile Goenkar hevui ek bhaxeche nhoi. Te oxe: - Goeambahaile punn desantle Goenkar - pordesantle punn porot ievpache Goenkar - pordesantle sasnnache pordexi zal'le Goenkar. Goenkar punn amchea desant ravpi Goenkaram modim choddxe Goenkar Mumboi xarant ravtat. Hindu toxe Kristanv. Punn dogainche sonvsar veglle. Goenkar mhunn ektthaim ievpacho soeg nam. Hindu Goenkar orde Maharaxttri'eo zaleat. Kristanvam modle thodde 'firngi' zaleat; punn choddxe zonn Goenkar urleat. Mat tancho ankddo unno zait gela. Toxe Mumboi xarant lakhamni Goenkar asat. Punn tancho ekvott nam ani avaz nam. Maharaxttr sorkaran tanche pasot kaim korunk nam. Goenkaramni-i kiteim zhogddun gheunk nam. Magunk legit nam! Lata Mangeshkar apnnak "Maharaxttr-konea" mhonntta! Ani Hindi filmam kaddpi lok Goenkarank bebde vo randpi mhunn vollkhotat. Tanche nodren Goenkar bail xindoll! Mumboi xarant Bollywood asa. Ani Mumboi xarant oddech-tin lakh Goenkar asat. Punn avaz nam. Dekhun Bollywood adle bhaxen aizui Goenkarachi abru kaddit asa. Gulf-ant kam' korunk gel'le Goenkar he pordesant ravpi Goenkar. Punn te porot ken'nai tori Goeant ievpache Goenkar. Te ievun-vochun astat. Goeam koddlem natem samballun dovortat. Goeant jem bore-vaitt ghoddtta tacher tanchi nodor asta. Chodxe zonn Konknni bhaxecho obhiman dhortat. Thoddech konnui 'firngi' zavpak lagleat. Tanchi novi pillgi Konknnik vollkhona. Gulf-ant azun lokxai nam; thoim shaikh-xai cholta. Lokxai iet zalear ani sodankall ravpak mellot zalear amche Goenkar ghoddie thoinch ravtole. Magir tanchem kitem zait tem aiz sangpak zaina. Evrop, America, Canada hea vattharamni-i zaito Goenkar ravta. To "pordexi Goenkar" zala. Mhonnje, to porot ievpacho nam. Tachem Goenkarponn chodxem nam zait gelam. To fokot zolman Goenkar vo tacho purvoz Goenkar. Sonskrutaieche nodren to doria poltoddim pavla, pois pavla. Amerikentlea Goenkaram modim Hindu asat toxe Kristanv asat. Tancheo dogaincheoi veglleo sonstha, veglleo porixodo! Ekvott nam. Kaim vorsam adim hanv Orlando xarant Goenkaranche eke porixodek hajir ravlom. Thoim sogle Hindu; ekui Kristanv nam. Oxem kiteak kai mhunn vicharlear zap mell'lli: "Tanchi rit veglli." Oxe amche Ameriki Goenkar! Dhormachea nanvan vanttil'le! Oslea vegllecharant Goenkarponn asta kai?! Kaim protinidhink hanvem vicharlem: "Tumi dor don vorsamni oxe ektthaim ietat. Tin dis ektthaim ravtat. Hacho mukhel haves kitem?" Zap mell'lli: "Ami vegvegllea vattharamni ravtat. Ekamekak mellpak pavonant. Oxe ekttaim ietokuch pottbor Konknni ulounk melltta." Pottbhor Konknni! Porixodechem tinui disanchem kam' Inglix bhaxent chol'lem! Hea Goenkaranchem Goeam koddlem natem patoll zalam ani odik patoll zait vota. Atam tanchi itsa Goeant poiso invest korpachi; te pasot tankam facilites mellpachi. Zancheo don-tin pillgeo pordesant geleat te Goenkar tor odik pois geleat. Azun te apnnak Goenkar man'tat hi amkam khoxechi kobor; punn tanche modim Goenkarponn kitlem urlam ho sonxodhonacho vixoi. Sollavea-sotravea xenkddeant je Goenkar Kornattokant, Kerollant vochun ravle tannim Konknni bhas samballun dovorlea. Tori tankam ami "Goenkar" mhunn pacharnant. Tankam "Kornattoki", "Mongllurkar" vo "Kochikar" mhonnttat. Evrop-Amerikentlea jea Goenkaramni Konknni bhas ani Konknni sonskrutai soddlea tankam sonvsar "Goenkar" mhunn kitloso temp vollkhotolo! Oxe ami Goenkar! Goeantle ani Goeambhaile!!