Internet, Boro Upeog Korcheak ani Nhoi Electronic mail (e-mail). Dhadop ani svikar korcheak tuka porvoni dita. Ghoddie bhitor sonvsar bhor ximpoddlea ixtt-mitrank, soireank sondhex pavtta.
Tujo e-mail id vo potto novo kortana vo ditana, tujem nanv purem diun kelear odik faideamchem zata. Tujo e-mail svikar kortolo soiro vo ixtt tuka vollkunk pavtta. Tujo e-mail vachlea upran zap divnchi aslear to vo tem soroll dita. Monant dovorchem. Internet-cho upeog borea kamakuch korchelo asta. Punn kaim zann aplem sota nanv lipoun vo ghomoinastana e-mail dhadun ditat. Osle monxeanim khub zanachim nanvam vibadleant ani vibadit asat. Kaim mhoinem fattim zalli gozal. Mhojea ixttachea dhuvechi soirigot osleach bonavott e-mail-ik lagon thoddli. Konnem tori, kazarak tin dis asat mhollear ixttachea dhuvechea novreak e-mail dhadun dilo. Novrean fattim fuddem vichar korinastana ixttachea dhuve thaim logn zhoddunk noikar dilo. E-mail oso aslo. Thoddeach sobdanim sangtam. Tum kazar zatolea cheddvacho novro hanv. Tacher hanvem lingi mog (sex) kelam. Tuka khatri zai zalear tachea uzvea zhangdar zolmacho dhag (birth-mark) asa Khorem mhollear tem konnacheach mogan naslem. Tannem khoimcheah dadlea thaim lingi sombond zhoddunk naslo. Uzvea zhangddar zolmacho dhag asa, hem sot. Mhojea ixttachi dhuv Goa University-n astana Inter State teach porim National level vo mollar pevopa (swimming) khellant vo sport-ant poile zage samballun bhagaracheo meddali favo keleat. Mhonntokoch pevnnim vellar tannem swim-suit ghalchem aslem ani tem gatokoch tachea uzvea zhangddar asleli zolm-khunna nigutt distali. Nir-opradhi cheddvachem nialltanam kaim vorsam ghoddunk gelele khobrecher hanv guspolam. Pavs, gim, thonddeocho kal polle nastana hanv bhaimcher udok nhatalom. Ritelo kollxo bhaimchea katthar (edge) dovorlear, bhaimcher ietleo sundor nari (ostoreo) to bhorun ditaleo. Hanvem-nui bhi muddom tannim udok vorunk ievnchea vellaruch bhaimcher nhanvunk ievnchem aslem. Udkache tin-chear kollxe angar votoilea uprant lifebuoyy na tor tarvoti maman dilolo camay sabu launcho aslo. Foreign sabu angar lailo mhonnttoch tacho pormoll sorbhovntim pavtalo. Ani udkak ailleo xezarcheo nari camay sabuvachea pormollak vollkun vichartalim, Durbath-cho tarvoti mama aila kitem re? Goemchea suttke uprant bhangara sarkelem Goem udhorgotichea margar proves kortalem. Vorsam sortat tea pormonnem amchea ganvchi udhorgot zavnk lagleli. Poili bizli aili. Vhadea-vhadeanim chok-chok zalo. Fondkulanim bebkam ravtelea thambde matiechea rosteank damoran nhettoile. Soukas, soukas xezarchea lokanim ghorant udkache noll bosoile. Adle toren baimchem udok ghoranim bhorchem thoddem zalem. Ponn hanvem mat udok nhavpachem soddun divnk nam. Udkacho noll ghorant bosoileleak choddxeo nari bhaimcher ie nasleo koreo, punn xant tilsanim vellar chakr-acho kri-im, kri-im avaz ietalo to mat tanchea kannar bostalo tedna, hanv kunwara bhaimcher udok nhatam mhonn tankam ghomun ietalem. Vaddeantli bhaim mhollear tednachem ostoreank ek khobramcho mand aslo. Bhaimchea bazun aslelea mottea fatracher mhelle kopdde ghansun nivoll zatale tech toren ganvantlea lokamchim mhellim kortubam thoddeo ostoreo horamchim horam kimticho vell vibadun bhaimche dheger chakatam (gossip) korun nigut kortalim. Ani atamchea adhunink kalar telefon kivam internet vaprun ghorantuch boson borea monxanchea nanvamcher e-mail-i vealean chikol martat. Internet-achi sovloti nam tankam ganvchea tinttear xerox copies vantunk khas monis dovorlele asat. Eka sanjer nollak udok naslelean xezarchem Perpet tambeacho kollxo ghevn bhaimcher ailelem. Tem ek gorvist cheddum. Sodham porim hanv udok nhavunk ailolom. Bhaimcher ietlea dusrea narim porim, magelo ritelo kollxo Perpetan keddnanch borun divnk naslo. Tannem tambeacho kollxo bhaint dhenvoilo ani udkan borlo teddna razuvachi ghantt soddoll zaun kollxo bok-bok korit bhaimche dornnir vochun ogich budon ravlo. Mummy boballteli, marteli, jiv kaddteli mhunnit Perpetachem roddlem suru astana thoim mhoji mogachi ixttin Aida pavun sorlem. Akhantachi poristithi Perpetachea jivar ailli pollevn Aidan mhaka poratlem. Fokot Aidachea vinontek lagun ekuch udkhi ghevn bhaimntlo kollxo voir haddlo. Upran mhoji ani Perpetachi ixttagot zali. Gavantlea kazarank, tiatrank, igorjechea karriavollint ami sangatan bhag ghevnk laglim. Amchim ixttagott pollevn konnamcheo tori dolleamcheo pakkoteo niddukaen korzunk lagleo. Lino ani Perpetachem borem chollta go, eke sanjer bhaimcher aille koden Melisan, Tolluk sanglem. Oi go! Bhaimnt poddlelem bindun kaddle meren thavn dogaim ekdom datth zaleant. Poilim tem, taka keruch kori naslem Tollun aplem uzrailem. Poir tedus maddachea kovlean ravun render Dhilipan, Perpetachea polkean Lino-n hat ghalolo distuch pollelo khoim. Ani ho vichar korunk tumi dogaim mhojea barrabor render Dhilipagher ievnk toear asat? Bhaimcher udok vorunk ailele koden tancheo fottkireo gozali Aidachea kanar bosleo tedna tannem tankam tiddken vicharlem. Fuddem zap kaddi nastanam dogaimnim aple kollxe handir marun chollot ravlim. Justuch vellar mhoji ixttin Aida thoimsor pavon, tea sanjer anikui amchea nanvachi ghann zaumchi vattaili. Ani zori tor tich gozal aichea kompuitor kallan zaleli zalear Melisa-Tollu aslelim Milagrina/Tulip zaun electronic mail-i adharan sokoil aslele toren aplea ixtt/ixttinnink kinam bhitor e-mail pattoun dita aslim. Vaddeantlea bhaimcher ietlea kombeak atam Perpetachi bhaim bori laglea. Ievtin-tevtin heddun, tilsani vellar Perpetak ghora pavoitana tigelea polkean hat ghalolo justuch render Dhilipan dorla. Favo tea vellar favo teo vostu mhonn sangpi Boro Samrithan, kaddlolim khainam, fokot; zhadd piki folam kavnk soddta. Hea kombeak Filsu timain (Perpetachi avoi) ghor-zanvoim korunk khuxi dakhoilea tea meren ho kombo kazara adinch Perpetachea durgacher choddun sad ghalta Mhoji bori xist ani vagnnunk zanam aslelem tednachem mitr Aida-n, paddeleo khobro kortelea lokamchim tonddam bondd kelelim. Zalear aichea digital khobro posraitelea render Dhilipa sarkelea maddachea kovllan (vach: internet-ar) lipun ravun zanktoleak konn vichar kortolo? Taka khoim soddtolo? Mellot mhaka Aida osli ixttin vichar korteli? Xevottak innocent monxeachim nanv piddear mu? Ani nimnnem. Tumkanch mhunn sangtam. Tornne piraer hanvem lapitponnam keleant, punn mhoji nirmolai (virginity) hanvem kazara ratik sompoileli. H-a-m .!!!! Lino B. Dourado CHOTRAI: Aida-chi odik mahiti mellunk vach http://goanet.org/post.php?name=News&list=goanet&info=2005-June/author&post_id=029452 http://www.goa-world.com/goa/poems http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado __________________________________________________ Do You Yahoo!? Tired of spam? Yahoo! Mail has the best spam protection around http://mail.yahoo.com
