Zoxem Mhaka Toxem Tuka Govachem jivit sufoll asot zalear eke ghorkanink sukhachim kirnnam varear khelltelea patanga porim. Thoddeo seguni ostoreank Devachea fattlean dusro dev mhollear tancho ghorkar. Sukhan toxen dukhan, bolaikent toxem piddent logn disa getillo visvaxponnacho soput tankam sodanch mogan ani ekvottan samballta. Ani tantuntli ek ostori mhollear amche ixtt Lapita-chi, mogall potin.
Kaim dis fattim, voizachea sangnnem pormonnem Lapitachea rogtan unchli chorbi (high cholesterol) sampodlelean, tachea bailen tagelea piepa-kavpachea vostumcher koddok tabo dovorla. Thodde dis adim chorbi aslelem zonovorachem mas kaun choddan chodd Goenkar kallzachea duensak bolli poddleat hi bhatmi Goeamchea eka dissalear vachinam fuddem, Lapitache bailen zonovarachea masak ghorant haddchi bondi ghatli. Ani fokot nistem ani torkari kuznant xizunk ghor montrean (Lapitachi bailen) kaido pas kello asa. Ghorchea kama pasot Lapit tea disa sokallcho Ponnje gello to, sanjer sat vazttam ghorant bhitor sorlo. Ghora ievnche vatter, Verna-chea tintear apli skuttor thamboili ani Sal nodintle taje tigur ani pitol mhonnlelem nistem vikot ghetlem. Bailechea hatant nisteachi teli ditana tonddan udok hadun tigurachem ambot-tik koddi ani pintol nistem tellan tollsupak ruchin sanglem. Sodamchea porim jevnnam adim Royal Stag whisky-che peg ghonttana Lapitachi bail tachea sorxim ievn, tea disacho (18th August 2005) Heraldo potr tache hatant dilem ani panchvea pannar (Do your heart a favour, avoid eating fried food! ) ailli khas bhatmi vachunk taka suchoilem. Punn Lapit, adlea disa Bangladeshan 400 bombache sfott zaleli TV veli bhatmi, dolle kaddinastana polletalo. TV polletana jevnnachi toeari zali mhonn bhitorlean mottean avaz ailo. Jevnnachea meza sorxim bosun aidonan aslele ambot-tik koddiecho pormoll nakan guson tachea tonddan udkam ailim. Vell piddear korinastana tattan xit getlem ani gorom-gorom ambot--tikantlem nistem gheunk mhonn koddiechea aidonan kuler ghatlelem tedna tigur nistea barrabor pitol nistem kuleran ailem. Hanvem tuka sangillem fokot tigurachem ambot-tik korcheak ani pitol nistem korkorit tollpak. Kitem kai mhollear Lapitachem sangnem sompchea adim tinnem mhonnlem. Tujem hatan aichem disalem dilelem. Aichea disaleak ani nistem tollpak kosle sombond asat? Poir fattim, tuvem mhojea thaim amchea timanachea cheddo Davidachi khobor ghetleli. Aiz, Kuwait-chea Sabha hospitalant Coronary Artery Bypass Surgery (CABG) kelea khoim. Tujeach porim takai masam ani telacheo vostu posond asleo. Alisanicho ghov, Albinank vollkotai nhoi? Dukrachem mas ani hirvim (raw) chevrisam mhollear nidhentlo utthun khatalo khoim. Kallchea Budhvarak Moddganvchea Apollo Hospitalant tacherui Carotid Angioplasty zalea. Haka hem zalem, taka tem zalem mhonn sangta tem monxean keddna-i tori morunk zai nhoi? Mhojo dis ietlo hanvuim somptolom. Sonvsarantle thodde dis urleat te khavn-pievn sukhan sarum-ia. Tujea arogyachi kalzi, hanv kiteak samballtam tem sanglea viret tujea jinnenk soukaxai ievnchi nam. Devan nirmum naka. Tuka kitem-i vaitt zalear tujea xivai hanv ek oroneant sandleli pranni zatli. Tuji savli zaun asa mhojea jivitacho svas. Sonvsarant prannvayu (oxygen) vinem khoimchoch jiv thogona tech toren tujea kuddichi ub naslear mhojean jievnk zaunchem na. Hakach lagun mhojea jiva von, tujo poramus korun bolidan kortam. Puro. Puro. He tuje sonvadh (dialogues) khoimchea-i ektea tiatr vo nattok borovpeak di. Machier bore sobtele. Tuvem mhojea vicharak zap dili na. Nistem tollpak ghorant telacho unnav zala.? Namneche (eminent) Moddganvchea Apollo Kospital-antle cardiologist ani Director Cardiovascular Science Dr. Uday Khanolkar-n, tolllelem nistem khavnchelem sapuch chukovop ani kallzachem duens komi korchea sombodim Goenkarank koddok xiddkavnni diun aplo vako (report) aichea disalear dila. Teach porim Chief of Cardiothoracic and Vascular surgeon Dr. Atul Maslekar-an 3500 odik kalzacher operasanvam keleant khoim . Ani hench karan hanvem nistem na tollpak ani nhoi telacho unnav tum somzota tea toren. Hea vellar tichea tondank lagchem mhollear akkhi rat zagrutechi zatli hea monan dourun Lapit moneaponnan aplem jevonn sompoun tiddken, thoimsorlo koddsorun kuddant veta. Kaim vella uprant Lapitachi bail kuddant bhitor sorli zalear Lapit udhas koxo zaun khattir bosun aslolo polleta. Tachea morean ievn, tinnem mhonnlem. Polle hanvem kitem kelam ani kitem kortam fokot tujem chintun. Precaution is better than cure. Bolaikechi budd dinaranim sanglelem asa. Zhoddar poddchea adim, ami mulhakuch amchea arogyacher niontron dovorlear odik borem zatlem. Lapit-an zap kaddli na. Ti somzoli tachem ogeaponn. Rag ieta tedna to kosoch ulounk sodhina mhonn ti bhes bori zana asta, dekhun taka durea chali velean somzavpak tachea tokle fatlean hat ghalun tachi man aplea xatier vornnun dorun mhonntta. Bhurgea porim boncho vankddo korun bosum naka. Choll vegim, zallea kamank vell ibaddcho nhoi. Kitlech dis somple hamlet bazlear. Tovo taplolo asa. Zori tor tum mhojea arogyachi khupuch kallzi gheta zalear hanvem tujea khatir kitem tori korunnk zai nhoi? Tichea choddillea lingi umedir vozon ghalun Lapitan apli bhavna (feelings) tigelea hoddddear hat boundaun mhonnlem. Okosmat tachea sobhavachem bodlop pollevn tichea kuddintleant umedicheo xirio khottkhotttunk lagleo. Nhesleli pordoxok (transparent) nightie anga veli mekhlli keli ani khattir udhari nhidli tedna Lapit khattivelo utthun thoimsorlo koddsortana tinnem vicharlem Kitem zalem? Tum khoim vetai? Hamlet bazinai? Sorry mam. Hamlet bazunk mhojea kodden, telacho unnav asa Lino B. Dourado http://www.goa-world.com/goa/poems http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado ____________________________________________________ Start your day with Yahoo! - make it your home page http://www.yahoo.com/r/hs
