-------------------------------------------------------------------------- | Add your name to the CLEAN GOA INITIATIVE | | | | by visiting this link and following the instructions therein | | | | http://shire.symonds.net/pipermail/goanet/2005-October/033926.html | -------------------------------------------------------------------------- Kitlem Sot Asa?
Mhoji avoi somplear aiz chovtto dis. Hanvem khoim bhair sorchem nhoi mhunn mhojea home minister-an (bailen) khattivelo uttchea adinch mhaka hokum ghatlolo. Adlea tin disank sanjechea justuch 7.30 horamcher ghorchim-xezarim ekvottun ghorant ters-magnneank survat kortalim tea vellar chukoi nastanam hanvem hajir zaunk zai aslem. Orxim chodd magnnim korun hanv fattim, punn avoicho mog hea dukhest disanim ters-magnneank mhaka lagim kortalo. Mornnamcho chovtto dis mhonntoch donparchea bara horamcher ghorant ters-magnnem astelem mhonn adlea disak tersak ailelea soiream-xezareank kolit kelelem. Khorem mhollear mhojea avoik borem mornn favo zallem. Ti sompchea adim, tinnem nimnnem kumsar-povitr sonskar ghetlele. Sasnachea voimkutant vochunk tika anik magnneachi goroz nasli oxem hanvem mhoje sundorek sangillem tedna tinnem somzonichea avazan mhonnlem. Ghoddie tum sangta tatunt sot asot. Punn amchim magnnin bekar vo funkott vochonant. Tichea nanvan, konn naslelea Purgotorint lastelea atmeank tori pavtelim. Devosponichi gozal zalelean, avoichea moga khatir hache voir anik bhasabhas keleli mhaka naka asli. Pavla konnkonni sonvsarak adeus korun monis pranni vetat. Borem kortat te sorgar vetat ani vaitt te nokrant (infernant) vetat hem ami lhan ponnim aikun ghetlam. Melolo monis khoim veta hi gozal hanv korinam ponn meleleantlo tisrea disa Jezu Krist jivont zallo mhonn amchea Kristi povitr pustokar vachunk mellta zalear ho choutto dis palltat to tisro dis zaunk zai aslo nhoi? Ho prosn mhaka bejear kortanam mhoji sundori khattimxim kofi gheun aili. Choll utth. Kofi pie. Vincent (mhojo dusro bhav) bazarant vochunk ravtta. Kofi-chem mug mhojea hatant ditanam tinnem mhonnlem. Punn kal ami bazaar kela to .. Tumkam dadleank kainch ek somzonam. Aiz ghorant soglench fresh randop zaunk zai. Ghe hem shopping list ani Kansavlechea bazarant vochun ieat Donparchea justuch bara horamcher ters-magneank survat dili. Ek bori karnnim mhaka avoddli. Soirim-xezarim sanglelea vellaruch hajir zaun magnneank survat ditalim poi ti. Poilech pavtti hem sogllem hanv onnbhovtalom. Amchem kuttumb sov monxeanchem aslem. Avoi-bapui ani ami tanche ekvottache choug put. Amchea modli Deva ghora vochunk amchi avoi poili asli. Hea adim hanvem oslem kaim onnbhovunk nam, mhonnonuch dukhest dis holmotanam vhoddilam kitem sangtat tem hanv mhojea tonddak chavi korun ogoch ravun, tanchea utrak pall ditalom. Sanjechea tersak ordem hor ghetalim punn chear disamchea khas tersak dha minutam odik ghetleo. Nimannim magnnim mhonnonk mhojea bapaichea bapul bhoinnin survat keli. Katkutsara Deva, Tujea thaim ami vhodda mogan magtaum amche bhoinnink Tujea rajean suat divnk. Aiz, amchi bhoin sompun ghelear chear dis somptat. Aiz tichea zhoddtechea disa ami prantunn magtanv . Zhoddtechea disa? Hanv tonddanduch pirgovlom (murmur) ani mhoji thokli volun dhavea bazuk ubi aslelea mhoje sundorek polloilo tedna tinnem aple dolle motte korun ogoch ravunk mhaka xiddkailo ani mhoji thokli porot zagear haddun hanvem altarint aslelea Saibin ani Santanchea murticher nodor marit monantle monan hanvem mhakach vichar kele. Choutea disak monsubi? Khoimchea dhorm pustokar boroilolem asa kai? Monis melea uprant tanche atme poile tin dis khoim heddttat asot? Jivit ani mornn heo don gozali monxachea hatant nastat zalear tanchi monsubi vo zhoddtti chouttea disa zata mhonn monis koxo kobul korta? Hem evjitanam mhaka sokallchea vellachi iad aili. Ghorant sap-safai nettan cholltali ti pollevn melolo monis porot ieta kai diso. Bazarant thanv hadillleo vostu kuznant vhoddlea ujear xiztaleo tem pollevn melllo monis jevnank pavtolea porim distalem. Oxo hanv mhojea chintnachea somdirant astanam mhojea bapaichea bapul bhoinnichem magnnem chaluch aslem . Dhonia Bapa, Tuvem amche bhoinink, Tujea sasnachea ghorant suseag dilo hea Tujea upkarak ami kallzan thanv dinvastanv ani Dev Borem Korum mhonntanv Hanv kuk korun hanslom. Sogott mhojea islean mhakach pollenvk laglim. Mhojea bazuk aslele mhoje sundoren ek nibran davea hatak chimtto kaddlo. Hea chimttean mhojea avoichi iad keli. Bhurgo astanam aimori, ters kortanam hanv sodanch avoichea khuxik ubo ravtalom vo bostalom. Ters-magnnem cholltana modench uloilo vo hanslom zalear ti heach toren mhojea hatak chimtto kadi. Aicho chimtto mhojea avoicho nhoi punn bailecho aslo. Amchea kazari jinnen mhoje sundoren keddnach chukun vo moskereanim pasun mhaka hea adim chimtto kadlolo nam. Punn aiz? Avoi kaddtali te toren tinnem chimtto kaddlolo tem mhaka niall korpa sarkem aslem. Khorench kai chouttea disa atmea sonvsarant ietat? Ani heach khatir hi toeari? Mhojea hatak chimtto kaddunk bailechea kallzak boll konnem dilem? Hanspachem karan tika sangtokoch tinnem ozar pavtti sorry magli. Tichi chuk nasli khori punn toxem korunk tika boll koxem ailem? Hem chintunk mhojim kolponam pavonant. Tea khatir mogall vachpea, Zori tor tuka mornnacho choutto dis kiteak paltat to, odik bariksan asot zalear upkar korun mhaka, mhojea e-mail pottear kolit kor mhonn nomrutaien magttam. Visorchea adim. Mhojem hanspachem karan mhollear bapaiche bapul bhoininn mhoje avoichea atmeank sasnacho suseag magttanam tinnem Devakuch Dev Borem Korum mhonnttlelem mhonn mhaka hasunk ailem. Lino B. Dourado http://www.goa-world.com/goa/poems http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado __________________________________ Yahoo! FareChase: Search multiple travel sites in one click. http://farechase.yahoo.com
