-------------------------------------------------------------------------- | Goa - 2005 Santosh Trophy Champions | | | | Support Soccer Activities at the grassroots in our villages | | Vacationing in Goa this year-end - Carry and distribute Soccer Balls | -------------------------------------------------------------------------- OGRLEKH
Konknni mogiank khas korun Romi lipient Konknni borovpeank ani vachpeank amcho maie mogacho nomoskar. "GOENCHO ULO" hea pondralleacho dusro ank tumchea hatamni ghaltana amkam khub khos bhogta. Romi lipientle Konknni bagent ani ek ful fulta. Romi lipientlea Konknni mollbar ani ek noketr udeta. Hem ful odik pormollunk, hem noketr odik porzollunk tumchea sohokarachi khub goroz asa. Ho tumcho sohokar amkam jerul melltolo mhonn ami as ballgitanv. GOENCHO ULO hem potr zolmant haddpak karonn kitem? Goenkar, Goeant ani Goeam bhair asat te, azun porian Romi lipient Konknni bhas vachtat. Azun poriant Konknni bhaxecho mog ani umallo tanchea kallzamni asa. Ho Konknni bhaxecho mog ani ho umallo Goenkaram bhitor jivo urlearuch Goeant Konknni bhas urtoli ani Konknni bhas aslearuch amchem Goenkarponn astolem. GOENCHO ULO hem potr Goenkaram bhitor Konknni bhas ani tiche vorvim Goenkarponn okhondd korunk proitn kortolem. Konknni bhaxek ek ithias asa. Romi lipientli Konknni bhas hea itihasacho ek motto bhag. Konknni bhaxechi udorgot Konknniche Romi lipientle buneadicher adarloli asa. Hech buneadicho adar gheun ami Goem rajeant Konknni bhaxek ticho manacho zago melloun gheunk chollvoll keli ani zoit melloilem. Punn khottea noxiban Romi lipientle Konknni bhaxecher add nodor ghali. Haka lagun Romi lipient boroitoleank ani vachtoleank khub luksann zalem hantum matui dubav na. Romi lipientle Konknni bhaxek favo tem sthan ani man mellounk, Romi lipient Konknni bhas boroitoleanchi ani vachpeanchi seva korunk hem nemallem zolmak ailam. GOENCHO ULO hea nemalleachi bhas sarki sompi ani khoincheay Goenkarak somzota tosli astoli mhonn sangpak amkam khos bhogta. Amchea sadea jivitant ji Konknni bhas ami uloitanv, ani ti uloun dadhoxi zatanv, ti bhas hea nemalleant ami vapurtoleanv. Konknni bhas borovpache nem' monant dhorun ho vavr ami fuddem vhortoleanv. Hem nemallem vachtana tumkam tem aplench potr koxem disunk zai, hem amchem intesao. Hem intesao monant dovrun hem potr amchea jivitacho ek bhag korunk amche proitn astole. Amche Goenkar, Goeant asat tache poros chodd, Goeam bhair asat. Bharatachea anek prantamni ani sonvsarachea anek desamni te ximpoddlole asat. Hea sogllea Goenkarank ekvottit kortolo zalear ekuch upai asa ani to mhonnlear Konknni khatir Romi lipi vapurchi. Sonvsarachea chearui kon'xeamni ximpoddlolea Goenkarank Romi lipi bhes bori eta hantum dubav na. Hoch faido gheun Romi lipi Konknni khatir vaprun Goem ani Goenkaram bhitor sombond odik ghott korunk ami vavurtoleanv. Konknni monis Bharotachea chear prantamni ximpoddlole asat. Te Konknni bhas Romi, Devonagori, Kon'nodd, Farxi ani Molyallom lipiamni boroitat. Konknni bhaxechi udorgot ekvottan korchem kam Romi lipi vaprun borem korum ieta. Soglle Konknni porjek ekvottit korpachem GOENCHO ULO –chem soponn asa. Hem soponn sakar korunk ami pott'tiddkin vavurtoleanv. Tea xivai GOENCHO ULO Goenchea rajki, somajik, dhormik, xikhxonnik, sonvskrutik ani heram mollancherui apli xidduk nodor dovortolo. Sotak ani nitik xabaski ditolo ani fottik ani onitik virod kortolo. Dhoveak dhovem ani kalleak kallench mhonnpak amkam obhiman bhogtolo. Goenkaram modem, disan dis thoddo zait veta to Konknni bhaxecho mog ani disan dis viron veta tem Goenkarponn samballunk, tem odik fulounk ani follaunk GOENCHO ULO pramannikponnim vavurtolo mhonn tumkam bhas ditanv. Hea vavrant tumcho sohokar astolo mhonn amkam khatri asa. Romi lipientle Konknni bhaxeche sevent tumi-i hat bhar galtoleat mhonn ami as ballgitanv. Zoi Konknni! Zoi Goa!! Zoi Bharot!!! Tomazinho Cardozo ----------------------------------------------------------------------- * G * O * A * N * E * T *** C * L * A * S * S * I * F * I * E * D * S * ----------------------------------------------------------------------- Spread the Christmas cheer - even when you're not here! Send Christmas Greetings to your loved ones in Goa. 2005 Christmas Package - Flowers, Bubbles and Layers of Love. http://www.goa-world.com/expressions/xmas/ -----------------------------------------------------------------------
