Bil, Bil, Bilam Fantoddeachea sopnant, kolejichea kanteenant konn eke cholie sangata chav pievn bil farik korchea vellaruch rumantlea fonachi bell vazli. Boreaxea sopnant ghuspololo astana fonan nhid zagoili mhunn, Lapittachea toklek birbiri marli. Vaztolo fon ukhlinas-tana dusre vatten tondd vollun aikunk naslelea porim porot sust nhidlo. Fon ukhlina to pollevn bazuk nhidlele Lapittache bailen aplem purai kuddichem vozon tachea hodd'ddear dovrun beddi-chea lagsor aslelea mezavelo fon ukhol'lo. Hello konn uloita? ... Konn Lalita?... Good morning. Itlea sokallim fon? Koxim asat?.. Mhaka khobor na. ...Oi.? Age mhoje maim!!! Khorench sangta tum..? Thank you go . Taliganvche bhoinin fonavelean dileli taj'ji khobor ghorkarak sangchem oxem tika dislem ani mhonnlem. Aikolam tuvem? Fonar boballtalem tem tum. Hanvem kitem aikolam? Lalita sangtalem bil ieta mhunn? Anik bil? Lapittacho gollo fugar kelelea porim zalo ani ekach khinnant nhidentlo zagovlo ani bedd ir boslo. Kalliz dhodd-dhoddunk laglem. Kaluch bizle-udkachem, fonachem, bhurgeanche tuition fee -iechem, dudachem, ghorant safai korunk ietle ostorechem ani her barik-sarik bilam farik keleant. Nigteach poddlolea sopnant porian tannem bil farik kelam. Anik khuinchem bil sokallim fuddench ubem zalem kai? Oso to chintnamni fugar zaun tacho blood pressure voir choddta astana tache bailen mhonnlem. Lalita iet'lem khoim. Tachea barim hanv Verna vhetelim. Tuji addkholl naka. Tuka khobor asa mhoineachea hixeoban kaluch hanvem soglim bilam farik keleant. Atam tum khoinchea bilachi gozal kortai? Bilam? Tim, tum pollevn gheta nhoi re? Hem tujem sarkem asa. Punn Lalita sangta nhoi anik ek bil asa mhonn farik korchelem? Are mhojea ghova, hanv gozal kortam ti mhoineachea bilanchim nhoi. Amerikeche adle Raxttrpoti Bill Clinton Goeam aila ani Verna aslelea HIV/AIDS piddecher adharun Cipla' vokhdam toiar kortele komponik to ani tachea vangdda ailelem delegation bhett kortelem khoim. Taka porxim pollevpak Lalita iet'lem. Itlea lagim to pavta mhonntoch mhaka-i vochun dislem Bill Clinton-ak khas Amerikechea surokxit mon'xanchi koddok surokxea astana hea bailank tachea lagsor koxem vochunk zatlem oxem Lapitt monantlea monant chintun hanstana, kaim vell fattim bailechem bil, bil, bil' aikun choddlelem rogtachem presanv mat devun tachem mon xant zalem. Mevona tea vostuchi hanv kednach axea korina hem tor tum zannach. Punn monantlean tori khuxal zaunchem oxem mhaka-i dislam. Tea khatir Clinton-ache sangata Monica Lewinsky aslear mhaka vego-veg mobile-avelean fon kor. Tache bailechem nanv Hilary nhoi re? Hem anik Monica konn? Behind every successful man there is a woman oxem mhonnlelem kedna tori aikolam tuvem? Lino B. Dourado (Ho lekh Mars 18vi 2006 V. Ixtt-an chappun haddlolo)
http://www.goa-world.com/goa/poems http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado __________________________________________________ Do You Yahoo!? Tired of spam? Yahoo! Mail has the best spam protection around http://mail.yahoo.com _____________________________________________ Do not post admin requests to the list. Goanet mailing list ([email protected])
