Ghorabo Ghoddunk Nhoi Moddunk Kazar mhollear ek moddpak zaina toslo povitr sakrament. Sorg rajeachea pustokar tumchea kazaracho sombondh boroun dovorleat ani te konnancheanuch pusunk zaina. Jem Devan ektthaim kelam tem monxan doxim korum nhoie Fr. Santimano Correia Afonso de Figueiredo Igorjichea offisant, kazarak poilem voros sudam bhoronk naslelea eke kazari joddpeak apnnalem bhaxonn ditana, teach vellar thoimsor pavon sorlelem anik ek zoddpem (nhovro/hokoll) offisachea bhair bankar boslem. Kazari jivit sukhi zavpak ani bore toren sansnnank togpak hache vixim xikxonn ghevnk (marriage course) Padri Vigaran tankam khas apoilelim. Punn bhitorlem vadoll borench ghombir aslelean ani tem sompo meren tannim thoinch boschem aslem. Tumchea modim divors ho soitanacho mhell ailo koso? Offisant bosun aslelea monxam thaim somzikaechea tallean Vigar fuddem uloilo. Kazara adim tumcho char vorsancho mog hea ganvantlea tornatteank ek dekh divpa sarkelo aslo. Dusrea mogiam porim tumchem tornnem jivit mosteaponnim sarunk na. Veg-veglea vaddeanlim tumi, punn ekach ganvanlim, lhanank toxench vhoddank tumchi apurbai asa. Ani aiz hanv aikotam tem kitem? Tumi, Moddgonvant ravpi eke bail vokila xim, tumchi divors kes pavlea mhonntat ti khori gozal? Mhojea viret mhoji ghorkarnn khoxi asteli zalear tinnem toiar kelelea divors kagddacher soi divnk hanv kobul asam. Punn ek ott ghalun (on one condition). Mhaka sapuch vichorchea khatir tinnem vego-veg dusreponnim kazar zavnk zai. Eka daddleacho avaz aikunk ailo. Aikolam tujea ghorkaran kitem sanglam tem? Babina, tum ek tticher. Tujem vevsaik (profession) sonvsarantlea khoinchea-i vevsaik sor korunk zaina. Hixop dovorunk zaina titlo tticherichea hatha kala xikonn, bhurgim vhodd monis ani desache fuddari zaleat ani zatat. Poilea suvater tujim pavlam nitt rostear asunk nibel gorjechem. Bhurgim aplea xikovpeacho vo xikovpinnincho adorx (ideal) zata. Tanchea avoi-bapai fattlean tticheri koddsun somajak koso fuddo korun zai hi xist (discipline) favta. Bore tticheri vorvim bhurgim bori nagrik zavnk pavtat. Zori tor mitthakuch karsan na zalear jevonn-achi ruch kosli asteli tem sangunk naka. Tujea mogall poti koddlean tum divors magtta to, khoim tori tuka unnem laglam. Tujo ghorkar ucch totvacho monis (a man of high principles). Tuje xivai taka dusrea ostorichi axa na nhoi mhunn soro, sigerette, jugar (gambling) lagona. Lhan chukeo zatat. Ghov-bailen teo visrunk zai. Zori hea vellar tujem monn bodli na zalear nhoi tumchea kazari jivitacher porinam zatlo punn tum ek vaitt dekh tujea iskolantlea bhurgeancher thaptelem ani tumchea bore dekhnanrancho visvas uboitelem. Padri Vigarachem lamb ulop chalu astana Babina-chi nodor offisantlea zonela lagsor aslelea eka zhaddacher thirloli. Tea zhaddar ek suknnem, ghontterant aslelea lhan suknneam pillank tanchea tonddan khavnk ghaltalem to dekhavo polletalem. Vigarachem bhaxon vaddtalem titlinch tachem dolleanleant dukham zorichea uddkam porim vhanvtalim. Hanv, tuje lagim uloitam ani tum kitem kai mhollear kedov meren tuji nodor bhair thiraun asa. Tujem monn khoim tori xennlam. Kazarachea povitr sakramentant hanvem, tumkam ektthaim keleant. Mhaka khub vaitt distelem ho ghorabo tunttlolo pollevn. Zori tumchea osli xiklleli veokti (personality) oxe toren panvl ghetat zalear fuddarak mhojean konnacheruch visvas thevunk zavncho na. Father, mhoji nodor bhair aslelea zhaddar asli kori, punn mhoje kan tuje ekan-ek sobd aikotale. Tem sobit suknnem kitle tras ghevn zhaddar aslelea ghonntterant apnnachea pillank khavoll khavoita to dekhavo pollevn, mhoje xattier haddvem dovrun mhojem ballok keddna dudh pietelem him mhojim chintna sopnam zait mhunn hanv bhieleam. Dolleantlim dukham pusun Babina-n aplem mon Padri Vigarak ugttem kelem. Devagelim daram bond nhoi, ugttim astat. Vell ietoch tumchem magnnem sakar zatlem. Punn ami magnnim korinanch zalear Devak zababdari dovorcho kiteak? Hanv somzunk na. Padri Vigaran mhonnlem. Ji nokri mhojo ghorkar korta ti, amchea ekvottacher futt ghalteli mhunn taka bore bhoxen somzailo ani xiddkailo. Sorkari nokri tachi. Custom officer to. Padri Vigaran sanglem. Punn ailelea disa night shift? Ghoddie to mhaka fottoun . Father hoch tigelo dubhav. Padri Vigar-a ani baile modim chollteli bhasabhas monneaponna aikotolo Babinacho ghorkar Rosario-n, modench tondd ghalun uloilo. Hum, hum, hum!!! Atam somzolo hanv. Tumchea dogaimcho nokrecho vell zullvop (adjust) korunk tumkam bhouch moskil zata. Tum Iskolak thavn ghora pavta mhollear donparchim sadde-tin horam vaztat. Tea vellar night shift kelolo tujo ghorkar sust nidhlolo mellta. Jevonn-khann korun bhurgea porim hanga thoim ximpoddleleo usteo vostu zoma korun ani ghorachi sapai korta mhollear ghorkar uttha, nhavtta, nhestta ani porot kamank veta ani tum rat bhor eksurem niraxi. Hakach lagon tumchea padriponnachi dhormik xikxann vo theology, monxachim bhavnam (feelings) ollkupak adharachim zatat. Ek sarkelem ek voros mhollear zatelem. To ghorant ailo keddna, utthlo keddna, mhoji soddpuch kori nastana ghorantlo bhair sorlo keddna ti takach khobor asona. Hanv ratchem eksurem tollmolltam. Sutti asta tedna, tovui vell ganvchea klubak dita. Odik borem tachea viret hanv eksurem dasti vinnem jielelim. Dekhunuch hanvem ghombir panvl ghetlam. Khoim asat tumchim divorce petition potram? Padri Vigaran vichartoch Babinan begantlim kaddun tachea lagim dilim. Illechea kamank tumi vhodd akantachi poristithi ubzoili. Chief Commissioner of Customs (Export) mhojo bhabul bhav zavn asa. Taka sangun tujea ghorkaracho tuje khoxe promann nokrecho vell bodlopak sangtam. Uprant tumi sodanch ektthaim astelim. Atam tori khoxi mhu Babina? Anik ek aik. Keddnach tujea monan dubhavachim chintna golloun soitanachea divors darar avaz korinaka. Tumcheam monan ani kallzan xanttitai ievnk Devachea axirvaddan tumkam daddtam, ani Padri Vigar tankam offisachea dara-xim pavounk gelele kodden, bankar bosun aslelea Lapitt ani tache hokllek pollevn thottaklo. Tumi keddna meren hangasor boson aslim? Vigaran vicharlem. Tujem bhaxon suru zalelem tedna. Lapittan zap dili. Mhonntokoch mhojem bhaxonn tumi aikolam. Khorem mhollear tumkam appointment dilolo mhunn hanv sapuch visorlom. Punn kitem-i zaum. Jem hanvem tankam sanglam tem tumi dhean divn aikolam oxem somzotam. Oh no anik ek visorlo hanv. Mhojim porbim tumkam, (dogaimkui aplo hat divn) aiz tumchem civil marriage zalam nhoi? Anik thoddea disani kazarachea sakramentan tumche don atme ek zatle. Kazar mhollear ghorabo ghoddunk, nhoi moddunk. Hem totv tumchea kazari jivitant sodankall samballun dovrat. Lapitt, mhaka khatri asa tuji fuddarachi sangatin tuka sudraiteli mhunn. Kazar zaun tori tujim lapitt-ponnam soddun di papia. Padri Vigaracho axirvadd ani Dev bori rat magun Lapitt hokllek ghevn offisantlo bhair sorlo. Varanddan pavtokoch taka kosli tori iad aili. Porot Vigara-xim gelo. Darar marun bhitor sorlo ani vicharlem. Father, mottor nanvar zali mhonntoch ti cholovpak problem asa? Mottor choloitolo zalear tujea lagim driving license asunk zai na tor tuka traffic police ..Kitem? Mhojei-i kanan lapittponnanchem tel ghalunk laglo? Civil marriage mhollear ponell* cholovpachem permit mevlem dista tuka .?Are aik"
Hokllechea hatak dorun Vigarachem fuddlem aikonastana Lapitt chollot ravlo. Ponell*- a small boat Lino B. Dourado http://www.goa-world.com/goa/poems http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado __________________________________________________ Do You Yahoo!? Tired of spam? Yahoo! Mail has the best spam protection around http://mail.yahoo.com _______________________________________________ Goanet mailing list [email protected] http://lists.goanet.org/listinfo.cgi/goanet-goanet.org
