Sermanvanchea Vellar Tuzo Sintid Khoim Asta? Tin voranchem Hindi kivam oddez voranchem Inglez filmam’, vaz yenastana polloupak zata. Konknni tiatr ani ‘English & Konkani rock concert’ dolleancheo pakoteo haloinastana, voranchim voram koddelik chitkon, toxench; TV serial pollounk amkam ubgonn yena. Punn pondra tem vis minutancho sermanv aikopak, loka kodden chimttibhor pasiens nam. Filmantli kivam TV serialeantli kanni ani tiatranli komedi sogllem dhean divn aikotat, punn padricho sermanv cholta teddna, Misa uprant Lorsuleak dukrache mas sanglolem tem khoinchea masalean randpachem? Kuddi-atmean igorjent, punn; mon mat bhailea ratavolint gusmololem asta. Ani Padr-babagelo borelo sermanv kanna voilean veta. Kaim vorsam adim…. Mhageli avoy duent. Tichea pãyank, remartizachea (rheumatism) pidden zompoi marlolean, tika dhormik kaide pallunk, igorjent vochunk zai naslem. Amgelem ghor igorjichea fattlean poddta. Ani igorjichea mukhavelean toxench fattlean, igorjent choltoli dhormik karravoll, vhoir bosoilole mikachea funelaleant lagsorlea sumudayeachea lokak aikopak melta. Ani tea khatir mhageli avoy, bolkavant bosun dispotichea Misant, xantikayen vanto ghetali, ani dhean divn Aitara disa, Padr Vigaracho sermanv aikotali. “Tia koxi asa ghe? Mis aikotali?”, Magdu timai (nanv bodollam) tichea ghora veche vatter amchea ghora samkara ubi ravun, mhojea avoychi khobor gheta. “Hoi baye. Aichea Misar, Padr Vigaran boro sermanv sanglo. Tunvem aikola nhoi?”, mhoje avoyn vicharlem “Sintid dovorunk nam ghe Tia. Aiz amgher cheddum ani zanvoim yetat. Mhozo zanvoim dukra mas mhonllear piso. Nimnnea orasavank ravonastona, Lorsu lagchean beg-begim mas haddlem.” Sintid dovorunk nam ghe Tia, he sobd mhojea kanar poddona fuddem, hanv bolkavant ailom. Mhaka pollenam fuddem Magdu timain, vochpachem kelem, punn; veche adim tinnem mhontlem. “Ho potrakar bhitor aslo?” (Ten’nachea UZVADD disallear mhoji linknni chappun yetali, tea khatir ti mhaka ‘potrakar’ mhonntali) Mogacheano, mhaka odik sangchemlem kivam borovnchem disona. Kiteak, mhojea voilea vicharak tumchea lagim zap astoli. Punn ekuch vichar bhurgeaponnim tem aiz zantteaponnar meren mhojea monank sotoita. Tiatr, cholchitram, TV serial ani her kormununk (entertainments) polletana, amchem mon bhair bonvunk vochona, punn fokot Magnnea-rozarant ani Misant amcho sintid sonvsarachea rattavolint kiteak guspotta? Lino B. Dourado
