Mauvin Godinho – Svarthacho Gulam’? Sod’deak Gõychea rajkaronnant, Dabollecho Kongresicho amdar Mauvin Godinhok aplo pokx soddun Bharatiya Janata Pokxant (BJP) bhitor sorpache khor duvalle lagleat. BJP-ant bhitor sortolo zalear tannem poilim Kongres Pokxacho amdar mhonn rajinam diuncho poddtolo, ani uprant BJP-achie tiketticher tannem vinchnnuk loddounchi poddtoli. Tie vinchnnukent Dabollechea motdaramni Mauvin Godinhok aplea motadaramni aplea motancho pordo voir kaddlo zalearuch taka BJP-ant bhitor sorunk melltolem. Nam zalear, magir Mauvin Godinho itihasant zoma zatolo ani rajki mollar dhull khayt bostolo. Mauvin Godinho. Fattlim sumar 25 vorsam Kongresint asa. Punn hea fattlea don vorsamni taka Kongres Pokxant rajki gormi zaunk laglia ti tachean sosunk zainam oxem tachea ulovpantlean thavem zata. Dekun to atam Gõyant sot’ter aslolea BJP-ant bhitor sorun jivak sot’techi thondday bhogunk yevjita. Itlench nhoy, tor apnnem Kongresichea kallant rajki mollar jim somajik patkam adarleant tea patkanchi sot’ter aslolea BJP-an zoddti korchi nhoy hi-ui tachi opekxa asa hem sobhavik ritin somzum yeta. Mauvin Godinhon, anik-ui zaitea zonnam porim Kongresint ravun aplo rajki fuddar ghoddoyla. Rajkaronn kelam. Kongres Pokxachea nanvar ani khustar taka rajki mollar unchlea panvddeancher pavpachem ani ravpachem bhag favo zalam. Hea pokxant tannem jivitachim choddan chodd vorsam sarleant. Raxttrachea panvddear Kongresintlea ani her rajki pokxanchea mon’xam kodde tacho som’bond aila. Desacho adlo Prodhan Montri sorgest Rajiv Gandhicho to avddicho ani lagincho monis aslo. Tea pokxant ravun tannem montri zaun lokachi ‘seva’ keli. Tea pokxant ravun tannem rajki sot’tea chakli, onnbhovli ani jiyelo. Kongres Pokxan-ui tache khatir khub kelem zait, ani tannem-i Kongres Pokxa khatir khub kitem kelem zaum-ie. Hem sogllem korta-korta Kongres Pokxan taka tachi vollok ani osmitay dili. Taka nanv-nam’nnek pavoylo. Kongres Pokxant ravun fattlim itlim vorsam hem sogllem zoddlea uprant, atam Mauvin Godinhok dusrea pokxant vechem dista! Karonn? Karonnam khub asum yetat. Toxem polleunk gelem zalear, rajkornni lokak aplo svarth sadounk zay zalear tankam nimitak khub karonnam melltat. Kainch nam zalear, ‘IFFI’ vellar apnna vangdda aplie potinnik-ui ‘red carpet’-avelean cholun vochunk diunk nam mhonn apunn pokx soddta mhonnpi legit amche modem rajkornni asat. Mhonntoch, hantum koslench noveponn nam, punn khoreponn khub asa. Punn hea sogllea modem ekuch ek khorem karonn tharta tem mhollear svarthiponn! Ani heach svarthak lagun, kherit bhaxen rajkornni monis kednam, khuinche gozalik lagun ani khoim bodlot tem sangunk yenam. Zoso Mauvin Godinho sod’deak bodol’la toso! Mauvin Godinhochea sangnneavelean, Kongres Pokx taka favo titlem mhotv dinam oxem zannvota. Hi gozal khori asot zalear, tie gozalivelean Mauvinak Pokx kiteak bodlunk zay tem somzonam. Mauvin Kongres Pokxachie tiketticher nivddun aila to Dabollechea motdaranchea motancher. Dabollechea motdaram khatir. Kongres Pokx ho fokot taka nivddun yevpachem madeom aslem. Zalear jea motdaram koddchean tannem aplem chodd mol mandunk zay aslem tem soddun, to atam Kongres Pokx bodlun tea Pokxacher kiteak rag kaddunk sodta kay? Vo tea Pokxak to ‘blackmail’ korunk sodta zait? Kongres Pokx boroch vhoddlo Pokx, ani tantuntlo eklo Mauvin Godinho bhair sorun gelo mhonn tea Pokxak kosloch forok poddonam! Sod’deak Gõyant tori nhoych nhoy, kiteak Gõyant sod’deak sodrier BJP asa. Kongres Pokx aslolo zalear, apnnak to Pokx mhotv dinam mhonn zannam astanam-i tantuntlean bhair sorun dusrea Pokxant vochunk yevzunchim ani ti yevzonn chalik lavpachim pixeponnam Mauvin Godinho korcho naslo! Monis apnna poros aplea svarthak chodd mol dita tednam to oxench korta, karonn to svarthacho gulam’ zalolo asta! Mauvin Godinhoi heach svarthacho gulam’ zala kay?
Jose Salvador Fernandes www.goa-world. com GULF-GOANS e-NEWSLETTER (since 1994) >>http://www.yahoogroups.com/group/gulf-goans/ www.colaco.net >>http://www.live365.com/index.live >>Tumcam Maie-mogacho ieukar. Stay tuned to Gulf Goans e-Newsletter - everyday >>someone, somewhere learns a >>little.....________________________________________________________________________________ >> THOUGHT FOR THE DAY: Every individual has a place to fill in the world, and >>is important in some respect, whether he chooses to be so or not.
