Fogotteank Uzo Laitana Sintidan Laicho Fogotteo marinastana kosloi somorombh amchea Gõyant zaina. Festam-kazram ani her somorombh gonngonnant kortolo zalear fogotteanchi poili goroz. Fogotteancho avaz zalea xivay tea-tea fugsavank dom disonam. Zolmolea balkachem yenem fogotteamni suru zata. Naka sokoilem ghonntole, ganvantle konnanchea ghorant kosle kharanank lagon fogotteo marleat ti vaspus korun, tankam porxim borem magunk, darant ube zatat. Ladayin ani ghorant Saibinnink haddpacho vell zalo mhunn, fogotteancho ek maran lasun xezareank kolit kortat. Ani don vo odik maran lasle tor; ladain suru zali vo ghorant Saibinn pavli mhunn kolta. Ten’na matso pois aslolo xexari beg-begim dhanvun veta. Ek dis oxem ghoddlem. Sumar tinxim metr pois aslolea vaddeantlea Minguelagher donpanchea vellar, tanchea dusrea putachea batizmachi ladayin asli. Ladayin suru korpacho vell zalo mhunn, ek fogotteancho maran laslo. Hanv sotasot nheslom ani cholun tanchea ghora vetana, bisikleticher bosun ek jodi mhojea samkara tambli. “Baba, Minguelachem ghor hanga thanv, kitlem pois poddta re?”, saikolichea dhanddear boslole ostoren vicharlem. “Fogotteancho maran kanar bosta titlem pois, tache ghor asa”, hanvem zap dil’li ti aikon, dhaddlo monis challvolo. “Atanche sonstikodde ek vicharlear, dha aikunk zai” Don hozar vorsam adim China deshachea lokan fogotteo toyar kel’leo. To lok somzotalo fogotteanche vhoddlea avazar bhutam biyun vetat mhunn. Lohu lohu korun fogotteo heram desamni khasgi somorombhachea upeogi zaleo ani oxe toren Portugezan (hanv chuklo nam zalear) Gõyant haddleo ani atam kosloi somorombhak, fogotteo; vhoir tokli ubarun asa. Fogotteo ken’na ken’naim kestanvachem mhull zaunk pavta. Final harovlole ttimiche vatten fogotteo xevttun final khell jikhlole tankam pikar kortat. Magir ghe kestanv. Eleisanv jikhpi vo tachea pokxak vavurpi, virudhi mon’xachea ghorachea durgant vo ghora samkara fogotteo udoun ek vhodd marekar dusmankayechem zhadd roitat, ani fuddlem eleisanv yeo porian ragan ximpttat. Fogotteo fokot somorobhakuch vaprinant. Herui kamamni fogotteancho upeg zata. Amchea xettamni gimanchea tempar pavsavolichea purmentacho vepar roitat. Kanlgam ani her piklolo vepar khavunk kavlle yetat ten’na ek-ek korun fogotti lasun tankam poisaitat. Ambe-ponnos her follancho ibadd makodd korta ten’na, fogotteancho maran lastat. Adlea tempar makhodd biyun poll kaddtale punn atanche makhodd fogotteanchea avazar hea zhaddar thavn tea zhaddar umedin fogotteanchea avazar udkeo martat. Ani ho makddancho khell atanchea rajkarnnancho zala, oxem tonddbhor sangchem poddtta. “Baba kalsanv ghall re, baba kalsanv ghall re”, nagddea putachea fattlean dhavun, babddi avoy kalsanv ghalunk putak agro kortali. “Hanv ghalina, hanv ghalina kalsanv”, ani put netan dhanvun-dhavun avoyk tokhoitalo. Ani ti tokhun jar zatoch, mhonntali. “Kalsanv ghalina mure. Bebddo Kamil-achi bail ujea boddi ghevn, tuji fogotti lastoli. Ten’na roddum naka.” Avoyn putak xiddkailo. Kamilachi ghorkarnn Perpet, ghorant ballont zaunchea ostoreanchi adlea kallar voijin asli. Ticha hatantlean choddan chodd vaddeantle kivam ganvantlea bhurgeancho zolm zala. Bhurge por nagdde dislear tanchea nanuseak chimptto kaddun mhunntali:“he fogottek uzo launk zai”, ani chedde bhurge tika biyun benddar kalsanv choddoitale. Kamil-achi soreachi ‘tank’ kamank vechea adim ‘full’ zaunk zai asli. Tache tankint soro ghelea xivay kam’ korpak tache hat cholonasle. Zhoddov khoddpachem, narl kaddpachem, xettantlem ani her sabar kamam' to huxarkayen kortalo. Zaite duddu to zhoddtalo, punn; ord’de soreachea pompar khorchitalo. Resanv chodd zaun keddna-keddna to paddint poddun thoinch nidhtalo. Dekun, ganvchea lokan taka beddo Kamil nanv dovorlolem. Avoik sotaitolo por ghora samkara khelltalo. Tea disa Kamilache ghorkarnink koslem ragachem pixem laglolem Devak khobor. Hatant ujeachi kapoddi ghenv bebddea Kamilachea fattik lagloli. Jiv aslear bhik magin mhunn Kamil bonkak paim tenkoit dhanvtano ani tachea fattlean bhokbhoktolea ujeachi kapoddi Olympic torch kosi ghevn tachi ghorkarnn dhanvtali. Bhailean khellpi nagddo por tanchi marathon race polletana, Kamilachea benddak bandlolo tuvalo sodov zaun dhornnir poddlo, ani tuvaleacha bhitor mustaki nant teo tannem polleleo. Por akantlo. Biyun kamplo. Tannem ekuch dhanv ghorant ghatli. Aple avoy ulo marit tika sodunk laglo. Put itlo kiteak bhirantint gaborla kai? Avoychea tokler pez poddlo. Tinnem, taka ubarlo ani aple kakent ghott dorlo. Oxe toren biyepachem kharan vicharchea adinch, putan mhonntlem. “Mummy, mymmy. Mhaka begin kalsanv ghal, begin-begin ghe” Okosmat kalsanv ghalpacho putachi vinonti aikun, avoy eksarki ojeapli ani vicharlem. “Kalsanvanchi kiteak goroz baba?” “Kamil onkolachi bail vhodd ujeachi kapddi ghevn tachea fattik laglea, ani tachea fattlean dhanvun mhonnta; tuje fogottek uzo lailea xivay tum sudorchona” Lino B. Dourado
