Melolea Mon’xanche Atme Bhukek, Tanek Vollvotat? Lhanponnim thanv vhoilo proxn mhaka ken’na-ken’na tras ditalo. Punn poirchea atthvoddean mhojea proxnank thoddixi zap mell’lea ani borinch vorsam guspololem mhojem mon xant zalam. Punn, kitlem sot asa tem mat sangunk hanv nokom. Ami bhurge astona, sumar 1960 doxkant kazaracho suvallo atanchea toren dongrar ‘open air’ mattvant zai naslo. Ghora samkara mattov ghalun donporam vo ratchea vellar khavop-piyunam ani nach zatalo. Dusrea disa vhokllegherui nach ani khavop-piyeop zatalem. Kazar somplea uprant nhovrechea ani vhokllechea vatten kazarak ailolea lokak, vaddeantlea xim’ meren pavounk zai aslem. Ani thoim nhovrea-vhokllechea vhoddilachea hatant, ek-ek sorea battli ditale. Thoddembhov rozar korun, ximevelea rakandorak borem magun, battleantlo soro kalsin ghatlolo ordo soro, poilo zomnir ottoun; dusro ordo pottant ghonttale. Donui vatteantlea battleantleo soro kalas zai meren, vaddeantlea xim’ rakondorak dulpodd-mandde ani gayona gavun khuxal kortale. Hem sogllem korpachem kharan vichartoch, vaddeantlea vhoddil amkam sango. Toxem korinam tor apxi (xim’ rakhondar) vhoklle-nhovreachem padd kortolo. Dorek vorsa vaddeantlea khursachem fest Mayeache 3 tarker. Ken’na-ken’nai angovnnechi vo upkaranchi ladayin khursaxim zatali. Fest vo ladain kortolo yezman festak vo ladainek ajir aslolea zhannteleank soro vanttchea poilim, battleantlo thoddo bhov soro zomnir ottoitalo. Ani hachem kharan mhonllear vhaddeantle morunn ghel’le mon’xachea vo vaddeantlea khursachea membrachea atmeanchi tan bagounchi oxi ek rit mhunn, vhoddil sangtale tem ami aikotale. Bhikareanchim jevnnam kivam melloleanchea nanvan ditolim jevnnanttu-i sorea ani khannancho ibadd zatalo ani zata. Ghorchea atmeanchi tan bagoilea xivay (vo dotorer soro ottoilea xivay) tanchea nanvan jevnnank ailoleanim soro ghonttunk zainam ani tech toren poilem jevonn vaddun khoim tori khonxeak dovorlolem tem melolim jevlea bogor (khavleamni khailea bogor) ‘bhikreanim’, bhikareanchem jevonn jevunk addvarlam. Pirayen hanv vaddtam-vaddtam mhoji idad vo vorsam social drink marpachi zali ten’nam, survatek hanv lip-choriam kazarachea mhattvant beer ghottunk laglom. Konnem tori ek dis mhaka beer piyetolo polelo ani tannem mhaka boroch hinsailo. “Kitem re? Bailam bhaxen beer marta? Beer soft drink mhunn adli Mukhel Montri Shasikalan Gõyche Vidhan Sobhen sanglam. Hi khobor nam tuka? Dadlo zaun daddleam porim piyeunk xik” Ten’nanchi bhouch famad Officer Choice vo mottvea nanvan OC whiskycho poilo peg mhojea pottant rigoilolea vellar, mhojer eksarkem daddleaponn oddun ailem dislem. Lohu lohu korun don pegancher pavlom. Pikniki, zolm dis partio ani her fugsanvank hanv vanttekar zaunk laglom. Ken’na-ken’na drink marunk boslole kodden mhojea ixttank ani lagim aslolea soro ghonttoleankui kurusidadin hanv polletalom. Soreachea glasant soda mixoll korun, glas tonddank launchea adim, uzvea hatachea bottan glasantlo thoddem bhov drink zomnir udoutale. Ani te oxem kiteak kortat tem vicharlear? Hea zageavelea sompurn ghel’lea bebdeancho ugddas korunk zai. Tanchi zap soroll melltali. Amchea ganvcho vhoilea vaddeantlo Custodio (taka ami Kistod titiv mhonn vollkitale) fattlea sumanant mhojea sopnant dislo. To ek huxar ladain gavpi aslo. Ladain gavpak taka konnuch sor zainaslo. Tachea margdoxonnan vaddeantle kivam ganvche tornattim ladain gayunk xiklolim. Konnagerui ladain aslear ganvcho lok taka vicharlea xivay ladain korunk fuddem soronaslo. Ladainim uprant tannem borench ghonttchem aslem. Ladin sobhoili mhunn, lok taka soro di’it ravlo. Ani hench kharan zalem, mansugen soro ghonttpi Kistod titiv soreacho gulam zaunk. Xevttak, figd (livers) piddear zaun somplo. Hea gozalik sumar 51 vorsam sompurn ghelim. Hea adim keddnach to mhojea sopnant disunk naslo. Punn poirchea sumanant tannem mhojea sopnant entry marli, ani ek vhodd xinn mhojer korunk laglo. “Tujea hatak dorun hanv tuka mhojea barobor lokagher ladainik vortalom. Dos, cake, pinarg ani dusrim khannam hanv tuka ditalom. Ugddas asa mu tuka?”. Tannem adlem pustok uspilem. “Hoi Kistod titiv. Punn itlea vorsamni….?” “Tum itlo imtto mhunn hanv nokom aslom” “Imtto? Hanvem imtteaponnam kednanch kelinant ani kortoleancho mhaka rag yeta” “Polle baba. Monis mortokoch tachea kornnea pormmonnem Sorgincho Dev farikponn dita. Ganvant mhaka nanv aslem. Ladain gavpan hanvem nanv zoddlolem tem soreachea nadar ibaddlem. Ghorakodde ghorkarnnik ani bhurgeank tras dile. Ani Devan mhaka mhojea guneanvanchem farikponn dilam” “Farikponn ani koslem tem?” “Tum polleta astolo. Thodde soro ghonttpi monis tonddank glas lanvchea adim glasant bottam ghalun thoddem bhov drink zomnir udoitat. Ani hem dotorer poddlolem drink mhaka piyepachem pirachittachem formonn Devan mhaka dilam. Dotorer poddlolem drink rokhddench sukta. Dekun, mhojea atmeanchi tan bhagonam ani mhaka sorgincho darvontto ugto zainam. Ani tum imtto. Ken’na tori glasant hat ghalun mellealea mon’xachea atmeanchi tan bagoita re?” “Kistod titiv, tosli mhaka acharponnachi sonvoim nam” “Sonvoim kor ani mellealea mon’xachea atmeank dhados dovor. Tin disamni porot…..”, tachem sompche adinch mhaka zag zali…. Te ratri glasant kopachem otoilem ten’na, Kistod tivachi yad zali. Sabar vorsamni tannem mhojea sopnant kiteak yenvchem? Ghontt ghenvche adim glasant bottam ghalun zomnir udovpachi paddeli sovoim mhaka nasli. Ani hanv toxem korinam mhunn tannem sopnant yenv mhaka imtto mhunnon hinsailo. Glasant otoilolo sumar 60ml peg kuznantlea zonelar aslolea votachea dhogdhogant korpotolea krotonachea vazan ottoilo. Mhojea sonvem poile pavtti oxem ghoddunk, mhonnchem; purai peg vazan ottounk mhaka konnem forsar kelo tem mat hanv sangunk xokonam. Nidunk veche adim mhagelea avoi-bapaichea atmeank rozar kortanam Kistod tivachi yad zatali. Tachea atmeank sorgincho darvontto ugto zaunk magnnem korunk laglear segid tin ratri zal’leo. Kistod tivache bebdikayeche chukik lagun Devan taka vegllench torechem pirachitt formonn marlolem. Ani hanv somplea uprant mhojea chukik (oskotayen ghoddtat tankam) koslem hanvem farikponn divnk poddtolem kai oxem hanv chintit astona mhojea nhident porto ekdam Kistov titiv dislo. Punn he pavtti to hanslo ani nanch zalo. Dusrea sokallim hanvem ottoilolea vazan nodor marli. Votachea dhogan korpololea kroton zhaddak komri ful’loli. Ani sompoitanam: Ho lekh kolponnink. Kitlem sot asa tem kopacho ghontt ghenvchea adim glasant bottam ghalun soro zomnir udoitoleanim sangchem.
Lino B. Dourado
