Broadway Book Publishing House-an Gõyant Romi Konknni xikounk fuddarponn gheun, tisrie pavtt ghoddoun haddlolo Romi Konknni xikpacho Kors, 19 Janer ti 18 Febrer, 2015 tarik porian zalo. Hea korsant dog xikpiamni bhag ghetlo. Orth somzun Romi Konknni vachop, Romi Konknnichi mullavi utravoll, vyakoronn ani bhas ulovp ho Korsacho hetu aslo.
“Mullant thaun Konknni xiktoleam khatir, sogllea nodramni ho ekdom’ boro ani sovay Konknni Kors. Ho Kors anik ek mhoino chalu urlolo zalear, hanv Konknnichio anikui khub gozali xiktolim aslim,” oxea utramni Korsant bhag ghetlolie 49 vorsanchie pirayechie Merxechie Xmt.Margaret Esteves hinnem aplem mot ugtaylem. “Ho Romi Konknni Kors khorench sumara bhailo aslo. Konknni xikunk ani ulounk ho Kors mhaka khubuch faideacho zalo,” oxem fattlim 14 vorsam Gõyant ravpi Udent Bharoti aslolie 52 vorsanchie pirayechie Xmt. Carrol Piresan sanglem. “Poilech pavtt Konknni xikunk ailolea amchea xikpianchea monanchea panvddear denvun xikoylolea, ani xikoytanam sumara bhaili sosnnikay ghetlolea xikovpianchi tust kelia bogor ravunk zainam,” oxem Pires-bayen fuddem mhonnlem. Nanvosto Konknni zannar, xikovpi ani bhas vijneani Dr. (Pa.) Pratap Naik, SJ ani Konknni xikovpi ani borovpi Jose Salvador Fernandesan ho Kors sangtan choloylo. Korsachea xevottak, Broadway Book Publishing House-acho dhoni Khalil Ahmedachea hatantlean dogui xikpiank sertifiketti bhettoylio. FOTTU: Poilo Fottu - Romi Konknni Kors choltanam… Dusro Fottu – Margaret-bay Esteves Romi Konknni Korsachi sertifikett mandun ghetanam…. Tisro Fottu - Carrol-bay Pires Romi Konknni Korsachi sertifikett mandun ghetanam…. Chovto Fottu - Romi Konknni Kors xikovpi ani xikpi. (Davean-Uzvaean) Xri Jose Salvador Fernandes, Xmt. Carrol Pires, Xmt.Margaret Pires, Khalil Ahmed ani Dr. (Pa.) Pratap Naik, SJ.
