‘Hello’ Bondh.......'Namaskar'! Ghelea sumanant, 'Sanatan Saunstha'-chem Moddganv zal'lea Sam'melonant uloitana, eka Montreache ghorkaninn mhontlem; “fuddarak fon vazlo zalear ‘helo’ zagear ‘namaskar’ mhonnchem” Tichi ghoxna, (statement) somazik mavlle tholl FaceBook-ar, ek hanspachem sadhon zalem zalear, kaim zannanim, dusreank sangchea adim khaxelea bhurgeank ‘namaskar’ mhonnonk xikovchem mhunn, tika sol’lo (advice) dilo. Purvozanchi ek mhunn’nni asa. ‘avoi-bapui korta pap bhurgim ditat zap’. Bharoti ostoreanim, ostomtichi sonskrutayek (western culture) veng marchi nhoi mhunn, Montreachea ghorkanim tea sam'melonant ul’lek kelo. Punn khaxali tichi dhuv, Facebook-ar ‘hello’ tshirt nhessun aslolem konnem eka papian, chitr uzvaddak haddlem ten’nam, kaim zannanim vichitr ‘comments’ marun somazik mavlle thollar hangama kelo. Thoddeank dislem ani dista, avoi-bapaichea bhovxik zagear dil’lea ghoxnnank, inosent bhurgeank dhoxi vo guneanvkari korchim nhoi mhunn. Fonar, choddan chodd amchea sadea lokak ‘helo’ (ek ‘l’ khatat) mhonnpachi sonvoim. Kaim deshanim ‘hello’ zagear tanchea bhaxentlean zap kortat. Italian ‘Pronto?’, French ‘Allô?’ , Portuguese ‘Olá?’, Spanish lok ‘Sí?’ zalear Arbi deshant fon kortolo ‘Assalam ‘alaykum’ mhonnta ani fon ghetolo ‘Walaikum assalam’. Nove Dil’li rajdhani xarant fon kortolo‘Namaskar’ mhonnta ani fon ghetolo ‘Namaskaram’. Punn amchea Gõyant zaito lok vicharta, ‘Konn Uloita?’ Halinchea disanim prabhavik mon’xam koddlean, babod ghoxnna aikunk ailleant. PWD Montri ‘bikini-cher horkot (objection) dakoili. Mukhel Montrean ‘sexy’ vaktavya (remarks) korkor votan upasak boslolea 108 Ambulance nursicher marli ten’nam Bharotachim TV channelam prasaronnan gazlim. Oslim udharonam diyit ravlear ho lekh xevotak pavchonam. Punn ekuch sangpachem mhonnlear amchea namneche Amdar-Montreanim jiber il’loso thabo dovorcho. Opangull (disabled) zavop hi devachi chuk mhonnchea adim apnnalem rup poilem arxean pollounchem ani dusreank nhesnam ani sonskrutay samballchi mhunn sangtana poilem apnachem ghor sap dovorchem.Porchi gozal hi. Fon vazlo. Landlinir thaun kel’lo. Lapittan mhontlem “Konn Uloita?”“Namaskar”, ostorecho mon bhulgavnecho svadik avaz.“Namaskar konn?”, Lapitan vicharlem."Namaskar", tinnem porot ekdam sanglem"Konnui tum zaum. Tuka kitem zai Namaskar?""Tujea koddlean atam ani fuddarakui hench zai, Namaskar""Hum....*****? Namaskar?", Lapittachem mathem korpolem"Namaskaram", ani tinnem fon bondh kelo Lino B. Dourado
