Undir Porian Upkaran Ravpi?Tinnem kharedi (shopping) purn keleanontor, soroll vochun dhukolgaddient (trolley) axil’lo bazar mottorichea dickint ghatlo ani dar ugddun motor chalu keli. Chukon motorint urlolo mobail hatan ghetlo ani, ek dhanvti nodor mobailar martana, tichea ixttinnichim sotasot sat ‘missed calls’ mobailar pollelim. Thoddea vella modim itlim kolam? Tichi ghombirtai vaddli ani vell piddear korinastana tinnem aple ixttinink fon marlo. -“Khoim gho tum mell’lea? Kitlo vell zalo tuzo mobail vazta. Ukli naslem kiteak? Mhaka dislem tum mellem mhunn” , bezar zalolea avazan tichi ixttinn uloili. -“Bazar kortalim hanv. Mobail mottorint visorlim. Itlim sogott kolam diunk, sang kitem zalem?” -“Amchea offisant undir zaleat mu gho yea?” -“Tuka kitem dista hanv ‘pest controller’ mhunn? Mhaka kiteak sangta?” -“Challvota kiteak? Tum zannam hanv undrank khup bhiyepi mhunn” -“Mhaka kitem kor mhonntta tum? Offisant aslolea undrank dhor pasun, tum ghara bos” -“Pagar konn ditolo?” -“Undranche maink sang. Hanvem dhaddleat tankam tumchea offisant? Konnakui sang ek ‘ratoeira’ hadd mhunn” “Ratoeira mhonnchem kitem?” “Portuguese passport kelea. Punn Portuguese ek utor noko ulounk. ‘Ratoeira’ mhonnchem ‘rat trap’” -“Undrank chitkupache ‘glue boards’ haddlole” -“Mangir?” -“Undir ekdom huxar asat mu gho yea” -“Undrank dhorpak ‘glue boards’ dovorle mhunn zata? Tankam khavoll ghalunk zai” -“Mhojea sangattak kam’ kortolea Orlandan, sanjechea chae kodde khavpak ‘butter cookies’ diloleo mhaka. Tatuntlo il’loso kuddko hanvem ‘glue board’-ar dovorlolo. Tannem kitem kelem zannai?” -“Cookies dilololea Orlandan...?” -“Nam gho yea! Undran” -“Kitem kelem?” -“Bore ruchin ‘butter cookie’ khaili ani hollxig keli” -“Khailem mhonn zata? Undrak angunk naka? -“Punn khoinsor kelam zannaim tum?” -“Sanglea xivai koxem gomtolem?” -“Kal sanjer ghora veche adim, hanvem ek ‘Thank You’ note marun, ‘print’ kopi mezaruch soddun gel’lim. Aiz sokalim offisant bhitor sorlim ani undir ‘glue board’-ak chitkola vo nam tem pollenvk laglim. ‘Board’-ar dovorlolea cookiecho, pitto dislo. Khandavelem ‘handbag’ mezar dovortana, hanvem ‘type’ marun dovorlolea kagddar justuch ‘Thank You’ boroilolea zagear undracheo tin lendio disleo....” -“Zalench! Undir legit khavunk ditoleank, upkari zaun dhin’vastat....”Lino B. Dourado
