Okasmat Mazrank ‘Demand’ Kiteak?
Vhoddle dukin Jack Anton kollit korta, tachem apurbayechem mazor, ‘bullbull’, avchit kal sanjechea 5.59 vorar usol’lem. Xezareamni panchnama kela tie pormonnem, mazor ‘formalin’ lailolem nustem khavun mellam munn puxtti (confirm) zalam. Pattlea disamni protek nakeancher motto bovall zatolean, Jack Anton nustem ghorant haddunk bhiyetalo. Punn mazrachean nustea viret ravunk zata? Xezareamni bhair uddoilolem nustem 'bullbull' khatalem mhunn, dolleamni pollelolea lokan purave diliat. Lok challvolla. Oslo prosong monis jivacher ghuri ghalunk, vell chodd pois nam mhunn bhirant dakhoita. Pattlea mhoineant, Pruden Media-n Gõyche ‘border’-ir sarki topasnim korinastanam PDA koxe bhaile nusteache trok, Gõyant bhitor sorunk porvongi ditat tem dakhoun; nustem topasnim korpianchi izat khilleak umkailea. Sorkar sangta, bhailean savn haddlolea nusteak ‘formalin’ nam. Huskea mekllem khavunk zata. Sorkarachea sangnneacher visvas dovrunk zai naslolean, halinchea disamni mazrank magnim vo ‘demand’ zala. Ghorant mazor dovorpak vo pospak raji naslolo lok atam don-tin mazram posunk toyar. Tie pasot nusteachea bazarant heddpi mazram, khup mhunllear; khupuch unnim zaleant. Hachi konnem tori sodpus kelia? Zon’varanchim premi khoim asat? Mazor mhunn mon’xanchem ek apurbayechi prani nhoi? Rostear heddpi kutreanche ‘lovers’ asat tie toren, mazranche ‘premi’ astat. Khup lok tankam vinkhot nustem gheun khavoita. Hem mhojea khas dolleamni pollelam. Mazranchi apurbai kortolim bazarant bhitor sorlim mhunntoch, sogttim mazram nusteacha bazarache dixen polletat. Bazarantlim kednam kai tim bhair sortolim ti vatt polleun ravtat ani fattafat tanchea pattlean choltat. Kalcho nitoll aslolo mazrancho dekavo aichea ‘formalin’ tempar disonam. Bazarant mazram sapuch unnim zaleant. Mazram geleant khoim? ‘Animals lovers’ amkam zap di’it kai? Nolleachea ghoramni ravpi lok undrank lagun mazram posta. Suneam bhaxen tankam hadd-mas vo subeij jevonn naka. Nusteachim boddkam ani xitar nusteachi koddi misoll kelear mazram gostan jevttat. Lhan bhurgim mazram lagim khelltat. Mazorui aplem ang gostun-gostun bhurgeam thaim lagmare korta. Adlea nollea ghorant poslolim mazram, ghora bhair vochun apli soimbachi goroz kori. Matient apli hollxig lipoitalim. Mhunntat nhoi? “Mazor aplo jiv di’it punn hollxig diunchenam”. Atam lok flat-anim ravunk lagla. Mazrak anik khoinchi suvat? Tanchi anik kitkit konn polletolo? Soimbachi goroz korunk bhair soddlear, xezarnnicho bokul mazrachi karandai kelea xivai sodta? Anik thoddea sumanan, mazriche pile sotayunk lagtat. Gõychea xarantlea flat-anim ravpi lok, oskosmat mazrancho mogacho zala. Adim lok subeij mazram ghorant aslear nodi vo tollie lagim gonnint (jute sack) ghalun soddun ditalo. Xarant ravpi lok atam nodi ani tollea lagim dista. Ani hachem karan? Bazarant thavn haddlolem nustem, mazrak poilim khavunk ditat. Don disam modim mazrak kainch ek zainam zalear, lok bhiranti vinnem bindas nustem khatat. Lapitt http://aitaracheokaskuleo.blogspot.com/
