*Paili-bhor Konknni Mogi, Chimtti-bhor legit Konknnicho Mog Zollkhonam !* Adlea kallar Konknni-mogi mhonn nasle, punn Konknnicho mog mat puskoll vostalo. Konknni sevok ani Konknni vauraddi khub asle. Konknnicho vaur nettan choltalo. Konknni khatir vaurlear apnnak kitem mellttolem? hacher kednanch vichear zainaslo. Tiatr mollarui tednam oxench chol’lem. Aplê avoi-bhaxekhatir apnnem vavrop aplem kortovya mhonn te mandtale. Hêch khatir tea kallar Konknni mollar Konknni bhaxechem khub bandavollichem kam’ zalem. Thoddkeant sangchem zalear tednam Konknnicho mog zhollkotalo, punn apunn Konknni Mogi mhonn konn porgottnaslo.
Aiz Konknni Mogi puskoll, punn Konknnicho mog mat khuinch zollkhonam mhonnlear lottkem zaum nezo. Hacher niyall kortanam halinchêch ekie gozalicher amchem lokx vota. Amcho ek ixtt halinch somplo. Somplo mhunnche boldek tannem apleakuch sompoilo mhunnlear odhik borem zatolem. Tachem figd (*liver*) oskot aslem, tori tannem tensanvamni soro piyeon aplea figdacher ogllem vozon ghalem. Tachem kazari jivit sonkoxttant poddlolem ani tachie potinnin tacher visor ghalolo. Ti tachea sangatak jiyenasli legit. Ho xok gheun to soreak bhul’lo, karann to ticho khub mog kori. Soro kosloch prosn suttavo korunk xokonam mhunnpache amche sondex tannem bherea kanar kele. Ani ek dis tornniech pirayer to hea sonvsarak adeus korun gelo. Dusrea disa tachea mornnachi kollovnni ami Inglix potrar vachli tednam amchem mon ghuspolem… ‘*Death… Arnxxdo, Beloved husband of Jesxxca…*’ oxem tie jahiraticher boroil’lem. Oslench kitem aiz Konknni bhaxe sovem ghoddlolem ami onnbhovtanv. Konknni vixinchea mogachi amchi arodd vhodd, punn proteokxant Konknni sovem amcho mog sapp pokoll. Amcho mog motlob, adav ani svarth aslolo. Naslear Konknni mogi mhunnloleamni aplea ontoskornant hat ghalun hacho zabab sodhcho. Aiz paili-bhor Konknni mogi punn tancheant chimtti-bhor legit Konknnicho mog zollkhonam. Poilie svater Konknni Mogi mhonnlear konn? Ani Konknnicho Mog mhonnlear kitem? Halinch amkam ek Konknni mogi gavlo. Bhasabhaxent mhunnonk laglo, apunn atam Konknni nemallim vachinam, karann tim apleak poilim ghora lagim haddun konn tori ditalo, punn atam ti sovlot bond zalia. Amkam tachem vichitr dislem. Mog aslear hun vodde ghanttar pavtat nhi? Zalear tachea nimitant Konknnicho mog mhunnlolo khuim urla? Ani zor ek Konknni mogich oso vaglo zalear Konknnichea dusmanachem magir kitem? Anik eka nemallean ekê Konknni chollvollistachie mulakhotint taka prosn kel’lo, Konknni khatir khas tacho vaur atam kitem chol’la kai mhonn. Taka zabab diun hea vorixtt nagrik (*senior citizen*) Konknni chollvollistan apnnem ‘Legion of Mary’ hie sonsthent astanam Konknnicho kitem vaur kel’lo tachi volleri dil’li vachun vichitr dislem. Mhonnje sodheak tori tacho vaur kainch nam, oso somzut zalo mum? Zalear tacho Konknnicho mog kitem ani koslo? Dekhunuch ami khubdam mhunnttat, aiz Konknnicho avaz asa, bhopko asa punn proteokxant Konknnich nam! Konknni mollar osli poristhiti asli tori aizui Konknni mollar kaim zonn nisvarthponnim seva diupi sevok asat, dekhunuch Konknni mollar kitem tori forok poddtta, kitem tori hoikari porinnam’ zata. Tosleanchem roit (*race*) vaddom. Aiz Konknni mollar ami onnbhovlole ni-svarthi sevok thodde tori asat, tantle fokot donuch nomunne ami ditanv: Inacio Verdes Fernandes ani Alvaro Gomes. Konknnichem borem zaunchem, Konknnichem bhangar zaunchem, hech tanche anvdde ani otreg. Te Konknni sahityik nhoi asot, tori Konknni mollar sahit’ya ani sahityik nirmann zatat taka te zobabdar thortat. Konknni moll jivem urlearuch sahit’ya ani sahityik ghoddoum-ietat mum? Dekhunuch tanchea borpank sahitik mol naslem, tori tim ami uzvaddaitat. Karonn osle Konknni mogi vaddle ani choddle zalearuch Konknnik boro fuddar asom-ieta. Anik il’le fuddem vochon Dalgado Konknni Akademint (DKA) vaurtolea dogam Konknni vauraddiancho - Augustine Coelho ani Ankush Paddekar - ami ul’lekh korin. Dubhauviret Konknni khatir kortolea vaurachi tankam mozuri mellttach. Toxi mozuri soglleankuch melltta. Punn tanchea vauracho ami ul’lekh kortanv kiteak te Konknnicho vaur mogan kortat dekhun. Te adorx Konknniche vauraddi dekhun. Zor Konknni khateant vaurtoleamni tanchi dekh ghetloli zalear Konknni bhaxek bore dis yeum-ietale. DKA-che vorsak kitlech karyokram’ zatat, dor aitarak dhorun legit. Tantunt hea dogaincho bhorpur hat asta. Pustokanche mandd ghalop, suvalle zatat tancho karbhar sambhallop, vosro nettovop, adi. tankam dhavea hatacho khell zaun gela. Ani vixex mhollear ho vaur te mogan ani manan kortat. Tancho sobhav-gunn, vagnnuk bori. Aplea kama koddem te xistiche, satvik, orponn diupi ( *dedicated*) ani doson raupi (*committed*) vauraddi. Dekhunuch tankam ami salam’ martanv. *AUGUSTINE COELHO* Augustine Coelho, ganvan Aldona, zolmolo Ghatkopar, Mumboint. Vaddlo ani baravi meren xiklo, Fatima High school, Kirol Vidya Vihar, Mumboi. Uprant Gðyant yeun to *polytechnic* xiklo. *Kodak Photovision*, (*Goa Souvenirs*) hê komponik sol’lo diupi (*advisor)* mhonn vaurlo. Tea upranrt ‘Hertz: Rent a Car’ hie komponichea *central reservation* khateant dhedd vorsam tannem seva dili. *Arya Group of Companies* (Kundaim Industrial Estate) hie *ingot* toyar korpi komponint vaurlo ani 2010 vorsa DKA-nt bhitor sorlo. Tantunt savn aiz meren to Konknnik seva diun asa. Augustine-achem mhunn’nnem, “Duddu sogllem nhoi, vaurachem satisfasanv asop odhik gorjechem ani hem mhaka DKA-nt melltta. Konknnicho vaur korpak mhaka avoddtta.” Tacho bapui rebek vazoitalo ani Kirol Goan Association-acho to vangddi zal’lean Augustine aplea bapai vangdda tanchea Konknni karyokramank vetalo. Tacho bapui Reginaldo Fernandes-achio romanxi vachpi zal’lean Augustine-ui tio vachtalo ani oxi taka Konknnichi avodd lagli. Augustine-ache kherit chhond (*hobbies*) zaun asat: vachop, dhormik svatank bhett divop ani songit, zaum tem Inglix, hindi vo Konknni. Punn fokot adlem, nhoi atanchem. *ANKUSH PADDEKAR* Ankush Paddekar mull Padd’dde ganvcho, zolmolo Kakra Vaddeant, Santa Cruz. Mullavem xikxonn Moratthintlean kelea uprant baravi merenchem xikxonn tannem Santa Cruz-chea Santa Cruz High School-antlean ghetlem. Baravi kelia uprant dedd voros tannem Ponnjentlea A V Agshikar hie *fire-fighting* komponik *operation* khateant seva dili. Te uprant Ponnjechie B. Paul D’Souza hie *painting* komponik sadde tin vorsam seva dili. *Rasquinha Group of Companies* hê bandkamam korpi (*constructions*) komponik seva diun thoddo kall ‘marketing’ kelea uprant 2011 vorsa tannem Dalgado Konknni Akademint (DKA) proves melloilo. Tantunt savn aiz meren DKA-nt Konknnik to seva diun asa. To donui lipimni - Romi ani Nagri - Konknni vachta. Romintlean borovpak matxe oddchonn zata dekhun Nagrintlean boroita. Sodheak to fokot Romintli Konknni vachta. Tachem mhunn’nnem, “DKA-nt nokri korpak mhaka oglli umed bhogta, kiteak hanv mhojie avoi-bhaxechi seva kortam dekhun. Hem Konknnichem kar’ya hanv ek avhan koxem svikartam.” Ankushache chchond (*hobbies*) mhollear khell - futtbol ani *volleyball* tech porim nistem ghorovop taka avoddtta.
