Soor Moidannachi Nimnni Chitt Mhojea Goykar Mogacheano,
Mhojea hatak boll nam him don utram borovpak tori astanam dotorek soglli ghottai gheun hanv fuddem vhetam. Mhozo zolm kedna zalolo to eklech Devak khobor, punn tumi mhoji zottnai, apurbai ani mog korunk laglear sumar 28 vorsam somplim. Hea 28 vorsam modim hanvem tumchem zaitem onnbhovlam ani tumchea koddlean favlam tem, mhaka dusrea somudae koddlean gavlem nam. Survatekuch tumi Goykar United Goans Centre' hea nanvan 1979 vorsant thavn mhojea angnant khellpachem suru kelllem. Mhaka Goykaranchem ek borem dista. Survat tumchi bori ekvottan vo United suru zata ani chorbi choddli mhonntoch Divided zatat! Mhojea moidannar khellun thoddeanim apo-ap nanv zoddun ghetlam ani je Goykarank somudaen nanvuch naslem tem futtboll khella vorvim nanvoste zaunk pavleat. Thodde bhov futtboll khellgodi Goyant namneche futtboll klubank khelllele te khellgodi mhojea anglant khellun legends of Soor Ground ho bhilo zoddun atanche nove pillgek te ek adhorx (idol) kose zaleat. Novea khellgodeanim tanchea koddlean khub xikchem asa. Goykarachi poilich bhett zateli zalear futtboll khellachea nanvan mhojea angnnant zatali. Kuwait desan pavlolo soiro ani odhik korun Goykar mhaka bhett kelea xivai ravonaslo. Nirxeleleank mhojem moidann ek ugto mand aslo. Hea svater yeun thoddeanim aplea nokrechi oddchonim sutaveo keleo zalear thoddeacho mog ani soirik zaun lognacho bhandpass bandlo. Novi mottor-gaddi vikot ghetlea uprant 'show' marchea khatiruch mhojea moidanar yeun, lokan pollevnchea pasot don-tin bhonvandde marche asle. Ghorcheanim dilelim chevrisanchem ani yer parcel-am chodd tras ghenastanam hangasor vanttpan ailim. Dor Sunkrarak mhojea angnnant lhan-motto dhondo choloilo. Audio cassetti, CD, VCD duplicate korun sovai bhitor kopoileo. Bhuk ani tan bhagounk ruchik lhan stall-am choloilim. Goyam thavn yetele soire tiatristanim mhojea angnnant, tancho mall vikun Kuwait-che Dinar zoddle. Konknni songitacheo, cholchitrancheo audio ani VCD original mhonn te viktale punn ghorakodden cholonasleo. Goyam savn iskolachea, igorjichea adarak mhonn sortiche 'book' dhadun ditale te futtboll khell pollevnk ailoleanche hodddear ghaltale ani hakach lagon thoddeanim mhojea moidannar yeunchem bond kelelem. Atam tem soglem somplem mhonn dukhin sangchem pod'da. Tumi Goykaranim mhojea moidannar futtboll suru keleleak hanv sonvsarbhor famad zalem. Kuwait-chea Inglez potram - Arab Times, Kuwait Times, The Times - ani internet-acher www.goa-world.com, goanet, Gulf-Goans e-Newsletter, adi. futtboll khellachi bhatmi porgottun mhojem nanv ghazoilem Shri. John, Freddy Coutinho, Francis Carvalho, Sunny Nazareth, Raul Salemao, Sunil Putran, Eric Almeida, Oscar Gomes, Gaspar Almeida, Julio Cardoz, Joseph D'Souza, Anthony Veronica Fernandes, Gasper Crasto, William Fernandes, ani yerannim. Photographer Rewon Gomes, Augusto Fernandes, Jack Fernandes (Goa Studio) iadostik chitramnim mhaka bhorlem. Tiatristanim kantaram ghoddun ani vinodi bhumika korun mhojea nanvan tannim tiatr pollenarank divertiment dilo, ani apleakui thodea-bov komailem. Ani tech borobor tumi vaitui-i rochlem mhonn tumkam ugddas korunk mhaka khontt bhogtta. Moidannar khelltanam khup pavtti ravonaslele chukik lagon tumi eka-mekhacher hat hukhol'lo. Borele monis trasant poddun dusman zale ani ose toren vorsam soplim. Atam hanv tumchea somor hea fuddem nam, punn tumchi iad mhojean visrunk zavnchi nam. Aiz nhoi faleam khoim nam khoim tumi dusrea moidanar futtboll tournament chalu kortele. Ekuch, tumchea thaim nimnno upkar magttam. Ji dusmankai mhojea angnnant suru zaleli ti tumi novea moidanar vorum nakat mhonn, tumchea thaim nomrutaien (khalteaponnan) magttam. Mog asum .Salam. Tumchem, SOOR MOIDANN-Kuwait Lino B. Dourado 22/07/2007 http://www.goa-world.com/goa/poems http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado ____________________________________________________________________________________ Looking for a deal? Find great prices on flights and hotels with Yahoo! FareChase. http://farechase.yahoo.com/
