Pi, pi, pi, kiteak pitai re soro.
Hispa bhair soro kiteak mhonn piyecho? Kaim bebdeank
oxo vichar kelear tanchea koddlean soroll zab mellta.
Soro Jezun kela.
Galileiachea Kana ganvant eka lognank soro sompun
nhovro lojent poddta mhonn Jezun udkacher axirvad
ghalun soro kello. Ani hi poili milagr vo khunnam
vorvim xisamnim Jezucher visvas thevlolo. Punn bebde
lok poile milagriche pattlavdar zaleat ani bebddikai
korun aplea arogya ibaddtat. Soro vaitt oxem hanv
mhonnonk sodinam. Punn vokhodd koso illo ghonntlear
bholaikek ekdom boro mhonn amche purvoz sangot aileat.
Ghelea sumanant kazu fenniecheo don botleo vikot
ghevn sodam porim Babit-an vonntiche almarint
dovorleo. To kaju xivai dusro soro piyenam. Ratche 8
horar igorjichea ghanttin avaz kelo mhonntoch jevnnam
adim susegad aple don dose Babit-an ghenvche astat.
Ani kedna-i chukon igorjicho sankistão ratchi ghantt
marunk visorlo zalear, tea ratrik piyepak, Saibinnichi
porvongi nam mhonn somzun to piye nastanam ravta.
Frijintlem thondd soda ani mezavelo ek glas hatant
dorun igorjiche ghanttin ratchim 8 horam zalim mhonn
kollit kelea uprant almarixim gelo. Ani almar ugti
kelear don-ui kazu fenni botleo gaib zalleo. To
chintunk poddlo. He dis sade. Pirachitacho vo
korezmancho khall nhoi. Oxe toren sorea botleo gobra
vo xinze Budhvarak ani borea Sunkrarak almarintleo
natak zatat. Punn aiz koslo dis kai? Oxo to chintnanim
ghuspololo astanam dhaktti dhuv thoimsorlean pasar
zatanam tinnem mhonnlem.
Daddy kitem polleta? Kedov excise duty ofisar-an
almarik dhadd (raid) marun don-ui botlea aplea tabeant
dovorleat.
Kazu fennicheo botli lipoun dovorpak, ho
pirachitacho khall nhoi. Kuznant, chopati lattale
baile sorxim yeun Babit-an mhonnlem.
Hea disanim Bharot ani Australia modim ODI 50 overs
choltelo krikett khell pollevnk ghull zallo asa tum.
Ani India piddear zata tea disa tujem illexem subeij
ghevop zata. Gõy Voizki Kolejichea (Goa Medical
College) hospitalantlim 25% mornnam bebdikayek lagon
zatat mhonn nond zalam.
Bambolim Voizki hospitalant pavlolo duent monis
boro zavn surokxit ghora porot pavla khoim?
Ti mhaka khobor nam. Sangpachem mhonnlear, chalu
vorsachea Mayeachea mhoineant Bambolim hospitalant 150
zannam meleant tim choddxim soreachea piddek lagon
khoim.
Bebdikayechea rostean cholle mhonntoch soro piyeun
zatele piddek addaunk nozo. Soro monxeank kela ani
nhoi monis soreak. Hanv koso, khoim, khoinchea vellar
mansugen soro piyeta tem polle ani uprant mhojeo
botleo zopt kor.
Punn soro to soroch nhi? Favo titlo piyepi Gõykar
atam uronk nam mhonn Voizki kolejintle dotor sangtat.
Adim Gõykar, social drink he toren mansugi samballun
piyetalo punn atam dusrea Rajantlea loka bhoxen Gõykar
xime bhair pavla mhonn 25% sorean zalelim mornnam,
soreachem noxtt unnem korunk Gõykarank xiddkavnni
dita.
Zonn eklean aplea jivachi kalji ghenvchi asta.
Fugsanv, festam, ladayeno, kazarank funkot soro
piyepak mellta mhonn ghonntint ravchem nhoi. Zolm,
kazaracho dis ani yer dusre suvalleank (celebrations)
whiskey, brandy, rum ditat tem hanv ghenam mhonn tum
bore bhoxen zannai. Bar-anim vochun piyepachem hem
mhaka tor bilkull avoddnam. Ani hech khatir mhozo dose
ghora kodden kortam ani daddleaponn samballtam.
Tem hanv manttam tujem. Punn aiche disalear chhapun
aille khobren, mhozo jiv bhiela. Voiz astat te, aplea
duentink favo tim vokhoddam ditat ani kitlo dose
ghenvcho asa tem sangtat. Hea fuddem hanv ditam
titloch tuzo dose ghenvcho.
Mhonntokoch, hanv tuka Inas-a bhoxen zallo zai
kitem? Kai borelo xezari Inas amcho. Avoi-bapaichea
xistin vaddlolo bhurgo to. Ganvant taka khub nanv
aslem. Bailen taka piddear kela mhonn lok uloita. Taka
bail gavlea ti charismatic khoim. Inas-ak ghorant
soro piyeunk dinam. Dekhunuch tannem barant vochun
soro piyepachem dorlem. Aikolam, bar choloitele
antichea mogan poddla mhonn to. Borelea dadleak
piddear korunk konn bazabdar? Hanspachi gozal
mhonnlear, Inas-ache charasmatic bailecho bapui, don
soreachim baram choloita khoim. Him dhongiponnam
nhoi?
Jevnachea mezar jevonn kaddlem ani bhurgeank
apoilim. Ragar zavn rostin kuznantlo koddsorun ghello
ghorkar kitem korta kai mhonn ti pollevn gheli zalear
tigelo ghorkar Babit nhesun bhair sorunk toyar zallo
tinnem pollelo.
Tum khoim vochunk toyar zalai?
Sometimes I must taste outside food like Inas
Naka! Naka saiba!!! (tinnem ekuch dhanv marli ani
don-ui sorea botleo ghevn aili) He ge botleo. Hanvem
aikolam
Kitem aikolam? Babitan vicharlem
Inas-an, aple bailechem gurguret ritem soddun
anticho garrafão bhorla mhonn.
CHINTUNK: Thodde pavtti ghorkara vorn bailechi
huxarkai marog poddtta.
Lino B. Dourado
http://www.goa-world.com/goa/poems
http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado
__________________________________________________
Do You Yahoo!?
Tired of spam? Yahoo! Mail has the best spam protection around
http://mail.yahoo.com
