www.goa-world.com Quality. Precision. Professional.
Gulf-Goans e-Newsletter
Ambelechea novea kopelacher axirvad
Osonnem firgojentlea Ambelea vaddeantlea Lourdes Saibinnichea novea kopelacher
Janerache 24ver Mha Gonvlli Bap Filipe Neri Ferrao-n axirvad ghalo. Adlem Kopel
bandunk Novembrache 10ver, 1904 vorsa buniadi fator bosoilolo ani Dezembrache
15ver, 1917 vorsa bhavarteank tem ugtem kelem. Halinche poristhiti pormannem
tem vaddoupachi goroz disun aili ani atancho Kopelanv Pri. Januario da Costan
fuddem sorun hea kamak hat ghalo. Maiache 15ver, 2006 vorsa buniad ghali. Ho
vavr toddik pavoupak vaddeantle dor eke familin ghoddta to adar dilo. Az tem
toyar zalem. Saibinn Maim Lourdes ganvant Bernadettak disti poddlear hea vorsa
150 vorsam bhortat tacho ugddas koso hea novea Kopelachi yadgiri zatoli.
7 kharveank 4 disamnim doriantle vattaile
Kalanguttchea doriant nistem pagunk gellea 7 zannancho ttrolor vhanvun gelo
ani te akantak sampoddle. Tanchea adarak Coast Guard pavun tankam doriantlem
voir kaddle. Ttrolerachem injin bond poddlem ani ttrolor vhanvun modem doriant
pavlo. 4 dis porian te khol doriant urle. Mobile fon laglea uprant tanchi
khobor gomli
Relve sthanar zagrutai dovorchi
Moddganv relve sthanacher koslim-i vaitt kortubam zainam zaunk pulisen
chotrayen zagrut ravchem mhonn Mukhel Montrean sanglem. Konkan relve sthana
lagim novem pulis bhett bandlam taka Mukhel Montrean bhett dili. Pulisen relve
sthanacher ratchim 11.00 tim sokallchim 7.00 vazum meren pulisen oglli zagrutay
samballchi mhonn tannem maglem.
Gõykar Pulis Odhikari Bossuetak Raxttrpoti medal
Hea vorsachea Lokraj disa Gõy Pulisentlea up-superintendent Xri Bossuet
Francisco de Araujo Magalhas Silva haka Raxttrpotichi medal favo zalea mhonn
jahir kelam. Xri Silva 1987 vorsa up-inspektor koso pulisent bhitor sorlo ani
1998 vorsa taka pulis inspektor kelo. 1991 vorsa Ribandar Mondirant ani
Igorjent chori kellea choranchea pongddak tannem sampddaile, toxech vahanan
ani khun korpachea sumar 30 kexi tannem hatallleat ani 2006 vorsa Moddganv
relve sthanacher Kaxmirchea akantvadeak dhorla.
Gõychea Pollution Control Mondollak Kendrachi maneotai
Gõyantlea Pollution Control Mondollak Kendr Poriavoronn ani Ranam Montraloyen
maneotai dilea. Hi maneotay mellop mhonnlear, je proyog Gõy Pollution Control
Mondollache proyog-xallent kortat team sogleank Kendr montraloyechi maneotay
melllolea porim zalem, oxem GSPCB-cho odheokx Dr. L. Joshin sanglem. Atam
Dillichea National Accreditation Bureau Limited-achi maneotai maglea. Zor eka
vorsan hi maneotai mellot zalear Gõychea mondollant kortat team proyogank
soglea sonvsarant mandun ghetole mhonn Dr. Joshin sanglem.
63 vorsam uprant Gõyant thonddai choddli
Gõyant heam disamnim thonddai poddot asa. Osli thonddai 63 vorsam adli
poddloli. Janerache 28ver poddleli thonddai 15.5 ddigri selsiusache
mercury-cher pavli. Gõychea hovaman khateache khobre pormannem uttor Bharotant
marekar thonddai poddlea ani thoim thaun ti Gõyant pavlea. Haka lagun fattleam
disamnim Gõyant thonddai chodd vaddlea. 1981 vorsache thondaychea kallar Gõyant
15.8 ddigri selsius zaloli mhonn sangtat. Toxench 1945 vorsa 14.4 ddigri
selsius thonddi poddloli mhonn nond zalelem asa. Fuddleam kaim disamnim
thonddai anik-ui chodd zatoli mhonn sangtat.
Poliech Pavtt AIDS piddecher zannkaranchi boska
Poilech pavtt AIDS piddecher Asientle zannkar, khasdar, nagrik somaz sonvstha
ani vokhdancheo songhottnna Janerache 27ver Ponnje Kala Akademint zali. Hi
boska Kala Asian Consortium and Drugs Use, HIV, AIDS Poverty hannim ghoddun
haddli. 27 desanche protinidhi he boskek hajir zale. Tannim AIDS pidde vixim
bhasabhas keli ani ti pidda fuddem vaddonam zaunk upai gheupachem tharailem.
Ekvottit Raxttranche karaivollin odmas kellea pormannem 30% AIDS-achi pidda
vistarun veta ti gungi vokhdanchem injeksanvam kortat dekhun zata mhonntat.
Asient 13 milhanv lok gungi injeksanvam ghetat, hache vorvim HIV ekachi dusreak
vet mhonntat.
Pri.Nascimentachea pustokachi ugtavnni
Saliganvcho Pri.Nascimento Mascarenhas hache novea pustokachi ugtavnni Gõy
Damanvcho Mha Gonvlli Bapachea hatantlean Janerachea 30ver JMJ Hospitalachea
vosreant zali. Hem pustok itihasik Bardezchea kristanvponn bhitor sorlolea 1555
vorsa thavn vavurloleam padrim vixim asa. Tannim 26 Igorzeo sthapleo ani tanche
vigar zale. Toxench 1765 thaun Gõykar padrimnim vigarki choloili, tanchem dor
ekleacheo nemnnuko tannem bariksannen dileat. Pri Nasimentachea hatantlim oslim
anik-ui pustokam bhair sorchim asat. Taka V.Ixtt-achim porbim.
Kristanv Magas zati OBC vollerint poddtoleo
Khobor melllea tea pormannem Gõychea Kristanv Magas zatink ani somazank
OBC-chea Kendri vollerint bhitor kaddpacho vell aila. Kristanv mhalo,teli,
render, khumbar, mhar, adi. he somaz magas zatinche vollerint ghalinastanam
khup vorsam fattim urleat, tantleam thoddeank tori atam vollerint ghaltole
mhonn ravtat. He somaz arthik, somajik ani xikxonnik mollar khup fattim urleat.
Atanchea kallar mixinamnim vavr kortat mhonn heam somazancho lok kam nastanam
bekar urla.
Bhroxttacharant poddum nakat Digambar odhikareank sangta
Mukhel Montri Digambar Kamatan Xar ani Nogor Yevzonne Khateacheam odhikareank
kosleach bhroxttacharant hat ghalun nakat mhonn sanglam. Avchit Xar ani Nogor
Yevzonn Khateche kocherint Xri Kamatan bhett dili ani thoim vavr koso cholta,
tachi pollevnni keli. Soglim kamam nemlolea vellar korchim mhonnlem. Lokacheo
bandavollincheo faili 15 disam modem ani zomnichea rupantorancheo faili 10
disam modem toyar korun lokak diuncheo mhonn tannem hukum dilo.
Kheddeamnim vikas korunk mukhel montreachem utor
Gõycheam kheddeam ganvamnim sogle torechem sudarop korpak Mukhel Montri Xri
Digambar Kamat asvason dilem. Sattarintlea Bhuimpal ganvant bandlole iskolache
nove imarotichi ugtavnni kelea uprant Xri Kamat uloilo. Sattari talukant
sudarop korpak odik lokx ghalolean, lokachea boreponna khatir veg-veglleo
yevzonneo chalik laitat mhonn Xri Vishwajeet Ranen uloitanam sanglem.
Sattarintlea Dabos ani Velus ganvamnim pul bandunk mukhel montri Digambar
Kamatan buniaidicho fator bosoila, tacho khoroch 3.5 krutt rupia zatolo mhonn
odmas kela.
Ponnje xarant pay parking
Ponnje xarant pay parking korunk Ponnjeche Mhanogorpaliken ani Traffic
Cell-an ghetlole boskent nirnnoi ghetla. He boskek Bizle Khateache ani Bhouxik
Vavra Khateache odhikari hajir asle. Dayanand Bandodkar Marg, Mhatma Gandhi
Road hangasor pay parking kaido Marsachea mhoineant thavn suru kortole mhonn
khobrentlean gomlam.
Merxe Osmitayecho Dis palllo
Merxes ganvantleam lokamnim Lokmotachea Disa nimitan Gõyche Osmitayecho Dis
monoilo. Panchayatichea ghorant khas dobazo ghoddun haddlo. Gõychea Mhan putak
Dr. Jack de Sequeirak xrodhanjoli vompli ani tacho ugddas kelo.
Raxttrik Rozghar Yevzonn Gõyant chalik laitat
Gõycho sorkar xikloleam bekareank nokreo mellpa khatir Raxttrik Rozghar Yevzonn
suru korpacho asa. He yevzonnechem boreponn kheddeamnim bekar asloleank
melltolem mhonn somzotat. Sorkar yevzonneo suru korta, tancho faido lokan
gheunk zai. Don vorsam fattim ek yevzonn chalik punn tacho boro vistar zalonam.
Bekarponn pois korpak loka modem sorkarachea yevzonneachi zagrutai haddunk
NREGS yevzonne khala xikloleam bekareank 500 nokreo melltoleo mhonntat.
DKA-chim Mandd Sobhannak porbim
Janerache 26ver ani 27ver Mungllurant mandd Sobhann he sonvskrutik sonvsthen 40
vorsam thambonastanam Konknni gitam gavpachi karyavoll korun Konknnik Guinness
Book of Records-ant pavoili dekhun Dalgado Konknni Akademin (DKA) Mandd Sobhann
sonvsthek porbim dileant. Mandd Sobhann sonvsthen he karyavolli udexim Konknnik
sonvsarchea panvddear pavoili ani Konknnichem nanv sonvsarbhor fankivont kelem.
Tannim kelolea hea vavrachi ani karyachi Dalgado Konknni Akademi tust-tokhnnai
korta ani te sonvsthek kallzantlean porbim dita oxem DKA-cho odheokx Premanand
Lotlikaran pattoilelea potrokant mhonnlam. Hache poilim, 36 voram gitam gavun
Brazil desantle Comunidade Evangelica Luterna Sao Paulo sonvsthen 2004 vorsa
rikordd ghoddoilolo.
Save as> to download star_tip_hat_md_wht.gif!"
src="http://eknp.com/clipart/ani/star_tip_hat_md_wht.gif";>
Lapitt
---------------------------------
Be a better friend, newshound, and know-it-all with Yahoo! Mobile. Try it now.
![http://eknp.com/clipart/ani/star_tip_hat_md_wht.gif"](http://eknp.com/clipart/ani/star_tip_hat_md_wht.gif"){kind=link}