TSKK RUPEA UTSOVACHI SOMAROP KARIAVOLL
Svagot ulovp
Pratap Naik, S.J.
28 . 03 . 2008
Somestank Dev bori sanz magtam.
Thomas Stephens Konknni Kendrachea Rupea Utsovachea Somarop Kariavolliche
mukhel soire Gõy Arch diosejiche Arsebisp Fillip Nerri Ferrão, Karnataka
Konkani Sahitya Akademiche odheokx ani Mandd Sobhannche gurkar manest Eric
Ozario, Konkani Bhasha Mandal, Gõy hache odheokx manest Purnanand Chari,
Dalgado Konknni Akademiche odheokx ani tiatrist manest Premanand Lotlikar,
Romi Lipi Action Front hache fuddari ani nanvadik tiatrist manest Wilson
Mazarello, Gõy Jezvit prantache vhodil Fr Anthony da Silva, Antonio Pereira
Konknni Puroskarache hea vorsache man'kari manest Yusuf Sheikh, Konknni
Martir Floriano Vaz Puroskarache onvdunche man'kari manest Daniel de Souza,
Kendrachea puroskaranche adle amche man'kari, Kendrak adar korpi, borem
magpi, Kendrant adim seva dil'lim, ani Thomas Stephens Konknni Kendrachea
Rupea Utsovachea somapt kariavollolik hajir aslolea soireamno, tumkam
somestank Kendra torfen he kariavollik svagot kortam. Aichi hi sanz tumchea
kallzant Konknnichi divli zolloyt ravum hich amchi axa.
Thomas Stephens Konknni Kendr registtor zaloleak porum Mars 29 tarker 25
vorsam bhorlim. To dis thavn az meren Kendr, hem vors aplem Rupea Utsovachem
Vors mhonn pallta. Eke sonvsthechem auk xem'bor vorsanchea gottamni meztat.
Kiteak sonvsthechem auk lamb asta. Punn Konknnichea mollar chodd korun
Gõyant ek sonvstha 25 vorsam thambonastana Konknnicho vavr korit zalear,
tika aplem mhonnlolem bandop and gorjecheo suvidha asat tor, ti ek ozapachi
gozal mhonnunk zai. Kiteak Gõyant char chovgam modem Konknnik mukhel man ani
sthan na. Ti xikop nasloleanchi, sadea lokachi, ganvamni ravpi lokachi,
cheplolea lokachi dolitanchi bhas oslem chintop Gõyant azun asa.. Oslea
dolit lokache bhaxe khatir hem Kendr sorkaracho, dhondekarancho, grest
lokancho ani igorjechea vhoddilancho kosloch adar nastana fokot sadea
lokachea ani amchea ixttancha adaran pattlim 25 vorsam pasun Jezvitanchem
hem Kendr Konknni khatir kam' korit asa. Kendrant amche avoybhaxe Konknni
khatir kam' korpi ami dolit zaleanv. Tachem amkam dukh va khont na. Ulttench
zalear obhiman ani dhadoskay asa. Gõyant jem Konknnichem chitr dista tem
samkem niraxi korchem tosolem. Disan dis hanga Konknnicho vapor unno zait
chol'la. Oslea vatavoronnant pattlea 25 vorsamni hea Kendran Konknni khatir
zaitem kelam. Tea kamanchi volleri hanvem atam sangchi goroz na. Mottvean
itlench sangtam. Konknni sonvsar lhan. Hea lhan Konknni sonvsara modem
vantte fantte chodd. Itlem asun soit hem Kendr Devonagori, Kon'nodd ani Romi
hea tinui lipeamni kam' korta ani zat kat, dhorm, rong, lipi, votthar osle
bhedbhav nastana Konknni xikunk mon asloleank apli seva dita. Bhaxechea
mollar ji onit Gõyant cholta ti zaiteank disona ani dislearu-i tichem konnak
poddlolem na. Gõyant Devanogori lipie borabor Romi lipiek sogllea
panvddeancher odhikrut soman dorzo ani hok mellunk zai mhonn ji chollvoll
cholta tantum Kendran fuddakar ghetla oniti virodh Kendran avaz uttoyla ani
lokak zagoyla. Hem Kendr avaz naslolea sadea lokacho avaz zalam. Haka lagun
zaite zonn Kendracher zolltat. Punn amkam tancho rag na. Tancho ragxinn ani
ttika amchea vavrak sarem zata ani kam' korchi umed vaddta. Konknni mollar
amchea kaim zonnamni posorchem "ek bhas, ek lipi, ek somaz" hem ghatmari ani
vikall totv Kendr mandun ghena. Tachea zagear "vividotayent ekvott" hem totv
Kendr pallta. Heach totvak lagun az hanga bras Bendda borabor chovguddo-i
vazta. Keyboard asa, toxench toblem, petti hancho-i vapor zata. Gof, bonder,
sotri, fulam, follam ani bhajeo ekttãy distat. Konknni Bhasha Manda-lacho
Odheokx Purnanand bab, Dalgado Konknni Akademicho odheokx Premanand bab,
Romi Lipi action Front-acho Wilson bab ani Karnatak Konkani Sahitya
Academy-cho odheokx Eric Bab hankam Kendrache ekech manchier manacho zago
dila. Manchier ani manchie sokoil bosloleam modem Kristanv, Hindu ani
Musolman dhormachim mon'xam asat ani vivid bhesamni sobtat. Hem Kendr
priticho, xanticho, niticho, xisticho, bhokticho, ani ekvottacho axrom'.
Konknni mollar zaiteo sonvstha asat. Tantli ek lhan sonvstha mhonnlear Gõy
prantachea Jezvitanchem hem Kendr. Lhan punn mohotvachi sonvstha. Zem kitem
az meren hea Kendran kelam tache poros chodd azun korunk asa. Punn 25
vorsanchea onubhovan kaim dubav va prosn motint yetat. Her mollamni ami kam'
kel'lem zalear az amkam man asta aslo. Konknni khatir itlim vorsam ami
khorchilim. Punn amchem jivit, vell, takot ani duddu ami Konknni khatir
vibaddunk nam mu? Kendrak 50 vorsam zatana hea Kendrant Konknnicho eklo tori
Jezvit zannkar astolo gai? 50 vorsam uprant hanga Konknnicho vavr zatolo va
Kendrachem nanv mat urun vavr veglloch zauncho na mu? Tea vellar Gõyant
Konknni kitli urtoli? Tika Gõyant az fuddar na to 50 vorsam uprant kitlo
astolo? Pattlea 25 vorsam pasun Jezvit sonvsthen Kendrak dil'lo poixeancho
adar hea vorsa Abril 1 tarke pasun bond zatolo. Fuddem Kendracho fuddar
kitem? Lokacho adar mellonaslear kitle dis hem Kendr choltolem? Hea
prosnancheo zapo hanv oxeo ditam:
Je meren ami Konknni mon'xam, amchea ghoramni, ghorchea mon'xam lagim ani
her Konknni mon'xam lagim Konknni uloynanv;
Je meren xiklolim ani apnnak vhodd mhonn somzupi mon'xam aplea ghorant
toxench ghora bhair aplea soiream ani ixttam lagim Konknni uloynant;
Je meren ami sogllim Konknni vachinant, boroynant ani xikonant;
Je meren 'rego Konknni' mhonnje konnakui "are, ture, re, ani go" vaporun
ulounchi hi sokoilea panvddeachi Konknni soddun diun ami herank man diun
ulounchi Konknni apnnaynanv;
Je meren amchea igorzamni, mondiramni ani her dharmik zageamni Konknnik
poilo, voilo ani vhoddlo zago mellona;
Je meren Konknni kariavolli korunk ani her Konknnicho vavr korunk ami amche
duddu moddinastana sorkari duddvancher porixodo, sommelonam, ani her kamam
korunk sodtanv;
Je meren Gõyant Romi ani Devonagori hea donu-i lipiank ani tantum borounche
Konknnik soman ani odhikrut maneotay ani hok mellonant ani sod'deak
Konknnichea mollar asa ti onit kaddunk ami hatbott laynanv;
Je meren Konknni kolakarank ani Konknnichea vivid mollamni kam' kortoleank
ami amcho purto tenko dinanv;
Je meren Konknnicho fuddar amchea hatant asa ani amich tika samballunk asa
ani fuddem vhorunk asa hem sot vollkun gheun vavr koinanv;
Te meren Gõyant Konknnik fuddar na. Sonvskrut ani Latin heo vhoddleo bhaso
lokachea tondda veleo morun geleo. Konknni morun vochunk chodd vorsam nakat.
"Gõyant Konknni mornache tonnir pavlea" oxem amcho mhalgoddo Antonio Piedade
Morais bab sangot asa. Hi bhas samballun voir haddchi zobabdari amchi
soglleanchi. Vorsak 12 lak rupia ami hea Kendrant khorch kortanv. Vyovosayik
pod'doticher hem Kendr cholounk unne mhonnlear 25 lak vorsak zai poddtole.
Konknnichea mollar Kendrachi nodor mollbak tenkta. Tollmollin kam' korpi mon'xam
amche lagim asat. Ami fokot poixeamni unne poddtanv. Hi sot gozal tumkam
sangunk amkam loz na. Kiteak survatekuch sanglam, Konknnichem kam' kortana
ami dolit zaleanv ani bhikari urleanv. Bhikareak bhik magunk loz na. Tumcho
adar amkam mell'lo zalear hea fuddlea vorsamni Kendrant Konknnicho azun boro
vavr zatolo. Amche hat tumi ghott korat ani ami Konknnicho vavr korit
ravtoleanv. Tumcho adar amkam melltolo mhonn ami axeun ravtanv.
Aiche he kariavollik tumi Kendrachea mogan ailim dekhun Kendra torfen adim
fuddench hanv tumkam Dev borem korum mhonntam. Amcho tumcho mogacho band
ghott urum. Amchea ghoramni, vaddeamni, ganvamni amchi avoybhas Konknni
vaddot vochum hich Kendrachi axa ani sopon.. Dev Borem Korum.
