Sorgar, Sant-Bhokt Uronk Nant?
Sunkrar! Kuwait -an suttecho dis. Goddealir nodor marli. Sokallchim 9.35
vazlelim. Anik toddo vell bed-ir sarunk dislem. Dolle mat dampil’le. Fon vazlo.
“Hello”
“Good morning Lino bab,” roddkulo avaz tagelo.
“Konn? Rosario ?” Tacho roddkulo avaz aikun, mhojem kalliz ghoss zalem.
“Oi!” Odik bhavnnink (emotional) zaun tannem zap dili.
“Zalem kitem? Sogloch gaborlelea porim uloita tum! Asa khoinsor? Koslench vaitt
ghoddlele nam mu?” hanvem vichar kele.
Tachi zap bond zali. Mhojem mon bara kodden dhanvlem. Aksident bha zaunk nam
mu? Mottor gaddi vegan vo speedin cholovpi nhoi to. Apnalem driving sodanch
defensive korpi. Trasant poddlo kay? Toxem zaunk kharanuch naslem. Taka koslech
vaitt gunn nhoi mhunn vaitt sonvoim-io nant.. Tori astam mhojem mon kachabull
zal’lem. Sokall fuddench dukhi kiteak kay?
Rosario, eke komponint IT Manager mhunn nokri korta. IT-chem kam’ to polleta.
Komponicho dhoni Lebanese Khristanv aslelean offisant choddxe kamdar Khristanv
asat. Kompuittor moddlo vo virus bhitor sorlo ani her barik-sarik kam’ ailear
Rosario vhodda huxarkayen tem polleta. Ani hakach lagon protek kompuittoran
konn-konnem, kitem-kitem bhorlelem vo download kelelem asa tem to zannam zaunk
pavta. Choddan-chodd Gõykar Khristanv kamdar mhonntoch desktop ani dusrea gupit
zagear dhormik chitram distat Toddeanchea kompuittoran sorgavele sogle
Sant-Bhokt kherit rozar-magnnem borobor download kelele to polleta. Ek-eklechea
kompuittoran 20 tem 25 Sant-Bhoktachea fotvam soit magnnim asat tim pollelear,
sorgar ekui Sant uronk nam mhunn Rosario-chem mon keddna-keddna-i gansot
ravta.
“Hanv, Kuwait-che igorjexim asam. Mhoji bail, hanv ani bhurgim 8 horanchea
Misak ailolim.” Borech vellan tannem zap dili.
“Sokallchem 9 horanchem Mis suru zalem astelem ani 8 horanchea Misak ailolo lok
ghora portolo astolo. Tumi thoinsor kitem kortat?” Hanvem vicharlem.
“Mhaka dog-o dhuvo asat mhunn tuka bhes bori khobor asa. Mhoje bailen dusro
gorb samballolo tednam hanv Devak sarkoch lagim ailolom. Mhaka dusrem bhurgem
dita zalear cheddo di mhunn sorgavelea sogle Sant-Bhoktam thaim maglelem……..”
“Are papia, poilincho lok sorgavele Sant-Bhoktancheo mhurteo salantle
volotorint dovortale ani atam, soglle Santachim chitram kompuittoran. Zalear,
tuji magnnim aikunk khoincho Sant sorgar astolo? Ani hench kharan tuje bailek
dusre pavttik-ui cheddum zolmunk.” Il’lixi foddnixi korun hanvem taka ugddas
kelo.
“Tujem khorem! Ani hech pasot aiz hanv Misak ailolom. Hanv ganvan
Quepem-Ambelim-cho. Tumche Utodd’de ani amche ganvchi askarin zaun asa Lourdes
Saibinn. Mhoje bailen tisro gorb samballa. He pavtti amkam put di mhunn soglea
bhavartan ani bhorvoxean Saibinnim thaim magtolom mhunn Igorjichea grotto-xim
gelom zalear, adli Lourdes Saibinnichi mhurti disli nam. Mhaka sok’k bhogla.
Lourdes Saibinnichi povitr mhurti, Bisopan download vo dhenvoun tichea svater
‘MAMA MARY’-k choddoilea.”
“Arre! Tum khoinchea sonvsarant asa? ‘MAMA MARY’ novi mhurti bosoilear aiz
unnench 8 mhoinem zait aile. Setebrache 8ver 2007vorsa Saibinnichi nove mhurtik
ani altarak axirvadd ghatlolo. Hea 8 mhoineam purtim Kuwait-che igorjek
ghel’loch na re tum?” hanvem ojeapun vicharlem.
“Vhetalom. Igorjichea samkara parking asa thoim gaddi dovortalom ani Mis
somplea uprant tabortob sumanantlem shopping korunk City Center -an dhanvtalom.”
“Ham! Oxem? Goroz poddli mhunn tum Saibinnink mellunk ailo? Aik papia. Saibinn
ekuch. Tika ami, sabar nanvanim vollkotat. Saibinn amchi avoy mhunn vollkunk
‘Mama Mary’ hea nanvan novi mhurti bosoilea tatunt povitr orth asa. Bhavartan
mag. Zerul amchi povitr avoy tujem magnnem aikoteli. Ani somoz, he pavtti
babulo mhunn.”
“Tuje anvdde ani mhojim magnnim Saibinnin aikolim, oxem sozmotam.”
“Ek ugddas dor Rosario . Udkachi baim rakhtolo tanek moronam. Bhavartan,
Devachea darar martolo ritea hatanim yenam.”
Lino B. Dourado
____________________________________________________________________________________
Be a better friend, newshound, and
know-it-all with Yahoo! Mobile. Try it now.
http://mobile.yahoo.com/;_ylt=Ahu06i62sR8HDtDypao8Wcj9tAcJ
