Ani Ek Film Gõychem Nanv Pidder Korchelem?
Sonvsar bhor famad zal’lem somplele Raj Kapurachem ‘Bobby’ film-an, sokall tem
sanj nidonk vocho meren Gõykar sorea bottlik ghott veng marun asta tem
dakhoitanam Gõychi soimbik sobitay, nitoll dhove renvecheo dorya vello ani her
sabar nazuk dekhavenim nettoilelem film dakhoun nhoinch dexi punn pordexi
bhonvddekarank porian pixear kaddle. ‘Bobby’ filma udexim Gõyant odik
bhonvddekar lottun yevpak tea khallar suru zal’le mhunn sangpak, hanv chukonam.
Gõycho xant-xitoll varo ani udhar opurbayechea kallzanim vengoitolo lokam
bhorim mekleaponnan Gõyant bhovunk zatelean, bhonvddekarank amchem bhangara
sarkelem Gõy, ek sorg koso zala.
‘Bobby’ filma fattlean anikui khub filmanim Gõykar bedde mhunn dhakoilam. Punn
aiz meren Gõykaranim koddok nixedh marlolo disonam. Dusrea Rajeanim tanchea
sonskrutticher vo porampora chalicher toddem bhov add, Hindi filmanim
dhakoilear, thoinsorlo lok filmacho proig choltelea sinema hollancher akromonn
korun ani tem film nakarunk fattim soronant. Punn amchea Gõyant?
Susegad-ponnacho faido ghetat kay?
Dan Brown-ache kadamboricher adharun Povitr Sobhecher ani Povitr Pustokacher
akromonn korun Khristi lokachim bhavnnam dukhoitelem Inglez film ‘Da Vinci
Code’ Ponnjent ani Gõybhor dhakovchem bond kel’lem asa. Hech toren ami zagrut
zaun Gõykar bedde ani sodholl sobhavacheo (loose characters) ostoreo mhunn
dhakoitelea Hindi filmacher nixedh porgottun, Gõychea sinemachea podd’dear
dhakovpachim bond korunk zai aslim.
Gõyche dottorer film kaddpak porvongi ditanam Gõychea sorkarachea hasrea khal
aslele ‘Entertainment Society of Goa’ hanchea odhikareanim filmachi script
topasni korun, Gõykaranchim bhavnam dukhovpa sarkelem kitem-i aslear filmachim
shotting-am Gõyant kaddpachim bond uddounk zai. Ghoddie fuddarak Bollywood
Hindi filmache digdorspeanchea monar uzvadd poddunk xoktta.
Ani atam anek toren Gõychem ani Gõykaranchem nanv piddear korunk ‘Rave Party’
hea nanvanchem film Bollywood-acho digdorspi Prabhakar Shukla kaddunk yevjita
mhunn ami potrancher vachlam. Hem film, Brittix bhovnddekan Scarlet Keeling 15
vorsanche cholyek Anjuna ugte veller vikallim vogddam, soro piyeun ticher
bholatkar ani kunn zal’le khore ghoddnecher adharun astelem mhunn uloitat.
Scarlett-ache bangoddint mottea babuncho hat asa oxem zaite zann uloile aikun
yeta. Hem film toyar zalem zalear fott asa thoim sot korun ani ek dag Gõycher
ani Goykarancher thaptolo. Ani adim Gõykar-Khristanv sinema podd’dear bedde
dakhoitale, atam fuddarak vikallim vogddam vinkpi, pirai bhorunk naslelea
bhurgeacher bholatkar korpi ani kunni mhunn sinemachea podd’dear distele. Hem
unnemponnachem chepem
amchea mhattear poddche poilim ani ‘RAVE PARTY’ filmache shooting suru zaunche
adim ‘Entertaintment Society of Goa’ odhikareanim koddok pavlam ghevn filmachi
script polloupachi gozoz. Toxem korunk kaido nam zalear unchlea kotantleant
kaido korunk ghenvcho. (Sorkarak zai zalear sogllench zata) Ami susegad khore!
Punn amchem ant-pint challvolem zalear ‘susegad’-acho dusro rong dhakovpak
Gõykar fattim nant. Ho mat ugddas dorcho.
Lino B. Dourado
____________________________________________________________________________________
Be a better friend, newshound, and
know-it-all with Yahoo! Mobile. Try it now.
http://mobile.yahoo.com/;_ylt=Ahu06i62sR8HDtDypao8Wcj9tAcJ
