---------------------------------------------------------------------------
**** http://www.GOANET.org ****
---------------------------------------------------------------------------
5th Annual Konkan Fruit Fest
Promenade, D B Bandodkar Road, Panaji, Goa
16-18, May 2008
http://lists.goanet.org/pipermail/goanet-goanet.org/2008-May/073789.html
---------------------------------------------------------------------------
Ami Soglle Ek
Dhonia Devan rochlelea mon’xank sabar dhenneanim bhorla. Ani tatuntlem ek
dhennem mhonnlear somajik vavurpi. (social worker). Hem dhenneacho gunn
soglleam thaim disonam. Bhov toddeank to favla. Somajik vavurpi asa to,
apnacho adav (faido) ani vell polenastanam dusream khatir vavurta. Taka ganvcho
ani ganvant ravteleancho mog asta.
Ganvant ek prokolp (project) ailo ani to prokolp ganvank luksann korche korun
ganvchem nixonntonn korpa sarkelo aslear ganvcho lok nixedh marun rostear yeta.
(Dekhik: Halinch velle dhegenvelean aslelea Mazodd’de-Utodd’de-Kalata,
Betalbatim, Colva, Benavlim, Varca, Carmona ganvchea lokanim imaroti bandpacho
vorixt yevzonenk (mega projects) mottean avaz korun virodh dhakoilo.) Ani
lokacho ulo, lagu zatelea sorkari khateak pavchea khatir ek ganvcho fuddari
vichun kaddtat. Ani to fuddari somaz sevok asta. Ganvcho ukholl ani udorgott
kel’lea khatir somaz sevokak ganvcho lok man dita. Ganvche somudayecho ek boro
fuddari mhunn, sorkari torfen taka vo tika Gõychea Rajeacho Puroskar labta
Fattim kaim Gulf-anlea Gõykarank tanchea somajik vavra khatir Somudayeche
Fuddari mhunn Gõyche Rajeache Puroskar favleat. Punn toddeank te favo nhoi asle
mhunn aiz-kal internet-ar mottean tanchi tik’ka (critic) marleli vachunk
mellta. Kuwait-antui teg-am zannank Community Service Leadership Gõychea
Rajeacho Puroskar favleat. Dog fuddareank hanv porxim vollkotam punn tisro
vevsaik (profession) voiz, taka mat hanv porxim mellunk nam vo mellpachi sond
favli nam. GWS-acho odhex bab Wilson ani GCC-cho chairman Carmo, Gõyche
somudayen misoll zal’le hanvem pollelam punn voiz babachem nanv Club 9 hea
sonsthecho odhex zal’lo tedna hanvem Kuwaitche Inglez disanleancher vachlam.
Dotor baban, Gõyche somudayek khatir koslo vavr kela hem zanam zaunk, internet
gazoun todde Goyche somudayecho lok purave magtat. Taka puroskar favo nhoi aslo
oxe toren tik’ka martat ti bori asa punn, tache khasgi jivitacher attack
korunk, amkam kosloch odhikar nam.
Boro fuddari zatolo zalear somajik vavr korunk zay mhunn hem hanv man’nea
kortam. Punn todde pavtti toddeancho vavr somudayexim pavonam vo to pavloi bi
zalear to vollkunk ghevnk sadea mon’xank sozmonam zait. Oxem kitem tori dotor
baba sovem ghoddlam asot. Ani Gõychea sorkara torfen NRI komissionar Vokil
Eduardo Faleiro Kuwait-an ail’lo teddnam ghoddie, dotoracho vavr tache nodrek
vochun dotorak puroskar favla asot. Amche modim khub Gõykar asat. Uzvea hatant
kel’lo vavr dhavea hatak koloi nastanam somajik vavr kortat. Ghorant kamank
ail’lim trasant poddtat tednam aplea duddvanim vimanachi tikett diun Gõyem
daddtat. Futtboll khellant ek khellgoddi dukhovlo zalear taka duddvanchi mozot
ditat. Gõy ganv ghora opangull bhurgeank, toklen gorib asleleak (mentally
retarded), ashramant ani her sabar durboll zageancher duddu pattoun yogdan
(contribution) kortat. Oslea mon’xank mat Deva Bapa koddlean korele puroskar
favtat.
Poilech pavtti Gulf-antlea Gõykarank Gõyche Rajache Puroskar vanttpan ail’lean
te divpan chuk zali asot. Fuddarak osleo chuki nam zavpak ami ektthaim yeun
hacher bhasa-bhas korchea bodla ami eka-mekacher chikol martat. Zori tor hanvem
mhonnlem, fuddle khepek, Kuwait-an Gõyche somudayecho fuddari Kuwait-an zolm,
xikop ani vaddon vhodd zal’lo ganvant Bastorecho sodeak Kuwait-an tikann korun
aslolo Bab Ulysses Menezes-ak vichun kaddcho. Toddeank, hem mhojem sangop
vichirt distelem. Ho Ulysses konn? Tannem Gõykaram ani Somudaye pasot kitem
kelam? Prons kortele!
Kuwait-an internet sovloticho upeog kortolo Gõykar Gõycheo websites,
Goanet.org ani Goa-World.com noko mhunn nam. Goanet.org asa tem USA, UK, Canada
ani Gõyem aslele Gõykar bhav ektthaim ravun choloitat zalear, Goa-World.com
Ulysses baban aple bolsantle duddu moddun survattek ek chondd (hobby) koso
personal home page kel’li ti, Gõy ani Gõykarank ekttaim dovorchea pasot jivem
dovorlam. Ani aiz, sonvsarbhor ximpodlelea Gõykarank Gõycheo toxench her mahiti
mellunk Goa-world zaytea zannank faideachem zallam. Ani bab Ulysses-ak sohokar
diunk, bab Gasper Almeida ganvant Parrecho, websiticho moderator asa. Ulysses
babacho vavr vakanni korpa sarko. Goa-world-a velean amkam khub lab mellta ani
tovui-i zalear funkot. Mhunntoch, bab Ulysses porddea fattlean ravun, onek
toreacho Gõyche Somudayecho (Goan community) vavr kortaso zalo na?
Survatek hanvem mhonnlam. Devan sabar torechim dhennim mon’xank dileant. Ani
tatuntlem anik ek borovpachem dhennem. Ulysses ani Gasper babak, Devan dil’lea
borovpachea dhenneanim mothvachem yogdan internet-a veleam pavtti zata zalear,
Gõychea sorkaracheo chuki zatat teo nodrek haddun tik’ka marpi bab Anthony
Veronica Fernandes (ganvan Candolim) ‘Goa-Kranti’ websiti velean, mhelle
rajkarnni ani Gõy vixim xidduk ravunk aplea boroupanim Kuwait -an Gõyche
somudayen vhodd zagrutayechi seva korta. Kuwait-che Inglez potracher ani
websitir Kuwait-an aslelea Goykarachea angan asleli kola, khellam vixim ani
dusre sabar vixei asleleo mhullakoti ani lekh boroun Gõykarank ani Gõykar nhoi
asleleank.mahiti divnchem bhes borem kam’ Bab Gaspar Crasto (ganvan
Saxtti-Navelim) aplea bhuzar ghetat. Zalear, Kuwait-an Konknni somudayecho
onnbhov, vollok ani zankari aslelea mon’xanchea adharan, fuddarak; Gõyche
Somudayeche fuddari vichun kaddpacho vavr atam
thavn ami ekttaim yeun suru kelear koxem? Oxem korun ami soglle ek mhunn
dhayoea
Lino B. Dourado
