To 'Piece' Boro Aslo Moddganvche prasar Ponnje vochpi bosir choddlom. Bosint ekui rikami sitt nasli. Eke sundor cholie vangdda don sittache bosker bosun aslolo eka Verneche ixttak hanvem pollelo. Tache sorxim vochun ubo ravlom. Tannem mhaka voddkilo. Bholaikechi ani aili-poili khobor vicharlea uprant tannem ek shopping teli mhojea hatant dili. Hanvem ti uspili zalear don khumsache ani justuch khumsachea rongar bhostele kalsanvanche kuddke disle. Eka khumsacho piece dolleank bhorpa sarko aslo. Hanvem taka mhonnlem.
“Ho piece bhoro asa.” “Ghetolo?”. Tachea bazuk boslele choli, mhojea islean pollevn okosmat abuzz zaun mhaka vicharlem. “Discount dita?” Mhojea ixttan tika vicharlem. Tinnem apnnalem tondd ambot korun bosintlea zonnelantlean bhair polloit ravli. 1977 vorsant bazarant vo ani khoinsorui ek sundor choli disli zalear tornatte soroll comments martale. “Ho piece boro asa.” Ani tea vorsant oxem mhunnchelem ani sundor cholieank challoun ghalchelem ek fashion zavn gel’lem. Gorom toklechi tornatti choli aslear vo tichea barobor tigelo bhav vo nhovro sangatak aslear uzot ani keddnaim kestanvancher poddtalem. Punn tea disa bosint, mhoje ixttan apnnale kolsanv-khumsamchem vikott lugott ghetlelem tache vixim hanvem mhojem mot ditanam hanvem mhonntlelim utram te cholien apnnank laun ghetlelim. Hench mhaka vaitt dislem. Orxim hanv on-vollki (strangers) mon’xank zap divnk fattim. Mhagelo ixtt Verna Igorjexim bos stopar dhenvlo ani te bosker havem mhoje kulle tenkoile. Ti choli apnnalea vorixtt chintnamni guspollea porim bhair poit asli. Borea vellan hanvem tika zapoili “Excuse me.” Hanvem luan te choliek mhonnlem. “Tum?” Hanv tiche kuxik boslolo aslo to pollevn tinnem ojapun mhonnlem. Mhagelo ixtt keddnam meren thoinsorlo uttun gelo hi sudam tika khobor nasli. “Khorem mhonnlear tuje vixim hanvem comments marunk nam.” Mhojem sadeponn tika ghomoylem. “Zannam hanv.” “Tuka koxem koll’llem?” “Uprant tumi dog-ui nove kolsanv-khumsachi gozal kortale teddna aikolelem. Mhaka loz zali. Punn tujea ixttachi vaitt dislem mhaka. Discount dita kay mhonn vichari to. Taka, hanv konn dislim? Hanv ek….” “Toxem nhoi tem.” Tika uloichi bond korun hanvem mhojea ixttachi bazu ghevn fuddem sanglem. “Vepar ghetanam discount ani anponn korcheli taka sonvoim. Visor tem atam. Mhojem nanv Lino. Ani tumchem?” Amchi vollok ani ixttagott zali. Tinnem aplem nanv-ganv ani Ponnjent kiteak veta tenvuim bi mhaka gomoylem. Toddea vellachem kam’ tigelem. Uprant tinnem ani hanvem Miramar mellchem aslem. Orxim hanv mhoje torne pirayer cholieanchi ixttagott zoddunk khub fattim aslom. Punn tea disa, to 'piece' boro aslo. Lino B. Dourado
