GULAB-achi Chollvoll Khuim Pavlea?
Orxim to Konknni potram vo nemallim vachunk titlem mon dinam punn sumanantlem
potr Vavreaddeancho Ixtt internet-ar yeta tacher ek dhanvtti nodor
chukoinastamna ghalta. Konknni audio kasetti, CD, ani tiatr VCD Gõyam sakun
Kuveittan, khaxea yetlea tiatristam koddlean novin (original) vikot gheta na
tor aplea ghorcheank sangun Gõyam thavn dhaddunk sangta, punn Kuveittan
‘duplicate’ korun vikteleam koddsun keddnanch vikot ghena. Konknnicho taka mog
dekhunuch Konknni songit ani tiatrancheo CD vikott gheun ek onek torechem
yogdan (contribution) Konknni pasot korta. Kuveittan, Konknnilean kariavoll
asot zalear artik nodren adhar bhasaita, ani hech khatir aplo usko dakoun
tannem mhaka voilo prosn kelo.
Janerache 5ver 1983 vorsant Gulab-cho poilo ank, sorgest Fr. Freddy-n uzvaddak
haddlolo. Vorixtt tufanank fuddo korun zorot-morot ani apnnachi bholaiki
pollenastana dor mhoineache mhoineam Gulab nemallem vachpeanchea hatant
ghaltalo. Sorgest Pattiv, Gulab-achea rupea utsovachi vatt polloit astamna May
17ver 2004 vorsan taka, ani sangati boroinar Felicio Cardozo ani tanche ixtt
Franky Pires-ak marekar obseogan girasle. Uprant Gulab-achem bharadik vozonn
Simão bhaxen Fr. Freddy-chea bhavannim Fausto ani Fabianan aplea khandar ghevn
aplea bhavachi itsa, mhonnchem Gulab masikak rupea utsovachi medal favo keli.
Punn tech borabor artik (financial) poristhitek fuddo korunk zai naslelean,
mhoineachea mhoineank adle toren Gulab bhair sorcho na fokot tin mhoineam ek
pavtti, teddnam mat sogllea Konknni mogeank ek dhoko, dhokoch boslo.
Kuveittche Gõykaramnim Konknni khatir bhouch yogdan kelam. Romi Konknnilean
‘NOVEM GOEM’ ek disalem asunk ekvottan fuddem sorun duddvacho adhar kel’lo asa
(tea uprant kitem zalem ti dusri gozal) Konknnink Raj bhaxechi dorza mellunk
sotasot lakamnim duddvanchi mozot Konknni fuddareank pavoileli. Barik-mottea
Konknnichea vavran Kuveittche Gõykaran sodanch poilo zago ghetlolo asa ani
geta. Ani atam 25 vorsam ful’lolo Gulab-acho pormoll bavot vetam tem pollevn
khorele Konknni Gõykar zagrut zaleat. Ani Gulab-ak porot jivo dovorchea pasot
Kuveittche niz Konknni mogi fuddem sorun ek GULAB VAVURPI SOMITTI (Gulab
Working Committee) ghoddun haddlea..
Amcho, aicho Gõykar khaxelea aplea zolm dortorer xenlolo asa. Bharotantle
dusrea prantantlea lokachi urponz Gõyant sumana-sumanant choddot veta ani
bhailo lok subeij disunk lagla. Adim Gõychea xaranim ghelear Inglez xivai dusri
bhas mhonnlear bhov thoddi Hindi aikunk yetali punn atam xarantlem sodduch,
ganv-ganvanim ottra-ponas torecheo bhaso kannar sadovtat tednam ami khoreaninch
Gõy prantant asat? Hem somzunk aicho Gõykar ghonddollak sampoddla. Tintear
ghelear Bostão, Pedru, Jose, Caitan, Magdu, Sucorrin, hea nanvanchim mon’xam
bazarant astalim punn atam Uttapa, Sungttamkha, Mandpa, Utteli, Bosteli hea
mon’xanchea nanvanim ulo kelear, ‘tu’ khorun tondantli luti bhair udoun ulo
marteleak zap kortat ani roste ani imaroti tambdea rongan nettoitat.
Aicho Gõykar duddvanche dixen (direction) pollounk lagla ani vhoddilanim
dilelem daiz, sonskrutay ani osmitay (identity) visorla. Purvozanim samballun
dovorlelim bhatta-bensam, odik duddu melltat mhunn porkeank vinkun koslech tras
ghenastanam mell’leli dovloticher dolle dampun mouz ghetamna, tanchea
sorbhonvtim xezari lok ganvcho bhailo zala mhunn, hi az meren funkott
duddvachea nadar khelltolea Gõykarak zanniv na zavn thodde bhov Gõychea uskean
aslele Gõykar susegad Gõykarachi chall pollevn sontapla. Ani xevttim “mhoje
maim ge, pavat ge, chor aileat ge” oxeo bobo-huyelli galtanam ‘ghantti’,
xezareak boball ghaltoleachi baxea somzunam zavn chor akh’kench ghor lutun veta.
Zalear, thoddeach kallan amche Gõyant amchi maim-bhas nopoit zavpache doxer
pavteli ani kaim potram, nemallim Konknni jivi dovorunk vavurtat ti morunk
dilear ami amchoch fondd kaddlea porim zatelem. Amcho tallo ubarpak amchi
avoy-bhaxen aslelem potr vo nemallim nasun ami oronneant sandlelea porim amche
jivit zatelem. Dekhunuch mhagelea ixttan usko dakhoun mhaka vichar kelo.
“Kuveittan, Gulab-chi chollvoll khuim pavlea?”
GULAB mhoinalleacho prochar korunk, jahirati, denngi ektthavpak ani
GULAB-achea adharak her koslo-i prokolp (project) Kuveittant ghoddun haddpak
Kuveittche KALA MOGUI-KUWAIT sonsthek amchi maneotay asa. Gulab-che sompadpi
ani Uzvaddavpi Fausto V. Da Costa-n jahir kollovni keli teddnam GULAB-cheo
pakotteo odhik jhoddun nagddo zavnche adim ‘Kala Mogui’ sonstheche vangddeanim
25 vorsancho pormoll fuddem vorpacho vavr fattim-fuddem pollenastana apnnachea
khanddar ubharlo. Ani az ek niz Hindu-Kristi Konknni somudayecho zomo ektthaim
yeun ‘Gulab Vavurpi Somiti’ Gulab masikak novem jivit divnchea khatir ap-khuxen
vavurpak fuddem sorleat.
Kuveittant, Gulab-acho Rupea Utsov ani Konknni Sahity Puroskar Dhobazo
Agostache 15ver ghoddun haddpak kela. Ek kherit Gulab-acho ank Agostachea
mhoineant bhair sorcho asa. Kuveittche-Goykar sahity mollar, khellan (sports),
donddean, xikovpant, vevsaik mollant, kola, sonskruttik sonstha ani klub ani
somajik vavurpeancho ullek hea khas akant korchelo kela. Borovpeanim Inglez ani
Konknnin apli borpavoll July-chea 15 ver meren Gulab Vavurpi Somiti-chea
vangddeam thaim divnchi vo sompork 9391452 korcho. Gulab-cho dhobazo korunk
duddvancho khorch zatolo. Borea deknnaranim duddvanchi denngi, Gulab khas ankak
jahiriti, yadostik vo souvenir kaddtele taka tumcho adhar dilear Gulab-acheo
arthik (financial) poristhitek lagon paklleo pisolltat teo bhigoddpak pavncheo
nant. Odik tumi hea khariavollicho thoddo bhag tumchea khanddar ghetlear
mhonnchem, SPONSORS kose ravlear hem vhodd vojem unnem zatelem hatunt matui
dubhav nam.
Gulab dor mhoineam Konknni vachpeanchea ghorant pavchea khatir zonn eklea
Konknni Goykaran vavurchem asa. Gulab-an mhaka kitem dilam hem vicharchea adim
hanvem Gulab-ak kitem dilam ho ek vhodd xanneponnacho vichar korun ful na tor
paklli divn tuzo mog Konknni avoy sovem dakhouncho vell ho. Gulab-cho
vorgonnidar (subscriber) zaun tujem anek torechem contribution korum zata.
Kuveittan, topalatlean (by post) 5 vorsank pavtti korunk vorgonni KD 20 ani 3
vorsank KD 12. Gulab nemallem Gõyam ganv-ghora tuje familik pavtti zaunk
Bharotachea duddvam hixeoban tujean hangasor vorgonni farik korunk zata. Ani ek
vhodd akharan tuzo adhar, Gulab-acho pormoll nemit pormollunk zatalo, jeddnam
tuvem 10 tikettimni gunttlolo ‘RAFFLE’ KD 5 farik korun ugttea monan ek book
vikhott ghevn tuzo arthik sohokar dilear. Faleanchea disa Gulab pormollta
teddna tum tukach obhimanan polletolo ani tujea sohokaran Gulab-acho chomotkar
zalo dekhun tukach ghorv bhogtelem.
Tor “Utth Gõykara” Sorgest Fr. Freddy-n sthapllo ani rompil’lo GULAB jivo
dovorpak tujea ani mhojea hatant asa. Hoikari (positive) nodren fuddem chol…………
Lino B. Dourado
