---------------------------------------------------------------------------
**** http://www.GOANET.org ****
---------------------------------------------------------------------------
2008 International Goan Convention
Toronto, Canada
http://www.2008goanconvention.com
---------------------------------------------------------------------------
Vhaddtelea Bhurgeank Ekmullim Soddchi Nhoi
Junh, Julhay, Agost mhoineant ghosghoxeanim pavs zhoddta tednam bhair
khellchelo khell (outdoor games) bond poddun adlea (kompuittor, cable TV nasli
tea tempar) bhurgeanche borech hallavall zatale. Zanttim vo vhoddilam aslim tim
tablancho, kardancho (cards games) khell khellun pavsachea disamnim aplo vell
sartalim. Tednachea bhurgeank kardanim nhoi mhunn tablamnim khellunk monam
aslem. Tablam ani kardancho ek zugar khell, (gambling) adlim vhoddilam
somzotalim ani dekhunuch te khell bhurgeank khellunk dinaslim. Choddxim bhurgim
(indoor games) karom (carom) khell khelltalim. Punn ho carom board bhov thoddea
lokangher astalo. Lapittachea ghorant karom bordd aslelean, xezarchim
vhodd-lhan bhurgim tanger khellunk yetalim.
Karom khell khelltamna nagovop vo cheating kelear Lapitt-ak borich tiddok
martali. Choddxem cheddum monis nagovop kortalem. Karom-borddavelo gulio nanch
zataleo. Mhonnchem, Lapittache dolle add korun ‘gullio’ lohu-lohu korun
karomachea pokitan vetaleo. Ani jeddnam ti chori Lapittache nodrek zollkotoch
teddnam to lhan vo vhodd cheddo vo cheddum bhurgem mhunn somzo nastamna tankam
taptapak lagtalo, ani fotttingponnam kelear thodde pavtti karomacho striker
xevttun martalo to khoinchea zagear poddun dhukavoll zatali ti sangunk zai
naslem. Ani ek dis, tannem marlolo striker Mattutinachea nakar bosun rogtacho
xinvor zal’lo. Kestanv borench mottear poddlelem. Bhurgeanchea zhogddeanim
donui borele xezari ghorabe dusman zal’le. Hea goddboddan karom khellachi mukhi
tambddi ‘queen’ gull nach zal’li. Karomanchim charui pokitam sonspolim. Karom
khelltolo akh’khoch zago sodlo. Punn ‘queen’ khoinsoruch disli nam. ‘Queen’
gull geli khoim? Lapitt
chintunk urlo.
Lapitt ani Mattutina ekach pirayechim. Mhonnchem, dogaim 17 vo 18 vorsanchim
inosent tornattim. Zori karomachem kestanvan tanche donui xezari ghorabe
ixttagottin bigoddlele kore, tori astamna hea tornatteam modim dusmankai
nasli. Lapitt ani Mattutina khoinsoruch doddlim zalear addlech toren eka-mekhak
zapoitalim. Ani ek dis oxench toren gavlim tednam Mattutinan vicharlem.
“Atam karom khell koso chollta?”
“Tujea nakar striker marlo tea disa thavn karomacho khell bond poddla.”
“Queen gull sandli kitem?”
“Tuka koxem gomlem.?”
“Mhojea lagim asa ti ‘queen’. Tea disa karom-borddachea pokitan lottche suvater
hanvem mhojea vistidachea bolsan ghatleli.”
“Vistidachea bolsant? Kiteak?”
“Tumchea ghorant konnuch naslo. Somzolim, tumchea bhitorlea rumant tum mhaka
vorun ‘queen’ gull sodtolo. Punn, tunvem striker marun mhojem nak’ foddlem. Ho
mhaka rag asa.”
“Polle Mattutina. Ti mhoji chuk zali. Ani te chukik hanvem tuje thaim mafi
maglea. Atam upkar korun ‘queen’ di.”
“Ti vorunk mhojea ghora kodden yo.”
“Ani na yenam zalear?”
“Konnakui ditelim.”
Teach vorsa Novembrache survatek Diwalechea sutten Lapittache avoy- bapui
Lapitt-ak ghevn Belgaum shopping-ak ghel’lim. Sumar 8 disamnim portolea uprant
Mattutina, konn eklea dusre zatichea cheddea borabor pollun ghelem mhunn ek
vhodd niraxi gozal Lapittachea kannar poddli. Pollun ghevn vetolo,
Mattutinachea xezarchea ghorant baddean ravpi ek Kerelacho tornatto aslo.
“Punn kiteak? Pollun kiteak gelem tem?” Mattutina-chi khas guttachi ixttinn
Jensi thaim, Lapitt-an xinn korit vicharlem.
“Zori tunvem Queenie-nk ( Mattutinanchem pet-name Queenie aslem) atenção
(attention) dil’lem zalear oxem ghoddchem naslem.”
“Koslem atenção mhonnta tum?” Lapittan, vichar kelo.
“Queen gull vorunk tannem tuka apoilolo khoim”
“Oi! Punn, amche ghorcheank borem dischem naslem. Tacher striker marlolo tea
disa thavn hanv tangher bhitor sorunk na.”
“Dekhunuch tanchea xezareak ravpi Kerolkar Sabu guslo. Mattutinachim avoy-bapui
sodanch ratichim partiyank bhair bhonvtalim, ani tem ghorant ekmullem astalem.
Hacho faido Kerolkaran ghetlo.”
"Ani tannem kitem kelem?"
"Queeniecher 'striker' marun fulltea tornne jivitacher gavo ghatlo. Ani ti dukh
tache kusvean rochta. Dekkunuch avoy-bapaichea bhirantin tannim poll
kaddlea......
Lino B. Dourado
