Sorry! No Parking Zone. Lapittachi bail nidpachi toyari kortana, bed-iche lagsor koddelir bosun paper vachpi apnnalea ghorkarak ganjil musa porim ek kuns marchelem tika dislem. Vachinastana tea disachi kosli-i gozal Navhind Times-acher chukon urli zalear, ti vachlea xivai Lapitt nidunk vochonaslo. Disalear chappun ail’li ti ek lhanxi gozal zait. Punn, te khobrek Lapittachi bail arlem-losun laun suad ditana Lapittachem mostok mat, tiksamnin ulpaitali. “Tum mhaka khal sangatalo amche gayek ani songitkar Remo baban, Dabolim vimantola lagsor, tachi Hyundai Gezt gaddi No Parking Zone zagear dovorlele khatir, taka bhouch tras ani upott dhondd farik korcho poddtolo mhunn. Punn aichea disaleancher, chiri-miri 100 rupia dhondd farik korun ani Hyundai gaddiesoit tacho V sign ditolo fottu chappun aila.” “Punn ek vhodd xikil’le ani on’toraxttrik famad songitkaran lokachea jiva kodden khellop ani surokxea ibaddop mhunnchem ek lojechi gozal.” “Punn tannem apli oddchon CISF (Central Industrial Security Force) odhikareak kolloileli.” Remochi bazu ghevn Lapittachi bail uloili. “Monis kedoi vhodd zaum. Kaide mhonntat te soglleank ek sarkele astat. Az taka nanvosto ‘pop star’ mhunn oxoch soddun dil’lo zalear falleam khorele ‘bomb blast stars’ bomb-sfott korpa sarkelo gaddi ‘no parking zone’ zagear soddun vetele. Tednam inosent lokacho jiv luksonan poddtolo.” “Mhaka-i bhi konnacho-i jiv luksannank ghelolo naka. Punn, amcho Remo baban apli vollok dil’li astanai-i vimantollache surokxa samballpi odhikareamni tachem magnnem kannar dovorunk na. Remo-che zagear, Gõy luttpi, chor-beiman Montri aslo zalear, tachi red-light pettleli gaddi polloun ani salam marun koslich surokxechi topasnni korinastana vochunk dita asle.” Lapittachi bail rajkarnnanchi ttika marit uloili. “Porche disa Benglure ani Ahmedabad fattat-fatt bomb-sfott zalelean Bharotachea mukhel zageancher ani odhik korun vimantollancher surokxa vaddounk koddok huhum dil’lo asa, ani Gõyantu-i mottea promonnan lagu kela. Zaum to Remo vo dusre namneche mon’xamni (celebrities) surokxa pallchele kaide poile apnavun, dusreank bori dekh diunk zai.” “Mumbai vochpachem viman ‘Jet Airways’ suntpacho vell zalelean thakttichea boballar tannem chukun apli gaddi thoddea sekenddam khatir No Parking Zone dovorleli tedna CISF odhikareamni BDS (Bomb Disposal Squad) hankam fone kelo. Ani kitem kai mhonnlear bomb sodpea thaim bomb sodunk favo teo vostu nasleleo khoim. Ani oxe toren khorele bomb dovortolea zagear vochun BDS kitem kortele kai? Hem chintun fuddarak public zagear vochpachi hanvem nakarlam” “Puro, puro chodd zalem tujem. Uloita te toren VVIP (Very, Very Important Person) dista tum” “Goddie hanv sorkarak vo publikak nhoi zait. Punn mhojea ghorkarak ani bhurgeank ek khoreli VIP ghorkarn’n ani avoy zaun asam Benglur ani Ahmedabad bomb-sfottan khubuch inosent lok mela. Tanche jivitan konn tori tim aplea mogacheank VIP aslim. Remo baban apli vollok dili astamna-i vimantollache surokxa samballpi aikonant tedna apli motor-gaddi thoinch soddun gorjechea kama khatir Mumbai vochunk gelo to. Remo-nk bori vangnnunk diunk na kori, punn tache Hyundai motor-gaddiek mat soglli zotnay gheun Vasco pulis thannar veli ani gaddi mat surokxitt urli. Itlem nattok korun xevottak zoitivont konn zalo? Ani ek aik. Apnnali gaddi ani apunn trasant poddla mhunn, Remo-n khoincha-i Gõychea pochpochit rajkarnnink (politicians) fone korun adhar magunk na. Velean, Goyche sorkarache dolle ugoddle.” “Tor te koxe?” “Gaddieche fattlea sitar kale ronganche ek bag aslem khoim. Goddie to bomb zait mhunn vimantollachea sekurittink dislem, ani tannim tabortob BDS hankam fone korun kolit kelem. Bomb sodpacheo favo teo vostu nasun ani asat teo kamank upkaronant tosleo pornneo (outdated) vostu ghevn BDS Ponnje thavn Dabolim vimantollar pavunk don horam laglim khoim. Zori khorelea akantvadeamni Gõychea khoinchea-i zagear bhirantkull bomb-sfottachem chaddor ghalit zalear Bomb Disposal Squad kitem kortele kai? Goycho sorkar atam tori uttholo ani Gõyche porjecho jiv surokxit dovortolo?” “Atam tujem somptelem vo ratbhor CD vazot asteli?” Lapittan vachtolo paper mezar soddun apli tokli unxear dovortana mhonnlem. “Hanvem dilea ti tablet lagli kitem tuka? Sarkem uloilear tuka rag ieta. Borem! Sust nide. Boa noite”, ani tinnem rumantli bizli paloili. Khalok gup zalo. Bhailean pavsachi xirxiri zhoddtali. Kiri-kiri korit rat-kiddio roddtaleo ani pois ravun-ravun sunneancheo bobo aikunk yetaleo. Zoglavmnne marun ghoddghoddeacho avaz ietalo. Eka vellar ghoddghoddeacho avaz matso voddlean ailo tedna Lapitt baile islean portolo ani xant moneaponnachem vattoront bigoddlem. “Kitem sonspotta?” Lapittache bailen vicharlem. “Parking korunk svatt sodtalom.” “Nokoi tum? He dis mhagele No Parking Zone –ache mhunn?” Lino B. Dourado
