*Rajbhas Kaideant Romik zago mellot ?* - Jose Salvador Fernandes
Devnagari lipintlean Konknni Gõychi Rajbhas zait porian Romi lipicher zalole onitichea prosnan, ani panvelichea boreponnan mhoxingak udok mhunn Morattik-ui faido zauncho hea vixoyan hea satolleant anik ek pavtti tokli voir kaddli. Kal meren chalu aslolea Vidhan Sobhechea pavsallea odhivexonant, up-sobhapoti Mauvin Godinho, Aleixo Lourenco Reginaldo ani Xmt. Victoria Fernandes hea rajki fuddareamni Romik nit mellche khatir upai ghevpachi ievzonn korpachi goroz asa mhunn Vidhan Sobhent ugteponnim sanglem. Bhaxechea hea proxnacher upai kaddche khatir odhivexon somptoch, lagu zavpi lokanchi apunn kherit zomat apoitolo oxem Mukhel Montri Digambar Kamatan tanchea hea proxnak vevosthit zap dili. "Hanv Mukhel Montri zalea uprant, Up-Sobhapoti Godinho, Aleixo Reginaldo, Xmt. Victoria Fernandes oxea thoddea amdarancho zomo mhojexim yeun Romi lipintlea sahit'yak Goa Konknni Akademint sarki nit mellona oxem sanglem. Tancheo oddchonni hanv somzotalom, punn bhaxechea proxnak lagun portun somazant goddbodd zait mhunn kosloch nirnnoi gheunk mellonaslo. Atam hea proxnacher, soglleamni ekttaim bosun ani bhasabhas korun nirnnoi ghevpacho vell pavla. Devnagari, Romi ani Moratti bhaxe kodde sombond aslolea fuddareank, sonvsthank ani sogllea rajki pokxank visvasant gheunuch ho proxn sasnnak soddoitole, oxem Mukhel Montrean Vidhan Sobhent sanglem. Hea vixoyacher 90 te 95 tok'ke ekmot zalear legit nirnnoi gheunk zata oxem Virodhi Pokxacho Fuddari Manohar Parrikaran mhonnlem. Rajbhaxechea proxnacher upai sodun to proxn sasnnak soddovpachem Mukhel Montrean utor diit porian, Gõybhor sabar zannanchea tonddantlean hea vixoya vixim sabar motanchem ulovp aikunk ieta. Rajbhas Kaideak hat lavpacho konnem-i proyotn kelear taka ami soglle xokten virodh kortele, oxi xittkavnni Goa Konknni Akademicho (GKA) odheokx Pundalik Naikan dilea. Konknni Rajbhas chollvolle vellar Xri Naik Konknni Porjecho Avaz-acho (KPA) nimontrok aslo. "Sumar 4 vorsam fattim Romi lipik duddvachi mozot diunk Dr. Wilfred De Souzan khasgi vangddeancho ek tharav manddlolo. Tednam GKA-cho hanv odheokx aslom. Tea vellar Romi lipik sogllo adar diunk ani tika Devnagari lipichea panvddear vagovpacho ami nirnnoi ghetlo. Devnagari khatir asloleo soglleo ievzonno Romi lipik-ui diun Devnagarichea panvddear tika man divpacho nirnnoi ghetlo," oxem GKA-cho odheokx sangta. Punn, Romi lipik soglle nodrentlean GKA koddchea Devnagari itlich nit ani eksarko man mellta zalear, Rajbhas Kaideant Romi lipik Devnagari vangdda eksarko dorzo diunk GKA kiteak virodh korta tem mat somzona. "Sorkarachem hem ek borem pavl. Sorkar soglleank visvsant gheun ek boro nirnnoi gheunk sodta zalear, ti bori gozal. Rajbhas Kaideant Konknni ani Morattik zago asa. Morattik sokoilea panvddear dovorlea zait, torui tika sorkara koddchean zai titlo tenko ani sohokar mellta. Punn odchonn zalea ti Romichi. Romichea borea magpeamni Konknni Rajbhas chollvollint vannto gheun ti chollvoll folladik keli, punn aiz Romik tea Rajbhas kaideant matui zago diunk na," oxem Gõy Vidhan Sobhecheo adlo Sobhapoti ani 'Goykar' masikacho sompadpi Xri Tomazinho Cardozo sangta. Hi onit kabar zaunk zai, oxem to fuddem mhonnta. Romi lipik Rajbhas Kaideant suvat dinastana Romicher onit zalea ti nittayer ghalpacho vixoi jednam-jednam uprasta, tednam teach Rajbhas Kaideant Moratticher-ui onit zalea oxem Morattichea borem magpeank dista. "Bhaxechea proxnacher upai sodun kaddpachi sorkarachi kolponam bori asa. Mhozo taka ievkar," oxem adlo Kendr Montri Ramakant Khalap mhonnta. "Bhaxechea proxnacher soglleanchea boreponnan upai kaddcho ani Konknni vangdda Morattik eksarko dorzo divpcho hi tanchi pornni magnni oxem Xri Khalap mhonnta. Devnagari vangdda Romi lipik dorzo divcho kai na hea vixim, to konknnivadeancho bhitorlo proxn, tacher apleak kainch mhonnpachem na oxem sangta. Punn tech borobor, Moratti vangdda Romik-ui maneotai dilear taka Morattivadeanchi koslich addkholl na hem-ui sangunk to visrona. "Khuinche-i poristithint Moratti Rajbhas zaloli zai. Sod'deak Morattik diloli ordikutti maneotai ami mandun ghenanv. Konknni vangdda Moratti Gõychi odhikrut (official) bhas mhunn maneotai diunk zai. Te khatir toddzodd (compromise) korchi poddlear upkarta," oxem Moratti Akademicho adlo odheokx Xri Gurudas Sawal mhonnta. Punn fattlea mhoineant khub vorsamni porot uzvadda ailolea 'Goykar' masikant Xri Sawalan "Konknni hich amchi khori osmitai" oxem mhonnlam. "Rajbhas kaideak hat lavpacho aslear to fokot Romi lipi khatiruch astolo. Sod'deak zo bhaxecho proxn aila to Moratti khatir nhoi. Gõychi Rajbhas khuinchi hem poilench tharailolem asa. Torui Gõyant Morattik favo to zago dilolo asa. Romi lipik Rajbhas Kaideant ghaltana toddzodd mhunn Morattik-ui Rajbhas korpacho proyotn korunk divche nant. Sod'deak bhaxechea mollar jem andolan cholta tem fokot Romi lipi khatiruch asa," oxem Romi Lipicho Action Front-acho nimontrok Xri Wilson Mazarello mhonnta. Bhaxechea mollar sod'deak jem kitem ghoddunk laglam tem borem zalam ani te vixim apunn dhados asa, oxem Porvorechea Thomas Stephens Konknni Kendracho Son'chalok Pri. Pratap Naik mhonnta. Romi lipik Rajbhas Kaideant odhikaran zago mellcho mhunn TSKK aple porim vevosthit ritin vaurta oxem tannem Pri. Naikan fuddem sanglem. Romik Rajbhas Kaideant zago diunk "Devnagari" oxem utor asa tachea uprant '/Romi' oxem ghalchem ani 'script' asa thoim 'scripts' korchem hi sompi vatt oxem tachem mhonn'nnem asa.Itle mhonnosor, lagu zavpi odhikareank ani sonvsthank gheun bhaxechea ani lipichea proxnacher upai kaddun to proxn sasnnak soddoupachem mukhel montri Digambar Kamatan bhas dilea taka Dalgado Konknni Akademin ievkar dila. V.Ixtt-acho ho ank chhapun ieta mhonnosor Vidhan Sobhechea odhivexonacho nim'nno dis zatolo, ani tea disa Virodhi Pokxacho Fuddari Xri Manohar Parrikar hea bhaxechea proxna vixim khasgi tharav manddtolo ani tacho porinnam' kitem zatolo to tea uprantuch kolltolo. Upkarant: V. Ixtt, Ank 30.08.2008 tar'kecho (Kherit dinvas: Walter Menezes-ak) Goa's Pride - http://www.goa-world.com http://in.youtube.com/watch?v=_Avn6_AepNw&feature=related Gulf-Goans e-Newsletter is presented by Ulysses Menezes, www.goa-world.com and moderated by Gaspar Almeida (since 1994)
