www.goa-world.com Quality. Precision. Professional. Gulf-Goans e-Newsletter SON'VARACHIM SUNGTTAM: Konknni Bhaxa Mondoll Vo Lipi Mondoll? Gõyant Konknni bhaxechi seva korche khatir sabar sonvstha sthaploleo asat. Tantuntli bhou pornni mhonnlear, Konknni Bhaxa Mondoll (KBM). Hem Mondoll 1962 vorsa, Ban'navlechea Pedro Correia Afonson suru kelem. Fattlea 46 vorsanchea kallant hem Bhaxa Mondoll Konknnichi seva korta. Choukoxi korun khobor melloilolea pormannem, survatek KBM-ant don-ui lipimni - Romi ani Devnagori - Konknnicho vevhar choltalo. KBM-acho vangddi zavpachim formam don-ui lipimni chhaplolim astalim, ani azun-ui tim toxinch asat. KBM-ache karyavollincho riportt divpi 'Konknni' nanvachem 'news bulletin' aslem tem-ui don-ui lipimni chhaptale mhunn thoim vaurlole mhalgodde sangtat. Tea bhair, KBM-an odim-modim vorsamni natalanchea kallar, 'Natal Ank' vorsallim uzvaddaileant. He 'Natal Ank' Romi lipintlean astale hem sot. (2000 ani 2007 vorsa uzvadda ailolea 'Natal Ank' don-ui lipimni asat.) 1973 vorsa KBM-acho sahit'ya puroskar poilech pavtt Konknniche Romi lipintle, Kallea Vistidachi Choli he Bonaventure D'Pietron boroilole kadamborek favo zalo. Tea uprant-ui, KBM-ache sahit'ya puroskar Romi lipintlea kaim pustokank favleat. Ani azun-ui, dor vorsa porikxok mondoll suchoita tea pormannem Romik hea mondollache sahit'ya puroskar ditat. Mhonnche, KBM-ant azun-ui Romik zago asa oso tacho (bhailo) orth zalo. 20 vorsam fattim, Konknni Romi lipintleanuch Rajbhas mhunn pas zatoli oxem somzun Romiche londde rajbhas chollvollent rostear denvle, ani te chollvolle khatir (khubxeamni pordesant ravun legit) duddu khorchile. Punn nim'nnea vellar, Romivaleank kallokant dovrun, muttbhor nagrivaleamni Devnagori lipintlean Konknni Gõychi Rajbhas mhunn pas korun ghetli, ani Romi lipicher onit keli. Hi onit aiz amkam dolle bhorun disun ieta. Punn hi onit zagear ghalunk, Romik Rajbhas Kaideant zago magtat tednam, heram vangdda KBM-ui taka virodh korta.(Morattik Rajbhas Kaideant khuim tori zago dila mhonntoch Moratticho hanga proxnuch iena.) Rajbhas Kaideant bodol korpachi konnem-i kapostad keli zalear poristhitechi goroz mhunn hinvseche upai (violent means) hatant gheunk fattim sorchenant oxem tache odhikari sangtat. Dusrea orthan, Romik legun Rajbhas Kaideant zago na. Rajbhas Kaideant Romik virodh korpi he odhikari aple vichar 'justify' korche khatir,kaim motam manddtat tim onitichea ghansak sampoddlolea Romichea pattlavdaram modem kitlim khol pallam-mullam dhortolim tem khobor na Tanche sangnne pormannem, Romi lipichi zotnai Goa Konknni Akademintlean (GKA) zata ani Dalgado Konknni Akademik (DKA) sorkara koddchean onudan mellta. Toxem polleunk gelear, Bhaxa Mondoll hem bhaxe khatir asa, lipi khair nhoi. Bhaxechea Mondollan bhaxeche nodrentlean vichar korpachi goroz asta, lipiche nodrentlean nhoi. Hem Bhaxa Mondoll Konknni pustokank sahit'ya puroskar ditana, lipicho bhed-bhav korinastana Romi pustokank legit inam' dita. Zalear, tech Romik nitin Rajbhas Kaideant zago divpacho vixoi ieta tednam, KBM-an Romi lipi sovem aplo dusvas kiteak dakouncho? Bhaxa Mondoll hem Romi lipintlea pustokak vorsantlean ek pavtt puroskarachem lolipop diun, apunn Romi lipicher onit korina mhunn dakounk sodta zait. Toxem zalear, tech Romi lipik Rajbhas Kaideant ghalpachi magnni asta tednam, Bhaxa Mondollachi Romicher onit kiteak? Vo, Romi lipik vorsantlean ek pavtt puroskar diun Romi lipichi apunn zotnai gheta oxem Bhaxa Mondollak dista kai? Hem tor khorem asot zalear, Bhaxa Mondollachea odhikareamni ek gozal ghott monant dovorchi – fattlim 21 vorsanchea kallant Konknniche Romi lipik sorkara koddchean koslench onudan, mozot, Sahit'ya Akademiche toxench her puroskar, ani aiz Konknniche Devnagori lipik ani Morattik Rajbhas Kaideant jitlim sompeponnam ani sovloteo melltat, toslem kainch ek mellunk na, torui Romi lipi azun jiti-jivi asa, ani bhouch promannan gollta. Hachem khoreponn, Konknniche Romi lipintlean uzvadda yeupi potram-masikantlean thavem zata. Hem sot, konnacheanuch nhoikarunk zaina. KBM-an hacher barik-sarik niyall korun, lipi poros bhaxeche udorgoticheruch aplem mon ghalun vavurpachi goroz asa. KBM bhaxeche udorgoti ani vavra khatir sthaplam mhonntoch, hea mondollan Devnagori itloch Romik-ui man diun, Gõyant vostolea Konknnichea don-ui lipiank gheun fuddem vochpachi, bhaxechi purnnponnim udorgot korpachi goroz asa. Lipichea proxnak lagun bhaxa mondollachem rupantor lipi mondollant zaunchem nhoi mhunn chotur ravpachi nibel goroz asa. Na zalear, itlim vorsam bhaxe khatir vavurit fuddem ailolea Mondollachea borea vavracher dusvasachem xellem udok poddun, to vavr nirfoll zavpachi bhirant asa. 11/09/2008 (c) Prof. Jose Salvador Fernandes http://www.goa-world.com/ http://sonvarchimsungttam.blogspot.com/ Gulf-Goans e-Newsletter (since 1994) http://www.yahoogroups.com/group/gulf-goans/ KONKANI KOVITA http://www.goa-world.com/goa/poems http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado Goa's Pride - http://www.goa-world.com http://in.youtube.com/watch?v=_Avn6_AepNw&feature=related Gulf-Goans e-Newsletter is presented by Ulysses Menezes, www.goa-world.com and moderated by Gaspar Almeida (since 1994) http://www.youtube.com/watch?v=fywTuf-9S0k&feature=email
[Goanet] SON'VARACHIM SUNGTTAM: Konknni Bhaxa Mondoll Vo Lipi Mondoll?
Goa's Pride www.goa-world.com Sat, 13 Sep 2008 23:32:42 -0700
