SON'VARACHIM SUNGTTAM:
Ek Kusvo Bhaddeak Asa? -Jose Salvador Fernandes Nirmala Chandigoddchi. Panch vorsanchea bhurgeachi avoi. Chandramachi potinn. Chandramacher pidden akromonn kelam. Okhdancho adar gheit to pidde kodden zhuzot asa. Protek mhoineak satxim rupianchea okhdanchi goroz. Konn khorch korta? Nirmala — tachi bailuch. Koso? Hatak melltta tacho-hacho vavr korun. Kaim mhoine adim lognacho dobazo axil'lo. Thoinsor kam' korunk Nrmalai axil'li. He suvater, lognak hajir axil'le eke ghov-baile kodden tichi vollokh zali. Zoddpeantlo ghov Bharoti Varea Senent (Indian Air Force) odhikari mhunn vavurta. Punn durdoivan vo sudoivan zalear lhobor na, tankam bhurgem-ball na. ....Ani tanche modim khub gozali zaleo. Tantuntlean Nirmalek tanchem bhurgem naxil'leachem dukh somzolem. Ani tankam Nirmalechi oddchonn somzoli. — dor mhoineak ghovak okhdam diunk khorch zata tachi. Tedna tea odhikarean Nirmaleche poristhitik hatbhar launk ievjilem. Tannem Nirmalek pon'nas hozar rupia divpachi khuxi dakhoili. Punn tech borobor ek ott ghatli: 'Oddeche pod'dhotin tujea kusveantlean tuvem mhojea bhurgeak zolmak haddunk zai, (artificial insemination). He xivai ballonteracho ani herui khorch apnnem korpacho tannem Nirmalek asvasonn dilem. Odhikareachi hi ievzonn Nirmalen aplea ghovachea kanar ghatli. Ani ti ievzonn fuddem vhorunk Chandraman tika provan'gi dili. Fuddem hi gozal Chandigocchea pulisank gomli. Pulis porot-porot Nirmalak sotaunk lagli. Porot-porot tika pulisent ieunk apovnnem dhaddunk lagli. Jem ti korunk fuddem sorla tem bekaidexir zatlem oxem pulis odhikari sangunk lagle. Tanchea transancho vitt ietoch Nirmalan Navjyoth Singh Brar nanvanchea vokilak bhettli. APli ievzonn taka sangli. Vokilan Chandigoddchea Neaialoiant tiche vottin 'writ' orji kelea. Setembrache 19ver, he orjecher aikop zavpachem asa. He vichitr ani ghuspagondollache poristhitik "necessity is the mother of invention " oxem mhonnum-ia? Sonvsarant axil'le protek vostuk hetu ani xim' asta. To-to hetu sadhpa khatir xim'-mer ghalunuch ti-ti vost toiar zal'li vo kel'li asta. Vostuch kiteak? Zolmak ail'lea mon'xache kuddichea protek sandheak sud'dam hetu ani moriada asta. Dolleancho hetu goroz tem pollevop. Kanancho hetu favo tem aikop. Tonddacho hetu gorje purtem ulovop, khavop... ani bailechea kusveacho hetu ani mer — aplea logni dadlea pasun dhoril'lea gorbhachi zolmak ieum porian zotnaien sambhall korop. Punn kusveachi dhoninn apunnuch zaun kusveachi xim' par korpachi khottpott korta zalear... Kusvo bhaddeak dilear Nirmalek pon'nas hozar rupia bhasaileat. Dubhavaviret Nirmalek tea pon'nas hozar ievzolem nam zaum-ie. Odhikareak zai axil'lo jiv aplea kusveant samballun Nirmalen faleam zolmak haddlo somzum-ia. Zolmak haddttoch, tem bhurgem opangull asa vo taka dusre torechem unneponn asa oxem tea odhikareak gomlem zalear, to tea bhurgeak svikartolo? Taka mandun ghetlo? Te bodlek 'axek gel'lo doxek pavlo' he nodren' tem bhurgem Nirmalachech unttient urchem na mu? Dispott'tto gras zoddunk mon'xan vavr korcho poddtta. Kam' korun aplo khorch suttoicho asta. Punn ekadre poristhitint monis bhukeche bhokik poddta tedna magun khalear kainch vaitt nam. Punn te poros chorun khalear tem kortub vankddem thorta. Anturnnar pidden tollmolltele avoichem dukh amchem kalliz roddoita mhonnun ticher sumornnacho (mercy killing) upai vaprop matui nitichem disona. Zalear, ghovachea ilaza khatir bailen apli kusveachi kott'ti bhaddeak divop sarkem asum ieta? 'Means do not justify the end' mhonnttat nhoi? Ghovache pidden Nirmale mukhar duddvachi oddchonn ubi keli. Desant anikui oxim mon'xam asum ietat jim Nirmale poros odik duddvanche oddchonnik sampoddleant. 'Nirmalen aplo kusvo bhaddeak diunk horkot nam' oxi Neaialoian zap dili zalear, faleam tabortob goroz axil'leo-naxil'leo legit her bailo-cheddvam aplo kusvo bhaddeak diunk ghosghoxit fuddem soronant mu? 'Bailancher zal'lea onitincho nixedh korop, samaneoponn bailancheo gorzo hatallop...' oxea hetunche amchea desant, rajeant bailanche kitlexech zome asat. Dadlea mon'xan vo somazan khoinchei bail mon'xecher aglle-vegllem kitem-i kel'lem hea zomeank sosona. Punn bailoch apnnacher, purai bail-mon'xancher onoitikponnachem kallem pixel bhonvddaitan bailanchea tea zomeank tancheach kallea kortubancho nixedh korunk koxem ontoskornn zaina hench somzona. Bailanchea khoinchea tori eka zomean Nirmalek tiche porishitint noitik boll dilam mu? Tiche gorje sovem husko punn dakhoila mu? Punn don gozalinchem kuvaddem suttona. Nirmalek aplea ghovacho ut'tom mog asa. Tea pasot ti aplo kusvo bhaddeak diun ghovacho ilaz chalu dovrunk khottpott korta. Te poros khoinchei doiall sonsthe kodden aplea ghova khatir kiteak utor ghalina? Vo ghova khatir apnnak khoinsorui 'permanent' chakri mellovpachi khottpott kiteak korina? Dusrem — Bhurgem nam; ani zai zalear posum ieta. Zalear tea odhikareak bhaddeacheach kusveantlem bhurgem kiteak zai? _______________________________ Give a gift subscription of "GULAB" - the Konkani monthly magazine now in its 26th year - to your family and friends that will be remembered for the whole year. Email [EMAIL PROTECTED] or dial (+965) 99391452 for more details.
