Kuveittchi ‘Gulab Vavurpi Somiti’ Jikhli vo Harli? Tannem itlench korchem. Vell nam, mell nam ani khell nam. Khoinchea-i vellar fon khorun mhaka sotavchem. Ek-ek pavttim sangun distalem. Tujea lagim zainam zalear hem vozem khanddar kiteak gheunchem? Punn……….? Tem morun vetalem. Taka zolman haddpi bapui somplolo. Titivan vo bapaichea bhavan taka pospak thoddem bhov vozon aplea khanddar ghetlolem, porontu; khas sotachem tagelem ek ballok asun bhavachea porak samballunk taka zhodd zaunk laglelem. Tachem mornn zatelem mhunn jahir kelem. Ho titivacho khorkhos tallo aikun, zaitea zannank dukhlem. ‘GULAB’ nanv tigelem. 25 vorsanchi vokholl koxi nhesun pollounchem tigelea bapaichi itsa asli. Durdovean, tigelea bapaicher moronn ailem ani GULAB-acheo pormollik paklleo zhoddchelo vell ailo. Oi nam, oi nam khorit titivan GULAB-chim 25 vorsam soromblim ani thoddea disa uprant GULAB-achi porostithi uzvaddak haddli. GULAB dolle dhampttelem. Khup zannank dukhlem. Ani dekhunuch Goenchem ekuch rongit mhoinallem ‘GULAB’ sompun veta mhunn jahir kelem tednam, Kuveitt-cho ek boro Samarithan utthlo ani GULAB kosoch bavunk diuncho nhoi ani fuddle pillge meren urcho mhonn GULAB-a vixim chollvoll suru keli ani Kuveittan ‘Gulab Vavurpi Somiti’ rochun haddli. Kuveittchea Gõykarank zagrut kele ani chalu vorsachea Agostache 15ver, GULAB-achea Rupea Utsovi Dobajeachi ghonnghonnan ugttavnni keli. Otumbrache 9ver ‘Konkani Variety Show’ ani akhrecho somarombh khalchea Sunkrarak Dezembr 26ver 2008, ‘GULAB Carols Singing Competition’-an sompli, punn GULAB-ak jivem dovorpak chollvoll mat, ajun chalu asa vo sompli nam. Kala Mogui Odheokx ani Gulab Vavurpi Somiticho fuddarean, GVS vangdeank GULAB-a khatir nidhi ekttavpak ani dusro vaur vatun dilo. Ek ankhi nattkulim borovcho vaur mhojea hodd’dear ghalo. Otumbrache sonskrutik khariavollint “GULAB” hem mhagelem poilem ek ankhi nattkulem Kuveitche rong-machier haddlem zalear kallchea xevottachea somarombhan “NATALANCHI BHETT” hem dusrem nattkulem zalem.
Natal Gayona Spordha, Kuveittan poiloch ghoddun haddpan yeta mhonntoch ti polloupak Natalamchea umedin khupuch lokachi lutt zateli oxem mhaka dislolem. Punn nam! Carmel Iskolachea vosreant loka vorn rikami koddeli subej distaleo. Hanv nirxelom. Konn khoim chukla kai? Ho hixeob kortanam mhaka Gõy savn, mobilar fon ailo. “Hello? Konn uloita?” hanvem vicharlem “Hanv” “Hanv mhonllear konn?” “CM” “CM? Kose asat tumi. Mhoji yad keli?” “Mhollem tuka Natalanchi porbim dium-ia. Merry Christmas” “Punn tumi, Gõychim Natalam, Gõyche porjechi surokxe khatir ban keleat nhi?” “Arre papia. Natalam nhi. Dorya degher, ugtea zagear zat’leo partio bond korunk sanglam. Avaz koslo? Tum kitem uloita tem sarkem aikunk yena.” Vosrea bhitor songit ani her dusro avaz zatalo to CM-achea kannar bostalo zait. Vosrea bhair vochun uloilear noise pollution thoddem zatolem. Ani Gõyant yeun bhailo lok ravunk lagloleak ani tankam sust nidhonk mellchea khatir Gõychea sorkaran atam noise pollution kaido bhitor gheun ratchea 10 voram uprant amplifier-acher vaztolem songit bond korunk sanglam nhi? Atam tumi vichartole. Hanv CM-ak khoim vollkotam? Chalu vorsachea Otumbrache 12ver Gõyant anik ek nettan choltelem JIVIT mhoinalleacho dusrea vadd disacho dobazo Moddgonchea Municipal Hallant zalolo tedna CM mukhel soire kose hajir asle. “JIVIT” 2008 Boro Vinodi Boroinar” mhonn mhaka Puroskar lablolo. Tea disachi mhoji ani CM-chi ghott vollok. “Sorry CM. Hallantlo bhair sorun ailam.” “Thoim kitem chol’lam?” “Carol Singing Competition asa.” “Huxar mure amche Gõykar? Lokachea deshantui kopetitionam kortat?” “Sogllech vattamni. Voir sortoleak sokoll ghalcho number one kopetitionam korunk amche Gõykar huxear” “Mhonnchem?” “Tumi aikolam astolem. GULAB masika khatir Kuveittan chollvoll suru kelea.” “Oi, oi. Bhiyechi goroz nam. Romi lipin choltolea vaurak mhozo bhorpur tenko asa. Poir tedus Dalgado Konknni Akademi-chem poile sommelon zalem. Zata toxem korun hanvem 15 lakhanchi dhenngi dilea” “Ti dhenngi sorkari tizoreantli. Tumchi koxi?” “Arre papia. Ti nam diunchi mhonn, Nogri lipivaleamni bhouch add-mereo ube kel’leo. Punn havem teo moddun, Romi lipi fulchea khatir sogle teag mhojea bhuzar ghetle” “Teag? Ani kosle? Tumi, tumche vote bank sugur kelam” “Arre papia. Hi tuka politik naka. Ek sang. Spordha polleunk zaito Gõykar zomla astolo.” “Sanjechim 4.30 hangasor vazleant. Khorem mhollear 3.00 vorar spordha suru korchelo vell dilolo. Sodeak hallant bottar mezpa sarkelo lok dista” “Tiketi marog dovorleat astoleo” “Hi spordha ugti vo funkea asa” “Ojeap dista mure aikunk?” “CM bab. Poirchea Poilea (Romi lipint) Konknni Sommelonank kitle malgode Nogrivale hajir asle? Gõybhor, Poilem Konknni Sahitya ani Sonvskruti Sommelonancho boball zalo. Hozaram voir boska aslolem Moddganv Ravindra Bhavan, Pai Tiatrist Joao Agostinho Fernandes Vosreant sumar 300 Romi lipiche Konknnikar hajir aslole mhonn ami Gõychea disaleancher vachlam. Nogrivale thoim dislet nant. Kiteak? Tea hajir zalole tor, Romi lipichim pallam ghott zata aslim nhi?” “Punn hem hangasorlem politik. Kuveittchea osle porki desant sobonam…..?” “Kiteak sobhonam CM bab? Zori tumgelea zomeantlo unqualified Montri dusrea Montreak disqualified korchelem kam’ korta zalear hangasorle lhan mon’xan aplea bhuzar ghetlolo vaur fuddem vorun to prosidh (famad) zalear vhodd namnechea Gõykarank loz nhi? Ani oslea lhan mon’xank NRIG Kuveittche somudayecho fuddari mhunn puroskar favlo zalear?” “Nam, nam. Toxem kaim nam tem. Hallant lok nasunk, Gulab Vavurpi Somitichem khoim nam khoim tori chuklam. Ghoddie, spordhen bore pongodd nastole vo lokak oddun haddpa sarkelem kainch ek naslem astelem” “Ti ek spordha CM bab. Konnacheanuch bhag gheunk zata. Vhodd vo lhan pongodd oxem kaim nasta. Ani dusrem mhollear lhanxea khariavolli soddlear ‘NATALANCHI BHETT’ ek nattkutlem asa. Ani hea nattkuleant Konknni cholchitr pordd’dear kam’ kelolim famad nott-nottim (aktressam) asat. Nattkuleacho Digdorspi, Goycho ek hindu bhav ani tageli sundori (ghorkarnn) rong-machie veli ani toxench potrkaritichem (journalism) xikloli. Tori astanam…..” “Somzolom, somzolom……Gõykarank divertiment boro zai. Nattkuleant itle sogot film nokhetra asun hea khariavollik lok nam asop mhonnchem, ghoddie nattkutlem borovpi ponch astolo.” “CM bab, Nattkuleacho borovpi hanvuch mu ga….” Hem aikonam fuddem CM-cho fon click korun fon bond poddlo…… Lino B. Dourado
