Fuddari Zata? Dusreank Boro Rosto Dakhoi.
Eka borea fuddareak ekdom ghorjechem zavn asa, bore toren aikun ghevchelem.
Dhean divn aikopi tum nhoi zalear, tujean ek boro fuddari zaum nozo. Tum
fuddari zalolean, tujea sorbhonvtim aslole tuka suchnna kortole ani tea vellar
tuvem bore toren aikun ghetlearuch tum ek boro fuddari zata. Zori tuka
dusreancheo oddchoni bore toren aikopachi khuxi na tor, tum fuddariponnank
laikicho nhoi.
Sonvsarant zaite toreche fuddari aile, gele, ani asat ani astole. Thoddeamni
aplea desak ani porjek fuddem veli ani desachi progotti keli ani te des az
aplea fuddareamni dilolem sukh chakttat. Thoddeamni xanti rakli ani thoddeamni
zuzachim akttim pettoilolim tim, ajunn zolltat, ani zollot astolim. Thoddea
fuddari foddant gele, punn vetana desak ani porjekui durbollkayechea foddant
purovun gele. Ani halinchea kallar sonvsarbhor arthik tutt’tichem (global
recession) vozem sonvsarachea mathear divn, vhodd fuddari mhontlolo adlo
Amerikecho Raxttripoti George W. Bush zutt’tevelo sokoll dhenvtana, sonvsarachi
vatt laun dhenvlo, ani tachim patkam atam novo Amerikecho Raxttripoti Barack
Obama duta.
Sonvsaracho Raxttripoti koxo Barack Obama-n zutt’techo soputt getlolea poilea
disa oxem mhonnlolem. “Fattlea fuddarea koddlean chuk zalea ti nittayer ghalunk
hanv poile voile yont kortolom.” Duddvanche tuttik boli poddlolea sonvsarak
porot arthik margar haddpak apnnachem poilem kam’ mhunn, Obama tea disa uloilo.
Ani az meren, sonvsarbor fuddareank to ulo marta ani sonvsaracher arthik
durdhov ailam tem poisavunk vavurta.
Amche Bharotache rajkaronni ani Amerikeche rajkaronni modim mollob-zomnni itli
ontor asa. Bharotache rajkaronni choddan-chodd chor, gundda, bholatkar-kunni,
vikallea vogddancho dhondo korpi ani sabar toreche padd dhondean misoll zalole
asat. 15ve Lok Sobhe khatir Abrilache 16ver thavn, 5 ttop’peanmni suru zal’leo
venchnnuk, Mayache 13ver somptoleo. Gõyant Abrilache 23ver, 2 khasdar Nove
Dil’li daddche khatir, Ut'tor ani Dokxinn motdarsonghanchi vinchnnuk zali. Ani
vechnnukek ube ravlole umedvareamni vhodda tallean, haka-taka tasun, hachi ani
tachi izot kaddun bhaxonna ditat ani dilim. Hanem oxem kelem ani tannem toxem
kelem mhunn, vhoddan zankle ani zankot asat. Punn, adlea fuddaream thaim zal’li
ti chuk visron, Bharot des fuddem vorunk Amerikeche Raxttripoti Obama bhaxen
amkam fuddari mellunk mat ekdom kothinn zalam ani zatolem.
Ani amchea Gõykaram modim kaim fuddari asat. Khoreamnich, thodde aplleakuch
visrun apnnale somudayecho zata te toren boro vavr korun unchlea panvddear
vorunk vavurtat. Boro vavr korpak, somajik vavurpi vo rajkarnni zavnchench oxem
mhunn nam. Devan dil’lim dennim favo te porim vapurlear ani lokacheo oddchoni
aikupak tuka nitoll kann ani fursot aslear tum ek boro fuddari zavnk xoktta ani
loka koddlean boro man-abru ani inam’ zoddunk pavtta. Bore fuddari keddnanch
dusreancheo chuki kaddinant. Punn zata te toren teo chuki fuddarak portean nam
ghoddche khatir borich zotnay getat.
Borinch vorsam Kuwait-an nokri kortolean thodde bhov Gõykar somudayechea,
klubanche, sonsthechea fuddareank hanv porxim vollkotam. Tannnim kel’lea
gupttea somajik vavrachi tokhnnai korta titlich thoddi zait. Dor eklo fuddari
aplea fuddariponnan ap-apnnachi kharia yesvont zaunk bhouch tokhos getat. Dor
vorsak aplea klubachea vo sonstheche nanvan khariavolli toyar korun Kuveitt-che
Gõykar somudayea mhoreant sador korun xebaski zhoddtat. Ani tattuntli ek vhodd
sonstha mhollear Kuwait-India Football Federation. (Hi ak’khea Bharotachi 18
futtboll klubanchi ekvottik sonstha, punn he vorixtt futtboll sonsthen Gõyche
16 klubancho aspav asa, ani 98% Goykar futtboll khellgoddi asat) KIFF-a xivai
dusre klub KIFF-ache hasrea khall futtboll tournament vorosbhor (Musolmanchea
Ramzan dis soddun) ghoddun haddat ani chalu vorsache 2009, Kuwait National Day
vo Kuveittche Raxttrik Disa Febrerache 25ver Curtorcares United 7 A-Side
futboll tournament ghoddun haddtat
mhunn, ek jahir kollovnni koxi e-chitt, (e-mail) mhaka pavlli.
E-chitt vachun hanv tothaklom. (E-chitt pavtti zaloli Febrerache 2rer) Tech
disa, mhonchem; Febrerache 25ver Korezm suru zatalem. Gobracho Budhvar. Amche
jinnecho ek bhag. Upas ani jinzvar samballcho dis. Ani hea vhodd disa futtboll
tournament ghoddun haddop? Zait ghoddie khoim tori kitem chuklam vo tankam
khobor na astoli tea disa Xinz vo Gobra Budhvar poddta mhonn Sodam porim,
vorsachea vorsa Febrer 25ver futtboll ghoddun haddttat te toren Curtorcares
United hannim toyari kel’li asot. Punn, konnem tori tankam zagrutai divnk zai
asli nhoi? Kiteak? Choddan chodd khellgoddi Kristanv asat ani tankam to dis
upas-jinzvar korchelo asta. Ani hi sond ghevn, mhaka e-chitt pattoun kollovnni
ditolea Curtorcares United odheoxak, ek ugddas korun, (nikall koso kat lagtolo
hi mhaka zanniv nasun) havem reply dhaddun dilo. Mojem mon korzolem. Mhojea
oslea lhan mon’xanchem konn aikotolo? Punn koxem zaum. Mhozo Kristi kaido havem
kelo. Hench mhaka pottlem.
Khoim kitem ghoddlem ani koxem zalem hi mhaka purai khobor na. Punn tea disa
Febrer 25ver Gobra Budhvarak, Curtorcares United-acho 7 A-Side tournament roddh
(cancel) zalo.. Uprant khatrechea monxa koddlean mhaka gomun ailem KIFF-achea
odheoxan zomat apoun koddok bhasabhas korun sogllea klubanim ekach motan, tea
disa khellunk noikar dilo. Hi ek vhodd khuxechi gozal. Kristi dhormancho man
rakllo mhunn KIFF-achea odheox ani vavurpi somitik xabaski ditam. Ani survatek
sanglam te toren. Tujea sorbhonvtim aslole tuka suchnna kortole ani tea vellar
tuvem bore toren aikun ghetlearuch tum ek boro fuddari zata. Mhojea oslea lhan
mon’xachi sunchnna kannar dovorli mhunn Curtorcares United ani her 17
klubanchea fuddareank ani futtboll khellgoddeank ani mogiank mhozo solam
martam.
Lino B. Dourado
