Divertimento Di, Tension Nhoi
Tea Aitarak, 8 voranchem Mis somplea uprant, Lapitt-ak koxoi toren Padri
Vigarak mellunk zai aslo. Thoddo vell uxir korun igorjexim pavlo tednam, Misak
ailolea lokachim mukhamollam, dukhabhorit aslolim, tanem poloilim. Ostoreo,
kuchu-kuchu gozali korit igorjintlim bhair sotalim zalear, igorjichea kompaudan
ganvche vhoddil ani tornatte zoma zaun khosle tori kholl vicharan guspolun
asle.
Lapittan apli saikoll (global recession pidda laglole meren, Lapittan iskuttor
cholovpachem soddlam) stendar kaddli ani cholot Padri Vigarak mellunk mhunn
rostin dempam marlim. Ganvcho sogott lok udhas (somber) kiteak kai? Konnank
kitem zalam? Kuchu-khuchu korun lok kosleo khobro kortat kai? Padri Vigarak
mellunk veche vatter, Lapittak kaim prons sotavpak lagle. To matxo abuzz koso
zalo. Auchkit, sorbhonvtim vattovoronn itlem dukhi kiteak tem zannam zaunk,
konnnak tori vicharchem taka dislem. Poisulean ek nodor firaili. Tacho
ghuttacho ixtt Caitan dislo. Eka-mekacheo nodrek nodor poddli tednam, apleaxim
yevpak Lapittan hixaro dilo. Ani Caitan lagsor pavtoch, sogott ganvcho lok
udhas zavnchem kharan, Lapittan vicharlem tednam….
“Kitem? Tukach khobor na?” ojapun Caitanan mhonnnlem.
“Na re papia”
“Igorjent Misak ani her dhormik khariavollint vantto ghevpachem soddlem kitem
tuvem?”
“Gelea sumanant London-cho mevnno aila. Ani hea disamni iskolank sutt’ti
mhonntoch bail-bhurgim manvonddech asat. Fattlea ani aichea Aitarak,
thoinsoruch Misant vantto getla”
“Toxem zalear tuka kainch khobor na tor”
“Korench, (igorjek pollevn) Saibinnichean na”
“Tor aik. Songlleancho avddicho tiatr machievelo famad tiatrist …….” Modench
Caitanacho mobile vazlo. Lapitt zanna zaunk sodtalo tich gozal, fonavelean
Caitan konna ekleak iskutaun sangtana, Lapittan sogllem aikolem.
“Itlem bhirankull duens?”, Lapittan vicharlem.
“Dekhunuch gelea ani aichea Aitarachea Misant, tiatrist bhavachem operasanv
yesvont zavnchea khatir maglam, ani toxench ganvchea lokan aplea
magnnem-rozarant ugddas korcho mhunn Padri Vigaran nomrutayen vinoilam.”
“Kaim mhoineam adim, oxech toren, anink ek amche ganvcho famad potrakar okosmat
duent zaun, kitlech dis hospitolant aslo. Tea vellar, tache khatir magchem oxem
kaim ek Padri Vigaran sanglem na.”
“Polle Lapitt-bab. Tiatrist, lokak divertimento ditat ani potrakar lokak
tension haddttat.”
“Hanv somzunk na”
“Ganvchea tiatrist bhavan unch dorjeche tiatr boroun digdorxit keleat ani
ak’khea Gõybhor, Bharotan, Gulfant, London ani her sabar desanim vochun
Gõykarank divertimento dila ani amchea ganvank nanv haddlam. Omor ugddasak urpa
sakelim orthabhorit kantaram rong-machier, CD-ir, VCD-ir gaun tiatr-mogiank
kormunnunk diun khuxeal dovorleat. Okosmat marrekar duensak bolli poddlolean,
lokachim kallzam dukhleant.”
“Lokachem mhunn borem mure yeah”
“Kitem?”
“Amcho famad potrakar hospitalache kattir, piddent koxttovtalo. Tea vellar,
hech toren ganvchea loka koddlean taka ‘sympathy’ kiteak mellunk na? Kiteak ho
vegllozar?”, Lapittan sottasot vichar kele
“Lokanchim kallzam jikhpa sarkelem kitem tori tannem boroilam? Soglleank
tension dilam nhoi?”
“Mhonnchem?”
“Man-abru ubovpachi borpavoll boroilear lok potrakarank lagim ghetolo? Kallza
meren ugddas urpa sarkelem kitem tori orthaborit borounk zai nhi? Sorkarak
tasta, amdhar-montreank tasta, broxtochar korpi sorkari odhikareank tasta, hem
sogllem borem asa. Punn, sompun gel’lea sorgest otmeank porian sotavop
mhollear, lokachim monam koddu korop nhoi?”
“Dubhau nastana.”
“Ani amche ganvche igorjent……….”
“Amche igorjek kitem zalem?”
“Modench boddboddum naka. Dhorm-mhoneareancher, igorjent ap-khuxen
vavurtoleancher, gaion-mondollancher, ratchea zagronn magnnem (night vigil)
kortoleancher, somudayechea fuddareancher, gorje viret nanv piddear korpa
sarkelim borovpam kortoleak, ganvcho lok apurbayen polletolo? Hoi? Ani………”
“Ani... dekhunuch lokachim monam koddu asat re yeah?
“Hanv sangonk kori, tem tuvemnuch sangun sompoilem…”ani Caitan cholot gelo.
Lino B. Dourado
