Amche Poromporik Khell Khoim Xenddleat? (Poilo Bhag) Aichea bhurgeanchea khellancher ek barikxi nodor marlear ugteaponnim somzunk zata, zo poromporik khell (goinda bhal, godd’deamni, appa-lipa, dorchenim, chanteamni, Utu-tu vo kabaddi, biyeamni, logorioni, lens (asket and basket) langdi, paryani ani her sabar) ami khelltale to khell khellunk atanchim bhurgim umed dakoinant. Kompuitor, internet, mobile chat, SMS, mobile fon ani TV-cher yetolea khellancho rog, aichea bhurgeank laglolean, khoinchai-i zagear fukott vo kosloch khorch nastona khellunk zatolea poromporik khellancher atam moronn ailam. Krikett ani futboll xivai, chukonn porian atanchi pillgi poromporik khell khelltoli mhunn osi axa bhallgichi uronk nam.
Adim, sokallchea vellar bhurgim iskolak astalim tea vogtar ak’khoch vaddo monneponn sonstalo, ani sanz zali mhonntoch bhurgeanchea kharandayen vaddo gaztalo. Konn-konn goinda-bhalachea khellant ‘arantiiiiiiiiiiiiiii’ mhunnit dhanvtalo. Ghodd’deanchea khellant eka khellgoddean pois thavn ghodd’deak ‘pendo’ (strike) marlear taka huxear ‘tirador’ mhonn nanv melltalem. Amchea tempar, ek ankvar choli gorbest zalear umkeach tiradoran pendo marlo mhunn khobro kortale. Hanv lhan aslolean pendo marpachi gosti mhojea mostokant boso nasleo. Utu-tu ani chanteamni khelltana kuddiche khoinchai zagear ani nhoi te svater pasun hat laglear, to ek khellacho bhag mhunn somzotale. Zanttelim, vhoddilam ani bhurgeancho avoy-bapui bolkavant bosun bhurgim-ballam khelltolea khellpachi umed polletalim. Ani oxem toren amcho Vaddo kitlo porian lhan-vhodd poltonin bhorlolo asa tem kolltalem. Punn atanchim bhurgim poromporik fukott khell khellun kuddik veaiam’ (exercise) divnchea bodla ghorantuch bosun adhunik yontronancho vapor kortolean amche ganvche Vadde atam nagdde vo bhurgeam viret kose distat. Dusre vatten adim amchea ghora bhair nodor marlear bhurgeank khellunk Vaddeant zago astalo. Punn atam tea zagear durgam bandun fukott moidonam bond keleant. Amchea bhurgeamponnar sanjecho vell zalo mhonntoch, ghora lagich aslolea ugtea moidonar khellunk, Vaddeantlim bhurgim zoma zatalim. Matxe vaddlole tornatte aslole te goinda-bhal ani ghodd’ddeamni khelltale. Sat logorio (seven tiles) khell boroch umedicho aslo zalear, appa lipa (hide and seek) khellcho khell mhozo ekdom avddicho aslo. Jednam mhoji lip’pachi pali yetali ten’na, hea ani tea zhaddanxim lipun konnank nam kolltam ani disti poddonastana toso, tekhunuch aslolea amchea ghorant bhitor sortalom. Mhagelea sorgest avoyn, sanjechea chaek bazun dovorloleo mankeo (pen-cakes), goddxem, tizann ani her dor sanjechea vellar khanna khavpak ani cha piyepak ho appa lipa khell mhaka ekdom boreak poddtalo. Mhojea sangatak khellpi bhurgim mhaka sodun-sodun bejartalim. Mhoji cha piyeun zali mhonntoch hanv hevtin-tevtin lip-lipun khellak portean hajir zatalom. Chorache map bhorta te toren, ek dis mhozo lip’pacho zago bhurgeank sampoddlo. Ani dusrea pavttim tanchea modim khellunk tannim mhaka noikarlo. Kazum tempar, bhiyeamni khellop aslem. Pokeleo kazu bhiyeo vo fokam ghevn yetolea bhurgeank bhiyeanim khellunk chance dinasle (udkacher upetole bhiyek ‘fok’ mhonntale) 1970 doskean, Ugandacho khorkox ukumxahekar (dictator) Raxttrpoti Idi Amin-an pordexi, choddxe Asiantle (Asians) lokak Ugandantlo dhanvdailo ten’na, amchea xezareak ek Ugandak ravpi famil pavun sorloli. Tanger ek sobit choli asli ani mudd’dom kazu bhiyeyancho khell pollevpak dor sanjer bhair sortali. Ti Konknni ulounk noko asli ani dekhunuch Vaddeantlim cheddvam tika (nosayen kay?) English talking madam hea nanvan vollkotalim. Tichea vicharank English bhaxen hanv zap ditalom mhunn ti mhaka lagim asli ani hanv tichi line martam mhunn thoddeancho somoz zalolo. Pokeo vo piddear zal’leo kazu bhiye fokam bhurgeamni haddlear hanv tancher taptam mhunn, ti zanna asli. Ani ek dis oxench hanvem ekleak tapoun kaddlo “hem kazu fok kiteak ghevn aila?” Ani Konknni noko asloli Ugandachi choli kitem somzoli ti mhaka khobor nam. Mhojer mat ti borich gorom zali, ani porot moidonar khell pollevnk ken’nanch disli na. Lino B. Dourado CHOLTA: Dusro bhag fuddlea Aitarak KOLLOVNNI: Poromporik (Traditional) khellam vixim konnakui odik zanvai asa ani aplem mot dinvchelem aslear muzrot hea ankdear (965) 66564875 sompork korcho vo e-chitt (e-mail) dhaddun dilearui zata. Tumche mudd'de tumchea nanvan vo nanvam-vinem DUSRO BHAG-ant chalu aslolea 'AK' uzvaddak haddtole.
