Aiz Mhaka Falleam Tuka
Cupertina Dias do Rosario kallem anglem nhesun ghorantlem bhair sorun
igorjechea vatten cholun vetana, samkaravelean cholun ietlea Romaldinha taka
dhoddlem.
"Ago Cupertin, tumchea ghora tekun, somplelea Effermin-acho inter haddpak
Padri Vigar gela ani tum khoim vetai go taktin?"
"Tea sunnea lagim hanv uloinaslim mhonn nokoi tum?" Cupertin-an tiddken
mhonnttlem.
"Somplelea mon’xank toxem ulovchem nhoi go. Hanv zannam tumi dusman mhonn tori
astana tuvem tachea ghorcheank dukhest bhett dilear kitem zatalem? Eka kallar
tumi mogacheo ixttinio asleo." Romaldinhan adlo ugddas kelo ani mornnache ghora
dixen cholot ravlem.
Kal auchit rogot choddun Efferminak gombhir poristhitint hospitalant vhortana,
vatteruch tannem hea sonvsarak adeus kelo. Aiz, tachea melole kuddicher nimnne
sonskar asle.
Cupertinan mornna ghora bhett dili nam kori ponn igorjent misak azir zalem ani
bhailanchea ollint ravun ximiterint pavlem.
Ximeterint bhitor sortana uzve bazuk mottea okxerean AIZ MHAKA FALLEAM TUKA
oxem boroilelem tem vachtana Cupertina-chem kalliz bhirantin ghos korun
hal'lem. Uspilolea fondda lagsaruch Cupertina ubem ravlem ani tea fonddak
pollevn tacho sintid kaim fattlea iadichea somdirant uddki marun buskoll’lo.
Cupertin ani Effermina ghott ixttinio asleo. Dogaim Ponnje-Altinho aslolea
Dempo Kolegint poilem voros B.Com xiktalim. Cupertina ganvan Agxi-chem zalear
Effermina ganvant Ribandar-achem aslem. Effermina don dhempam Cupertina von
fuddem aslem. Mhonnchem, konnui cheddeachi ixttagot zoddunk, khellant toxench
machier vantto ghevnk tem khub huxar aslem. Cupertina dusreachem mot ghetlea
viret aplem pavl fuddem ghalinaslem, ponn konnem-i tachi patt khorpili tor
tenvui sompeaponim konnachi patt soddpi nhoi aslem.
Cupertinacho mogacho sombond Miramarche Dhempe Kolejint B.Sc. tisrem voros
xiktolea sobit rupacho Saluzinho tornattea thaim aslo. Tancho mog eka
kolejichea mellavea nimitan zalolo, ani disan-dis tancho mog mozbut zait vetalo.
Ek dis, Cupertin, aplea nhovreachi ghozal ghuttachea ani visvaxi ixttinink
sangtana, tanchea mhorean Saluzinho ubo zalo. Saluzinhank pollevn Effermina
sarkench dipkovlem. Khub sundor, agllotin mozbut, unchaien lamb, dolle azul,
kensachi style Elvis Presley sarki ani pollevnk sarkoch ek chollchitrantlo hero
koso diso.
Efferminan aplea ixttinink visvas ghatt korun Saluzinhank aplo kelo ani tem,
tachea thaim kazar zalem. Cupertinank khub dukhlem korem ponn, Effermin-achi
koxe toren sudd (vigans) ghenvchem oxem tem sodanch chinttana ek dis okosmat
taka eka tarvottea thaim soirik aili. Orxim taka tarvotti nhovro naka aslo.
Zedna taka gomlem nhovro Agostinho, ganvan Santa Cruz-cho ani Efferminacho
xezari mhonn tedna ti soirik tannem soroll svikar keli.
Adlo nhovro Saluzinho ani Curpetin-acho ghorkar Agostinho xezari ani ekdom
ghott ixtt asle. Tanche ghorabe zori veg-vegle asle kore, ponn ekuch ghorabo
kose zaun te jiyetale. Saluzinachea ghorantlean ek dhang ubarlem zalear dusrem
dhang Agostinha-che ghorachea umbrear pavtalem.
Kazar zaun Agostinho porto tarvar gelo ani nnov mhoineamni porot suttient ghora
pavllo tedna to aplem ghor ani ghorachi vattuch visorlo.
Cupertinan ugtea mollar aslolea ghorak sorbonvttim durig bandlem ani xezarchea
lokak kednai sorkaracho udkacho noll bond poddlo zalear tanchea baimcher udok
vhorpak ievnchi-vechi asli ti vatt bond keli. Ghoracho paddoch vaddoilo ani
pavsachem udok nollea velean Saluzinh-achea bhattant poddtta toxem kelem.
Vaddea, vaddeantlea ghorabeamnim bhonvteli Saibinichi imaz Saluzinachea
ghorantlean haddunk poddtta mhonn xembor metram pois aslolea Manuela-chea
ghorantlean haddi. Ghorchim zon’varam chukon Cupertin-achea durgan bhitor
sortat tedna dog Alsation sunnim aslim tanka sodun tanche bhognnar kori ani
voilean fon korun dhomki ditalem. Babddo adlo nhovro Saluzinho apli chuk mhonn
somzun monneponan sogllem sosun ghetalo. Curpertinank somzaunk Agostinhan khub
proint kele. To suttient ghora astana Cupertinachem tondd bond astalem ani to
porot tarvar vetoch tankam sotaupachem chalu dovortalem. Moro pasun sudd
ghetlem oso tacho nichevuch aslo.
Mornancho kaxavn ximeterin bhitor haddun fonddachim dovorlo ani tachevelem
dhampnnem kaddlem. Tea vellar Cupertinachi nodor ekdom dolle dhampun aslolea
Efferminachea tonddar thirovli. Taka pollevn tachem ang xirxilem. Oxem tem taka
polleat astana ek disnnem (vision) tachea dolleam samkara ailem. Somplolem
Efferminha kaxanvantlem ubem zavn tachea thaim khontibhorit zaun uloita koxem
dislem.
"Hanv jivim astanam tuvem mhojer nodor ghalunk nam. Mhaka zap korunk nam.
Mhoje chukik mafi diunk nam. Atam kiteak ailam lokak dakhounk?"
"Ago titlem chintun ailim nam hanv. Ximetirichea daraxim bhitor sortoleanchea
hatant fulam ditat ponn hanv hea kantte ghevn ailam" Curpetinan hatant aslole
kantte dakhoun fuddem mhonnlem. " Otmo nasun foddant ghatlole kuddik pasun
khoxttavtelim".
"Tuvem mhaka ani mhojea ghovak khub dukh dilam, ponn ami monneaponn sosun
ghetlam. Tujea lagim hozar pavtti ami mafi magli ponn tuvem keddnach amkam
bhogsunk nant." Dukhin Efferminan sanglem.
"Rito hat ghalun tuvem mhoji bhorleli sukhi jivitachi vatt chorun veleli. Ponn
mhojea noxibant odik sukhache panvdde hanv choddlim. Tuzo sudd ghevnk Devanuch
mhaka, tumchea samkara ghorabean pavtim kelem" Cupertin tiddken tonddantuch
gunngunnlem.
"Upkar korun tem sogllem visor. Polle, mhojea uzve vatten dhovem anglem
nhesun devdut asat, te fokot tujea bhogsonnechea utrak ravttat. Tuvem mhaka
bhogxilem zalear te mhaka ghevn sorgar vetele nam tor dhave bazun tamddim
anglim ghalun asat te Purgottorin dhukllun udoitele. Mhoje voimkuntantlem sukh
tujea hatant asa." Ani aple hat zoddun ghusmottun roddpak laglem.
Padri Vigaran xevottachem magnnem kelem. Choug monis kaxanv foddant denvoupachi
bondabost kori. Saluzinho ani tachim bhurgim bobo-huelo marun roddttalim.
Tanchem roddnem hajir aslolea lokachea-i dolleanim dukham haddttalim.
Cupertinank aplea sorbhonvtim kitem cholta tachi billkul zanniv nasli. Tachi
chintnachi nodor fokot tech disnnear asli. Effermina tollmollun tachea thaim
mafi magtalem. Ponn Cupertin jit’tichem aslolean xevott meren aplem monn
boldunk nam tem nanch
Gomtti naslole tambddim angvostram nheslole monis Effermin-ank oddit vhorunk
lagle. Purgotorichea darvonteaxim pavtta-pavtta darvontto ugto zait ravlo ani
tatuntlean nixttur uzo bhair sorunk laglo. Cupertinachea hat paim koddkoddunk
lagle ani kalliz mottean dhodd'dhoddpak laglem. Effermin fattlean vollun
dukhacheo zori korun suskarlem. "Mhoje dhaktte chukik lagun tuvem mhaka
Purgotorichi vhodd sojea dilea. Ugddas dor aiz mhaka......"
Fuddem ulovchem adim tea gomtti naslolea mon’xanni Efferminank dhuklun ujeant
xevttilem tedna "Mhoje bhoinni Devan tuka bhogsum" mhonnon Cupertinan ek
mottean akantachi, ponn khub usram killonch marloli ti akh'kea ximiterint
zomlolea sogott lokachea kanachea pordd’ddear sadouleli ti ghora pavum meren
gumot ravli.
Lino B. Dourado
