Refri Zavnk Zai…..Punn!
Kaim orkhot nam. Boro refri zavnk tujea avddichea khellacho khubuch mog tuka
asunk zai ani boro obheas korun khellache kaide ani nem’ zannam zavnchem bhouch
mhothvachem. Zababdarecho refri zavnk tuzo moladik vell khellak bhettovpak ani
bori huxarki ani kuddichi xoktti khella vixim apurbay tuje rogt xiranim
ghollunk nibel gorjechem. Khellachea kaidea vixim purai zanvikai tuka asotuch
zalear tujean soglleank ekach borobor dadhos korunk zata. Punn durdovean,
aiz-kal oxem zalolem amchea nodrek ailolem nam. Refricho nirnnoi (decision)
sogllenkuch khuxeal korta oxem somjuchem hem mat atanchea khell pollennarank
dadhos zalem na. Ani tech khatir thodde pavtti ek ghoddun haddlolo tornament
zaum to futtbol, basketbol, volleybol adi, adi, refriche chukichea nikalak
lagon ak’khoch tournament vaitt doxer vo hata bhair pavtta.
Gorjechem mhollear khellache nem’ ani kaideachem purayen mahiti (thorough
knowledge) aslearuch tujean bore vevhar (communication) khellgoddeam thaim
zhoddun moidonacho ek boro fuddarkar ghevnk zata. Futtbol khellache nove kaide
Vixv Sonvsarik Sonstha (FIFA) bodolta tedna professional refrin te kaide xikunk
kaim vorg ghenvche poddtat. Tednanch tujean ek khell bore toren pollovni
(supervise) korun ek khorelo nirnnoi diunk zata. Thodde pavtt refriche
chukichea nikallak lagon ek bori ttim tornamentantli bhair poddta tedna khub
zannank dukhavoll zata ani loka koddlean refrik galio-fosti khavcheo poddtat,
ani surokxit naslolea moidonar khell pollennar ghusun refrik gherao ghaltat,
ani kaim pavtti refrik marui khavcho poddta.
Kuveittan sodeak chalu asloli KIFF-chi futtbol lig (league) J.P. D’Mello
Memorial Rolling Trophy-che uril’le chodd motvache khellachem refriponn korpak
FIFA-cho adhari refri Franky Fernandes Goyam thavn khas Kuveitt aila.
Khatrichea zorintlean amkam khobor gavlea tea pormonnem Kuwait India Football
Federation (KIFF) ani Indian Football Referees Association (IFRA) hanchea modim
chukichi somzonim zalolean ani KIFF-achi chalu futtbol lig fuddem vorpak
professional refri naslolean All India Football Federation-ank vinovnni
(request) korun chalu asloli lig bore toren xevottachea panvddear haddche
khatir refri Franky-chi nemnnunk kelea khoim.
Ghelea sabar vorsam Kuveittan KIFF-achea hasrea khall futtboll tornament zatat
ani tanche refriponn bhouch onnbhov aslole IFRA-che refri polletat. Vixv
Sonvsarik Sonstha (FIFA) futboll khellache nem’ ani kaide dhor Vixv Kopachea
(World Cup) velar odhik sullsullit ani moidonar futtbol khelltolea
khellkoddeank tras zaum naye mhunn futtbol somiti asa ti kaideanchi sudornni
korit asta. Her khellam modim futboll ek unchlea zageavelo sonvsarik khell
zalolean tacho bavtto (standard) rakchea khatir ek kherit somiti kam’ polleta.
Ani dekhunuch aicho futtbol khell odik umed vadovpacho zala. Punn kaim refri
asat, nove nem’ ani kaide vixim nennar asat vo tankam kaideanchi bodolpam zatat
ani zaleant hanchi zanniv nasta.. Ek osoktt (weak) refri futtbol khellachi
pollovni korta tedna khubdam tacho nirnnoi chukicho zavn ek boreli ttim harunk
xoktta. Dekhunuch voir sanglam tea pormonnem, aichem refriponn bore kudiche
xokticher ani bholaikecher ani chodd
huxearkayecher athaplolem asa.
FIFA adhari refri Franky Fernandes, KIFF futtbol ligecho uril’lo khell somppo
meren refriponn poletolo. KIFF-achea odhikrut suchovnnen FIFA adhari refri
Franky refriponnachem margdoxonnacho vorg divnk vavurtolo khoim. Boro refri
zavnk zai zalear, hacho soglleanim lab (faido) kaddcho mhunn KIFF-an jahir
kollovnni dilea. Hi ek bori sondhi kudin mozbutt ani monan toxench bholaikent
ghottmutt aslole bore refri fuddarak toyar korunk. Mhojim porbim KIFF-ak ditana
mhaka ek vichar korin so dista. Itlo khorch korun poisulean thavn haddlolea
FIFA refrin toyar kel’le nove refri fuddarak ghoddun haddtole futtbol tornament
koslich bandgodd nastona KIFF choloitole vo na? Ho husko dor ek futtbol khell
pollevpeak zala
Lino B. Dourado
