Jay ho, Gay ho! Sogllim Khuxeall? Chalti zap kortana vo konnachem tori dadhoslem zalear tea mon’xak porbim divnk ‘Jai ho’ hea sobdacho ulek, Bharoti loka modim zata. Thodde mhoineam adim sabar onto’raxttrik puroskar zhoddlolem Slumdog Millionaire hea filmantlem bhouch famad zalolem Jai ho git, ek motto naro (slogan) sonvsarbhor lokpriya (popular) zala. Ani ghelea mhoinean, Dil’liche Unchle Nitisobhen, dadlo-dadlean lingi-bhog (homosexuality) ghevpachem kaideaxir kelolean, Bharotachea gay somudayeachea nagrikamni khubuch khuxallkay porgotailea jay ho, gay ho
Kalchea Sunkrarak Kuveitt-Hawally Mashra Sobhaghorant, Digdorspi Felipe-Janet Almeida hancho tiatr ‘Soglim Khuxeal’ pollevpak hanv ghelolom. Tin sumanam adim, tech Sobhaghorant ‘POLICE2’ tiatr zalolo. Eka khas kama khatir tea disachea Police2 tiatrak, hajir zavnk mhaka zalem na. “Arre khoim re tum ghelea pavttiche tiatrak?” Vosrea lagsoruch mhaka veng marun khubuch vorsamni melltolea bhaxen, mhagelea tiatr-mogi ixttan mhaka vicharlem “Jay ho, gay ho”, dogainkui bhes bori vollkotole amkam tenkunuch aslole ek bail-mon’xen (ami homosexual zololea vorim) moskoreamni mhonnlem. Tichea ani mhojea sovem ixtt-ixttinichem natem aslolean hanvem tikai-i zap keli ani mhozo hat divn tichea pollear ixttagotticho chumb ditanam tichea sangta aslolea heram ostoreamni sogllim khuxeall zal’lea vorim “jay ho, gay ho” motto hanso kaddun kakadleo (hansleo). Zoitachi khuxi porgotavpak jay ho mhonnchelo Bharoti nagrik atam kitem kay mhollear homosexuality kaideaxir kelolean gay ho nare gazoitat. Amchea samkara dog tornatte (ixtt?) hatak-hat dhorun cholot vetale Tanchi hatak-hat dhorun ani eka-mekachea tonddak polloit cholpachi soili (style) mhaka sangonk sodtali, te ixtt khubuch tempan tiatrachea holaxim doddleat vo melltat ani humalleamni uloitat. Punn, dusreank ghoddie hanv chinta toxem nhoi asot aslem. Hanv ani mhoje bhaxen her tiatr-pollennar apnnale ixtt-mitr ani toxench ganvcho lok melltat mhunnonuch, tiatrachea vosreaxim tiatr suru zavnchea thoddea vella adim vegim pavtat. Ani zaite pavtti vorsanchim-vorsam mellunk naslole lhanponniche ixtt vo soire tiatrak ailole kodden, chukun bhettat ani khuxeallkayen vengun-veng marun aplea bhettechem swagat kortat. Oxem kitem tori voilea dog ixttam sovem ghoddlem astolem. Punn mhoje ixttinin soroll koment (comment) marlo. “Him poi. Anink dog-zonn baizuyana. Jai ho, gay ho” Bhailean gormi aslolean thondd A/C sobhaghorant mhoji boska ghetolom mhunn hanv bhitor sorlom. Fattlean thavn mhoje mukhavele bosker pavtta mhollear kitlexea vollkicheamni mhaka zapoilo. Hello, hi, hello, hi korit hanv cholot vetanam avchit konnem eklean mhojem nanv ghetlem. Fattlean vollun pollelear amchea ganvchim jodi, sodannch tiatrachea vosreantuch bhettpi. Char dhempam fattlean yevn mhoje donui hat zoddun Bharoti chal-ritin tankam ‘nomoskar’ korun zap keli ani mhoje bosker vochun boslom. Thoddea vellan mhozo mobile vazlo. Kanank mat lailolo.. “Kitem re? Don-char ghonttam boroitam mhunn vhodd dista tuka? Apurbayen mhoje polle tujea bhavponnachea chumban bhizoitalo tem az visrun tuje ganvche bhoinink namaste korun gelo? Tuka kitem dislem mhaka swine flu zalea mhunn?” Dukrachem mas ruchin khavpi ganvche-bhoinnin mhojer vhodd xinn kelo ani mhaka ekui utor ulovnk dinastana apnnalo mobile fon bond kelo. Bhailean zalolo jay ho, gay ho prokar tiatrachea vosreant bhitor sortanam mhojea monant tazo aslolean, sodam porim tankam apurbayechi zap divnk tea vellar mhojea lagim ghoddunk nam. Mhoji short-cut namaste zap, tankam avoddloli nam. Tiatrachea intervallak tankam bhettunk mhunn tim boslolea zagear gelom zalear, boska kali disleo. Tankam tenkun boska ghevn bosloleank vicharlear, tankaim khobor nasli. Okosmat, intervallak natak zavpak karan kitem kay? Mobilache ankdde chiddile ani tanchi sodpus keli. Ani tinnem soroll zap dili “Ami ghora pavleant. Ekach borobor soglleank khuxeall korunk zata mhunn, somzochem nhoi!" Lino B. Dourado
