------------------------------------------------------------------------
August 25, 2009 - Goanet's 15th Anniversary
------------------------------------------------------------------------
Nanv-vostem Kalarak Chorlem Teddnam
POILEA SVATER:
Kosli-i ghozal ti zaum. Sintid divn aikochi asta. Dusro monis uloitana moddekat
zap kaddchi nhoi. Hi ek vaitt sonvoim. Konnui-i tujea thaim ghombirponnim
uloitana, tea mon’xachem ulovop dhean divn aikoleruch tagelo prosn tujean
sompeaponnim suttavo korunk zata. Ani zori tum somzunk nam zalear porot ekdam
vicharun somzun ghevnchem asta. Punn thodde zonn toxem korinant.
(1) “Ratim mhojea ghorant chor aile”, eklo ixtt, dusrea ixttak sangta. Sarkem
kanar ghenastana dusro ixtt vicharta.
“Kitle dis ravtole?”
(2) “Aikota Antu? Forsuleachem ghor chorlem”
“Oi? Bogum go baye. Atam khoim ravtolim tim? Fattle khomptten?”
Voile donui ghozalicher bore toren niyallar, khoreanich aicho monis sarkem
aikonastana vo somzunk na zalear, somjupacho yont korinant. Ordem-purtem
aikotole ani apnnalea tonddak yeta tem uloitole. Poilea ghozalin, chor chorunk
yetat ani nhoi ghorant ttikhan vo vosti korpak. Dusre ghozalin ghor chorlem
mhonnchem, ghorant chor ghuson ghorantleo moladik vostu chorun veleo ani nhoi
ghor.
Dusre Vatten
Aikupachi (hearing) kuddichi khopxi (physical ability) zalear, aikunchem
(listening) ek kaxalay (skill) zaun asa. Aicho monis itlea ratavollin misoll
zalolo asta, taka sapuch dusreanchem aikunk ghevpak fursot mellona. Thodde
asat! Dusreanchem sompchea adinch, pench korun apnnalem tondd ugoddtat.
Akantachea vellar vo bhiyeun ek monis kitem uloita tem sovkasayen aikun ghevnk
zai. Tachea oddchonint amchoi-i vantto asa oxem taka disunk favo. Ani akach
mhonntat lisening skill. Hi listening skill tuka vo mhaka asa ki nam? Sokoilli
ghozal vach ani tuzo nirnnoy di.
Tea ratrichea Son’varachi ghozal hi. Tigelo ratchea 11:30 vorancher fon. Yede
ratchea vellar ken’nanch fon korpi nhoi ti. Koslea akhantak sampodli kay?
Mhojem mon bara kodden dhanvlem ani havem vicharlem:
“Kitem zalem? Yede ratrik fon?”
Mhojea baha! (roddun) Mhaka chorlem mure?” Mhojem kalliz hall’lem. Ponasavea
idadir pavlole famad kalakarak zobordosten chorun vorop?
“Keddna?” , mhozo prosn
“Sanjechea 7:40 vorar.”
“Khoinsor”
“Kuveittche igorje lagsor.”
“Thoim kitem kortalem?”
“Sanjechea 6:30 Misak ghelolim”
“Punn tum, Sukrar sokallim 8 voranchea Misak vochpi”
“Hea disamni chodd gormi nhi re baha. Sanjechi gormi thoddi asta mhunn…”
“Dev-mhuneari mhunn kitle kakutsar. Apunn sust air-condition igorjent ravtat
ani amkam khor-khor votachea dhogantlean Misant vantto ghevnk sangtat.”
“Toxem mhonnchem nhi re baha. Ho mhozo guneanv. Igorje lagsor roste nove
bandtat. Roste uspileat ani matiyeche vhodd punz zaleat. Sarkech dongor distat.
Eke ostoren ratchea vellar tea vattevelean eksure cholun vochop mhollear
bhirantichem mhunn, tujea filiadan ugddas kelolo mhaka.”
“Tuka chorunk kitle monis asle?”
“Dog zonn”
“Tuvem tanchim tonddam polleleant?”
“Toxem korpak mhaka chance poddlo na”
“Ani sondhi mell’li zalearui, tum tanchim tonddam koxim polletolem aslem? Tum
choltana keddna tori tuji tokli voir kaddun chol’lam? Moladik vost sandlolea
porim roste sonspot veta”
“Fonkaddam korinaka re baha. Zannai?”
“Sang. Aikotam!”
“Mhojea begant mobile fon aslo. Bangar aslem ani sumar 80 Kuveitti dinar kesh
asle. Sogllem velem re baha”
“Itleo sogott vostu ekach begant ghalun bhair ghevn bhovnvop? Khoim tori
lipouncheo asleo. Moladik vostu lipounk ostoreank khas sugur zago asa. Asum tem
atam.. Tuka chorpi khoim asat?”
“Hanv nokom.”
“Zalear! (okosmat mhoji tube-light petli. Ticho mobile chorlo zalear ti
konnachea mobilavelean fon korta kay?) Ek sang. Tuka chorun vorpeamni tugelo
mobile chorun vhela. Atam tum khoimchea mobilavelean fon korta?”
“Mhojea madamichea”
“Tor tugeli madam, tuka kidnap korpeanchea bhagak asa kitem?”
“Kidnap? Konnank kidnap kelam?”
“Tuka”
“Havem keddnam sanglam?”
“Nigtench tuvem mhaka sanglam, tuka chorlam mhonn”
“Arre baha. Mhaka kidnap kelo na re. Mhojea khanddavelem handbag zobordosten
tea dogui pott doudire choramni chorun velam. Ani atam hanv sodeak komplain
korunk pulis sttexionnar asam”
“Oh Deva! Hanv somzolom, tuka chorun velem mhunn”
“Sodanch tum boddbodo. Sarkem kanar ghevnchona……” , -khem rakham telefoninch-
konn tori eka Arbi uloitoleacho avazar, tigelo fon bond poddlo.
Lino B. Dourado
http://aitaracheokaskuleo.blogspot.com/
