Tujem Kitem Zatolem Bebddea! Tor kitem zalem? Fuddarak dhormik nanvancher novim soreachim dhukamna vo bar-ank ugtim korunk porvongi dina zalear? Dev-Bhogt ani Devichea nanvancher sorea dhukananim piyele zalear, bebdde monis bore zait mhunnn amche Amdar-Montri bhiyele kay? Vo dhormik nanvam aslolea bar-ank chodd giraik asta? Dev-Bhogtanchim nanvan dhormik bhavnnam dukhoitat zalear, dhormanchea nanvan ji pidda Goyant bhitor sorlea tacher aplea svarta khatir Devachea nanvan pujea kortole rajkarnni, kiteak vhodd husko dakhoinant kay? Devachea nanvan motdaram koddlean sympathy mellunk ghenvcheak, atanchea broxttochar rajkarnnachi ek style zalea? Oxem nhi hem? Aplea vatten mon oddpak dhormancho adar ghetolo rajkarnni (politician) eka kudd’deachea adaran rosto par kortolo piso. Xekdde somple, amchea purvozamni desi soreacho dhondo suru kelear. Purtugez kallar lhanxi 'taxa de imposto de consumo' (exsice fee) bhorun madd-caju feni vinkunk tavern-ank porvongi melltali. Uprant IMFL (Indian- Made Foreign Liquor) vinkunk porvongi ditanam Kaide Khatem-an (Law Department) sorea-dhukanank nanv divnchem mhunn 'Excise Department'-ak kolit kelem. Ten’nacho lok dev-bhavarti aslolean apnnalo dhondo sufoll cholchea khatir dhormik nanvam aplea dhondeak lailim.
Bar-ank dev-bhogtanchim nanvam aschim, hem mhojem sohoz mot nhi. Amchea ganvant ek 'Lourdes Bar' asa. Utodd’de ganvchi askarin Lourdes Saibinn. Ganvchi patron hem monant dovorun goddie bar-achea dhonian aplo dhondo suru korcheak nanv dilem asot. Bar-ant vochun piyepi ganvche monis, Lourdes Saibinnichem nanvamchem bar mhonnon, thoimsoruch vochun soreachi tan bhagoi nant. Anikui ‘ Rex Bar ’, ‘Disco Bar’, ‘Polycan Bar’ ani her lhan-vhodd bar-am ganvant asat. Je zageachi avodd asta te-tea zagear vochun soro ghonttpi aple tale bizoitat. Bar-achi porvongi portean kortanam vo license renewal korchea vellar Arthik Khatean (Finance Department) Goa Excise Duty-cho: sub-rules 11 to Rule 90 bhitor haddun dhormik navam suchoita vo dakhoita tea bar-anchim lixensam renewal korunk fuddarak monam korchele asat. Oi! Favo nhoi tea zagear Dev-bhogtanchim nanvam dilear dhormik bhavnnam dhuki zatat, hem sot. Punn amchea xantichea Goyant dhormanchea nanvan kijillam zatat tacher, koddok upay ghenvchea bodla sorgavelea devi-bhogtank, barik vostunk lagon sotavop kiteak? Kalangut-Bagache veller 'St. Anthony Bar & Restaurant' hi ek khannavoll az desi toxench videxi bhonvddekarancho famad zago zavn asa. Mhoje tornne pirayer jitle khepek hanv Bagant pavttalom titlech pavtti mhojea avddiche St. Anthony Bar-ant vo khannavolint bhett ditalom. To zago ek soimbik dekhaveanim revoddla. Thoinchem vattovoronn mhaka pixear kaddtta. Adim ixtt-mitr-am sangattak kitloch vell thoim sarla. Punn atam vell melltta teddnam kuttumbachea vangdda vochun bostam. Punn, mhojea bhurgeamni mhaka vicharlolem nam. “Dada, hangasor St. Anthony jevnnank yetalo? Dekhunuch hea khannavollik hem nanv dilam?” Mhoje ghorkanni sangata ek dis Alto-Porvorim famad 'O’Coqueiro' khannavollint pavun sorlom. Bhitor sortana bikini killer Charles Shobraj-achi murtti pollevn, tinnem mhaka vicharlem. “Ho konn?”, ani hanvem tea mon’xachi vollok ani purai tacho itihas uspilo. Ten’na tigele vichar “Vaitt sobhavachea mon’xacho puttlo bandlolea, yede vhodd khannavolint mhaka kiteak haddlem? Charles Sobhraj kirmidorancho puttlo banddunk konnem ani koxi porvongi dili? Pornnem Goem aslolea itihasxik Portugez mon’xanche Afonso de Albuquerque ani famad Portugez kovi Luis Vaz de Camoes puttle ratiam modim niklaile kiteak? Goyche suttke zuzareank (Goa Freedom Fighters) tea puttleanchi kosli addkoll zatali? Famad mon’xache puttle pollevn Purtugez kallachi yad taji distali? Ani hea serial bikini killer-ak pollevn amche tornatteank Goyche Suttke Zuzari ani Goycho sorkar kitem sangunk sodta? Tache porim bikini killer zaumchem mhunn? Nanv ibaddlolo (notorious) mon’xacho puttlo banddunk thoddea mon’xak urba kiteak aili? Ani amche Goem Goykarank samballun dovorlolem lok-motacho bapui Dr. Jack de Sequiera-cho puttle dor ek ganvche Panchayati samkara az meren kiteak ube zainant? Tannem samballun dovorlolem Goem pollkun khatat mhunn tankam loz dista kai?” Ek-ek vichar korun sobar vicharancho panttulo mhojea mathear dilo. Tigelea teddnamchea vicharank, mhoji soroll zap nasli. Punn aichem Goyant choltolem vattovoronn mhaka ekuch zap dita. Ami vichun kaddlole fuddari Goyche porje khatir nhoi aplea khatiruch jiyetat. Ani to 'FATIMA BAR & RESTAURANT' hatunt voramchi-voram bosun piyeta. Dusrea sorea pompar to vochona. Fatima nanvanchea cheddvan tachea mogak ghatt kela. Mogachea khellan fottovla. Mogan poddchea adim soreachem veson (vice) taka naslem. Vokhllen soddla ten’na thavn soreacho gulam zala. Thoddea disamni Fatima Bar-achem lisens portean vo renewal kortana Excise Department odhikareank tea bar-achem nanv Fatima Saibinniche lagot? Bar-achea dhoniank nanv bodolpak koddok avaz di-it? Nanv bodol’lem zalear mogan fotovlolo nhovro soro soddun ditolo? Aikunk nam tumi? Mazor maslli soddit teddnam bebddo soro soddtolo mhunn? Lino B. Dourado http://aitaracheokaskuleo.blogspot.com/
