SON'VARACHIM SUNGTTAM
FUTTBOL KHUIM XEVTTOLO? - Jose Salvador Fernandes Eka kallar, futtbol mhollear Gõykar nhidentlo zago zatolo oxem mhonntat. Punn aiz hoch Gõykar, futtbol mhollear odikuch nhidun ravta kai kitem oso proxn poddta. "Adim futtbol khell boro aslo. Hea khellantlo tednacho khellgoddi khellacho mogi ani futtbolak visvaxi aslo. Punn atam, futtbol khellgoddi duddvanchem tondd polleun khelltat, ani duddvanchech axen hea klubantlean tea klubant uddyo martat," oxem fattlea vorsa thaun Bharotacho Adari Coach mhunn vavurtolea Xri Savio Medeiran V.Ixtt-ak sanglem. "Ami khelltale tednam duddvanchem tondd polleunk na. Atanche futtbol khellgoddi, khella poros duddvankuch chodd mhotv ditat," oxem Gõy Sorkaracho Coaching-acho Zodd-direktor aslolea ani 2001 vorsa khellant Arjuna Puroskar zoddlolea Xri Bruno Coutinhon sanglem. Adim, ghora fattlea xetant khellpi bhurgo fuddarak kitlo boro khellgoddi zatolo tem sangum yetalem, punn atam konn Gõykar kitem zatolo tem sangunk yena, Xri Coutinhon fuddem sanglem. Amchea klubamni huxar khellpi asat. Te bhailea khellgoddeam poros-ui bore khellat. Punn te xembor tok'ke khell korinant. Dusrea klubantlea khellgoddiam poros-ui boro khellun apnnak tanche poros unnem farik kortat dekun to vhoddlo-so boro khell korina. To don khell bore khellta, ani magir 'down' zata" oxem Goa Velha klubacho Coach Xri Alex Alvaresan sanglem. Aichea khellgoddiamni, khella poros duddvank chodd mhotv dilam tacho vankddo porinnam' futtbolachea dorjedar khellacher zala, oxem zaiteach zannank dista. "Na zalear, hea mollar itleo boreo sovloteo astana, amche kodde aiz bore-bore khellgoddi kiteak toyar zainant?" oso Bruno vicharta. Apunn iskolant xiktalo tednam aiche porim khellacheo sovloteo nasleo, torui ek boro khellgoddi zaun Gõyant futtbolacho dorzo vaddounk apunn svota sokall-sanz tokos gheun praktis kortalo oxem tannem sanglem. Aiz, futtbol khellant svota apnnak ghoddoupeancho ankddo unno zala, hem khub promannan sarkem zait, punn futtbol khellant tankam margdorxon korpacheo sovloteo-sompeponnam mat unnim zaunk nant. Punn itleo sovloteo ason-ui aiche khellgoddi hea khellant gombhir aslole disonant ani apoilear-ui yenant hachem karonn sodun kaddpachi goroz asa, oxem raxttrik panvddear futtbolant bhag gheun Gõyak nanv haddlolea Salogaocaracho adlo nanvosto khellgoddi Xri Medeiran sanglem. Tache sangnne pormannem, Gõyant mullavea panvddear (grass root level) thaun futtbolacho dorzo sudarpacho vavr zaunk zai. "Aiz Salgoacar ho ekuch klub zo mullavea panvddear thaun futtbolacho dorzo vaddoupachem kam' korta. Oslea anik 10 klubamni oxench kel'lem zalear, dor pavtti amkam 10-10 bore khellgoddi favo zatole asle," tannem fuddem sanglem. Gõyant futtbola khatir mullavea panvddear boro vavr chol'la. U-16 tem U-19 pirayechea bhurgeank fuddarak bore khellgoddi ghoddoupacho 'Goa Football Association' (GFA) boro vavr korta, oxem Xri Coutinhon sanglem. "Punn hech bhurge novek ani dhavek pavtat tednam xikpachea karonnak lagun iskolacho prinsipal tanchea khellache vatter addkholl haddta," Xri Coutinhon koddu monan sanglem. Punn hache urfattem, futtbolachea mollar GFA mullavea panvddear korunk zai titlo vavr korina oxem Xri Medeirak dista. Tache sangnne pormannem, GFA U-16 tem U-19 yeuzonn choloita ti nanvam purti asa. "Hea pirayechea bhurgeam khatir tornament ghoddun haddtat, final zata ani ostad thartat. Punn hea tornamenta uprant hea bhurgeancho GFA vicharuch korina. Zalear Bharotacho U-16 pongodd vinchtat tednam tantum kitle Gõykar asat?" oso Xri Medeiracho proxn asa. GFA, U-16 tem U-19 merenchea bhurgeam khatir tornament ghoddun haddta tantuntlean fuddarache 'promising' khellgoddi-i distat. Punn tea tornamenta uprant te khuim nanch zatat tem somzona, oxem mot Xri Alvares-an ugtailem. Chodduch bore khelltat tankam vinchun kaddun herancher visor ghaltat zaum-ie, oxem Xri Alvaresachem mhonn'nnea fattlem dubavi karonn asa. Khella poros duddvank mhotv diun futtbolachea dorjea vangdda khella mogiank-ui mar boslolea porim dista. "Aiz Gõy futtbolant xrextt raj oxem mhonntat. Punn amche kodde boro khell korun khella mogianchim monam jikhpi ek-ui khellgoddi na," oxem Xri Coutinho-chem mot asa. Tosle tankicho ek-ui khellgoddi na dekun khell polleunk lokachem-i mon moddlam zait, oxem tachem sangnnem asa. Aiz I-Liga poros, ganvcho tornament polleunk chodd lok dista, oxem Xri Alvaresan-ui tench mot ugtailem. "Aiz dor eka ghorant kebol TV asa. Ani dorjedar futtbol khell tacher polleunk mellta. Itle bore khell thoim polleunk mellta astana, amchea moidanacher dorzo naslolo khell polleunk lok kiteak vetolo?" Oxem Xri Medeira proxna udexim Gõychea futtbolachea dorjeacher vichar korunk laita. " Gõychea khella mogiamni futtbol polleunk yeuche mhunn ani tiketti sovay keleo, fukott khell kelo, punn lok kiteak yena to somzona.. Dhirio aslear mat 10 mintam modem hozaramni lok zomta", oxem Churchill Bros. pongddacho dhoni Xri Joaquim Alemao-an sanglem. Gõycho futtbol disan dis dorjedar zaun ek dis Gõykar khellgoddiancho Bharoti pongddant aspav zaun, Bharot ontor'raxttrik futtbol mollar ascho oxem soglleankuch dista. Bharotak Bob Houghtona sarko sogllech nodrentlean onnbhovi Coach mellot porian Bharotan futtbolachea mollar halinchea vorsamni ojapanchim zoitam zoddleant. Xri Medeirache sangnne pormannem, "atam Bharotan olympikentlea futtbol khellant bhag gheupacho dis-ui titlo pois na." Ani, atam Gõy Sorkaran khellachem dhoronn jahir kelolean, oxea pongddant Gõyche futtbol khellgoddi asche mhunn Gõykarank monantlean dista. Zait hi Gõykarachi axea puri?
