------------------------------------------------------------------------ * G * O * A * N * E * T **** C * L * A * S * S * I * F * I * E * D * S * ------------------------------------------------------------------------
Planning to get married in Goa? www.weddingsetcgoa.com Making your 'dream wedding' possible ------------------------------------------------------------------------ Gorjechea Vellar, Dusman Porian Boro “Bab boro..o. HoArab Times matso vorun, David-achea mezar dovorxi?” Borobor kam’ kortolea ixttak, havem upkar magllo. “Na zalear? Vaitt?” Tannem vicharlem “Oi! Tum white-uch mure” Mhozo Goykar sangati ixtt katin goro aslolean tacheo moskoreo korit havem mhonnlem ani boroboruch mottean hansle. Tornne pirayer khuimsoruch veche vatter astonam, rosteak tekhun aslolea ghorantlim vichari. “Lino, posrear veta? Bab boro..o. Matxe ek kilo sakor haddxi?” Xezarchea lokak, gorjechea vellar aplem kam’ zaum meren murkh bhurge porian bore sobhavache distale. Punn thodde posrear vetole moste bhurge, posrear vochonant mhunn sangun, ghora portotana dusre vatten vetale. Punn hanv mat tanchem bhaxen nhoi aslom mhunn, amchea vaddeantlo lok zanam aslo. Voddilam vo pirayen vaddlolim mon’xam, mhojea thaim upkarachim magnnim kortalint teddnam, tankam nam mhonnchem hem mhojea thotvam (principles) bhailem aslem. Punn ek! Mhojeach pirayechea tornatteamni posrear thavn kiteim haddunk sanglear, hanv soroll tankam mhonntalom “Bhonk zodd zalam re?” ani cheddum zalear “paim dorleat gho?” Novinch kazar zalolim Durbhatcho mama Seby ani mummy Livita amgher pavun sorlolim. Mhoje avoyn veg-vegim posrear vochun thondd pivnnam (cold drinks) haddunk sanglem. Rostin saikolichim peddalam marit vetanam, modekatuch rostear ubem aslolem Maggie-n mhaka addailo ani mhonnlem. “Lino, bab boro..o. Matxe mhaka Mazodd’de railway station-ar pavoi mu re. Chandor-che mauxegher vetam.” Mhoji oddchon sangli. Mhozo mama ani mummy amchea ghora ailolim asat mhunn, tika kollit kelem. Hanv lojar vochun cold drinks ghevn portotalom. Maggie thoinch rostear ubem aslolem. “Lino please. Bab boro..o. Magttam tem ditam. Upkar korun Mazodd’de train-ing pavoi” “Borem pavoitam. Punn poilim drinks vorun ghora kodden ditam. Tum, hangach rav.” Tiche churchure disun, Mazodd’de sttexionar pavopachi bhas dili Maggie ek proud cheddum. Vaddeantlea cheddvam modim tem khub sundor diso. Heach khatir tika minjeax choddloli. Tea disa, poilech pavtti tinnem mhaka, mhojea khorea nanvan urlo marlolo. Goroz poddloli nhi tika? Na tor mangasavan Hey Lapitt xivai dusrem kainch ek mhonnom naslem. Ghora pavttoch, thondd pivnna ugti korun, glasanim ottoun mummy-mamank diunk mhoje avoyn mhaka hukum dilo. Hem korta mhollear thoddo vell sorlo. Mazodd’de vochun rokhdoch yetam mhunn avoychi porvongi ghetli. Mhoji saikoll ghevn Maggie ubem asllolea zagear ghelom zalear, tem thoim naslem. Ttrein tor Kansavle velean Mazodd’de sttexonnar yeunk bhair sorloli. Mhojea ragan cholun ghelem kai? Saikolin sumar 200 metr vatt tankli, punn Maggie vatter dislem nam. Sttexonar pavopak, konn tori tika mell’la astolo oso sumar kaddun hanv portotalom teddnam, Mazodd’de islean thanv yetolo, Satan dislo. “Arre khuim ghel’lo?” Hanvem vicharlem “Maggie-k, Mazodd’de reilve sttexionar pavounk” “Punn tem tuka……..” “Oi! Monis aple kam’ zaum meren dusman dekhun taka boro dista. Gorje vellar dusmanui upkartat. Ani zannaim? Magonastanam tannem donui apol mhojea hatant dile……”oxem mhaka sangun, saikolinchim peddalam marit to gelo Satan ekdom tovnaxi ani vaddiv bhurgo aslo. Nhoi tea zagear hat laun khubxea cheddvanchim kestanvam ghorant haddtalo. Ani hech khatir taka, add nanvan ‘soitan’ mhonntale. Maggie tor, taka laginch dovorinaslem. Tache savllek porian vittetolem cheddum kitem kai mhollear tachech saikolir bosun reilve sttexonar ghelem koxem? Koslo zaddu tacher marun Santanan taka naddlem kai? Maggie goddie minjaxi cheddum zait punn bori mansugechem ani sobavik cheddum aslem. Santana-chi anik ek paddeli sonvoim mhollear, ostoreachea hodd’ddear nodor ghalun soroll comments marpachi “ kai bore apol re” Osle vaitt sobavachea tornatteachea saikolir bosop mhonnchem, fator marinastanam chikoll angar ghevop sarkem aslem. Tanche vixim mhojem mon kachabul zal’lem astona, kranch brekar soitanachi saikol mhojea mukhar thambli ani vicharlem “Arre Lino, mhozo apol pollela?” “Apol? Khuimchea apolachi gozal korta tum?” “Naka mhonntam astona Maggie-n, torkari-follam viktolea lojar donuch uril’le apol vikot ghevn mhaka dil’le. Kagott-soit saikolichea brekitak bandlolea apolantlo ek apol, khuim tori poddlo mure.” “Kedov tum gozal kori ti, hech apolanchi.” “Oi” “Oh Deva!” Ani hanv kopal dodoit ravlom?” Hea borovpacho vixei: Dusmanachi porian amkam goroz poddtta. Ani dusrem mhollear, vaitt sobhavache monis keddnam tori borea Samaritan-achem kam’ kortat. Lino B. Dourado http://aitaracheokaskuleo.blogspot.com/
