Gõykara, Kopol Dodoi Naka.
Poili Khobor Heo ghozali vachun dusrankui vachpachi urba tum ditolo. Osleo gosti keddna-keddnam-i chukun ghoddtat, ani vachpak vo dusreank sangpak amkam vegloch sontos bhogta. Punn, oxem kiteak atam ghoddtta ani adim kiteak ghoddonaslem hachea vixim keddnam tori Gõykaran niyall kela kai? Fattlea sumanant Gõyche disaleancher don vichitr bhatmeo vachunk mell’leat. Kanakona-Muthal Sadolxem vattarant ek bibtto (leopard) ani dukor eke udkache baint poddun aslole thoinsorlea lokan pollele. Baintuleant boball yetolo aikun lagsorlo lok baimxim ekttovlo. Dukor morun poddlolo ani bibtto baintuntlean voir sorpak karandai kori. Koxe baint poddle? Goddie zait bibtto dukrache fattik laglo astona, chukun dukor baint poddlo ani tachea fattafatt bibtto. Ranantlim monzat antre-poiryan ganvant dixtti poddpacheo khobro atam amkam potrancher vachunk melltat. Ranvotti zonovoram (wild animals) gavant pavtalim oxem ken’nanch adim ami aikunk nam. Devan ghodd’dilea soimbik vixv-an (sonvsarant) monis zatik jiyepak ugtea moiddonachi dhotori rochlea zalear, zonovorank vorixtt ran-dongor veg-vegllim follam asun rukh-zhaddam rochlim. Punn monis zatin odhik korun Gõyant minacheo khonni dongrar bandleat, ani dusrem; Gõyche udorgottichea nanvan dongrar aslolim zhaddam katrun ranam-dongor vinglle keleat. Ani oxe toren susegad jiyepi monzaticher uchanbollai haddli. Ranvotti monzat gavant yeun lokachea jivacher akant haddtat. Hacho zababdari konn? Dusri Khobor Bardes-Nerul ganvantle Jose 32 ani Albertina Pereira 30 vorsanche nentti kazari jodpeak, UK-echim gore kattichim mataro Urban 73 vorsancho put ani matari Janet Paul 65 vorsanchi dhuv favo zalim. Avoy-bapui pirayen lhan, bhurgim mat dupett idadichim. Hem koxem ghoddunk zata? Goyant sogllem zata! Zainam mhonnloli koslich vost nam. Fokot sorkari kamdaranchim tallttam gasunk zai. Pereira famil ravta tea imarotin poilea mozlar (first floor) Englandachi Paul famil ravtta. Tankam kosli tori goroz zali ani tannim Pereira familichem ration card ghetlem ani Bardesantle Mamlatdar Civil Supplies Section kocherin vochun aplim nanvam kollovnni form-ar (declaration form) bhorlim ani tem haddun Nerul Panchayatin dilem. Talathi Veronica Rodrigues-an kaim ek vichar korinastana Mamlatdarachea offisantlean ditto-dit kollovnni formar aslolim nanvam Pereira familichea ration kardar bhortim kelim. Gõykarank kosli tori ek sorkari kamachi goroz poddlear tannem hangachem thoim vochun kitleocheo pavtti ghalcheo poddtat. Sorkari bhovxik khocherintlea kagddancher (government official forms) ilixi chuk aslear tim portean nittayer ghalpak novim korchim poddtat. Punn, gorjek poddlolo Gõykar tras nakat mhunn sorkari kamdaranchea korzotolea tallttar vozon dovorun thoinchea thoim rabborin (rubber) pusun nittayer ghaltat. Zaitea motdarsonghantle (constituency) motdaranchim nanvam Voting List-am velim nanch zaleant ani tanche zagear on-Gõykaranchim nanvam distat. Fuddarak eleisanvam velar goro katicho lok motam ghalunk, amche modim volir ubo distolo. Dekhun Gõykara tuvem kopol dodovchi goroz nam. Aichea Gõyant vichirt kama zainant mhonnlolim nant. Tuka distolem Nerul zalole osle chukik talathi Veronica-k kheast favo zaunk zai asli. Dole dhampun dusreanchea ration kardar pordesi lokak bhorti korop ek vhodd chuk mhunnun tika tabortob sthogit (suspend) korunk zai asli ani ticho odhikar kaddun ghevn zai aslo. Punn, oxem amchea Gõyant ghoddonam. Poilea voilea svater unchleach sorkari odhikaranchi offisam mhellim asat zalear, barik kamdar kitem kortolo? Bardesintlea Mamlatdar offisantleant ailolea kollovnni form-a velean, Nerulchea Panchayat talhatin aplem kam’ kelem ani apnnachi chuk nam mhunn hat dule khoim. Jai Ho Gõykara. Tuji tokli dodoi naka. Lino B. Dourado http://aitaracheokaskuleo.blogspot.com/
